filibbi 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

mamnk a‑s‑ra‑nrḍu rbbi?

¹ way‑aytma, awal‑inu iggʷran iga‑t: «frḥat ġ‑siditnnġ.» ur‑flla‑iẓẓay ad‑awn‑daġ‑araġ mayad, walaynni ra‑kʷn‑iɛawn a‑ur‑tjlum.

² rarat lɛaql zġ‑ayt‑iskkirn‑an ʷh̬šnnin, ašku zund iḍan ad‑gan, ar‑tbbin ddat n‑mddn.

³ imma ayt‑tẓallit iṣḥan, a‑tn‑igan d‑nkkʷni urd ntni. ar‑ntɛbad rbbi s‑tḥkimt n‑rruḥ‑ns, ar‑ntzɛam f‑ssibt l‑lmasiḥ yasuɛ. ur‑a‑nbnnu f‑ma‑igan win ddat n‑bnadm.

⁴ mrad is‑riġ nkki, illa dari ġ‑ddat‑inu ma‑f‑a‑bnnuġ. ašku iġ‑illa kra n‑yan iġaln is‑dars kra‑f‑a‑ibnnu f‑iskkirn n‑ddat, illa dari mayan s‑uggʷar.

⁵ ẓẓullan‑iyi ġ‑wis tam‑uwssan, gġ zġ‑ayt‑rbbi, zġ‑tqbilt n‑bnyamin, ar‑sawalġ s‑iwaliwn n‑ayt‑yudaya zġ‑mẓẓiy‑inu. kkiġ‑ttin giġ afarisi, ar‑skarġ s‑ššrɛ kullut.

⁶ iɛzzu‑dari‑uġaras‑an bahra, aylliġ a‑ssrfufunġ ayt‑umnaggar l‑lmasiḥ. ar‑skarġ kullu ma‑flla‑illan baš ad‑trḍuġ rbbi s‑ufulki lli‑igan win ššrɛ.

⁷ walaynni kullu kra ḥasbġ iga‑yyi afulki ġ‑uwssan‑an, ḥasbġ‑t ġilad ur‑igi yat f‑ssibt l‑lmasiḥ.

⁸ ḥasbġ kullu tiġawsiwin‑an zund ur‑gint yat, ašku tlla dari ġilad ma‑tnt‑yufn bahra, a‑stt‑igan d‑twassna l‑lmasiḥ yasuɛ lli‑iwrrin iga sidi. f‑ssibt‑ns a‑f‑giġ tiġawsiwin‑an d‑irkan, flġ kullu ma‑dari‑illan baš ad‑iyi‑yili lmasiḥ,

⁹ gġ ula nkki wins. ur‑sul‑a‑skarġ f‑ad‑trḍuġ rbbi s‑iskkirn n‑ššrɛ, walaynni irḍa flla f‑ssibt n‑mad‑umnġ s‑lmasiḥ. ašku ġmkad a‑s‑a‑itrḍu rbbi f‑kullu‑willi srs umnnin.

¹⁰ imma ġilad riġ ad‑issanġ lmasiḥ ula taḥkimt itjhhdn lli‑t‑id‑issnkrn zġ‑lmut, issanġ ula tamunt n‑tmmariw‑ns, iriġ ad‑gġ zund nttan ġ‑lmut‑ns

¹¹ ard nkrġ ula nkki zġ‑gr willi mmutnin.

tizzla lli‑s‑ira bulus a‑ilkm ttmi

¹² ur‑nniġ izd nkkin a‑iruḥn kullu mayad ula kmmlġ gis, walaynni ar‑tzayadġ s‑lgddam baš ad‑amẓġ maylli‑f‑iyi‑yumẓ lmasiḥ yasuɛ.

¹³ way‑aytma, ur‑nniġ is‑t‑umẓġ ġilad, walaynni yat‑tġawsa kad‑skarġ: ar‑n‑falġ ma‑illan ġ‑tġurdin, ar‑ttiduġ s‑ma‑illan ġ‑lgddam.

¹⁴ ar‑tazzalġ ad‑ruḥġ ttmi, baš ad‑amẓġ lkas lli‑igan tudrt n‑uflla lli‑s‑iyi‑d‑iġra rbbi f‑uwdm l‑lmasiḥ yasuɛ.

¹⁵ ih̬ṣṣa‑yaġ a‑nswingim ġmkan, kullu wanna ginnġ imqqurn ġ‑uġaras n‑rbbi. walaynni iġ‑darun kra n‑iswingimn yaḍni, rad‑awn‑iml rbbi tiġawsiwin‑an ġmklli gant.

¹⁶ imma ġilad illa fllannġ a‑bdda‑nskar s‑tnbaḍin lli‑nlmd.

¹⁷ way‑aytma, skarat kullukn zund nkki, tḍfurm ġwilli munnin d‑uġaras lli‑awn‑nmla.

¹⁸ ašku nniġ‑awn‑t kigan d‑twaliw, iniġ‑awn‑t‑daġ ġilad s‑imṭṭawn: iggut ma‑iskarn zund iġ‑ur‑igi‑uggjdi l‑lmasiḥ yat.

¹⁹ rad‑ggʷrun ntni s‑lhalak, ašku ar‑tɛbadn adis‑nsn. ġaylli‑s‑a‑tfraḥn a‑ra‑tn‑iššḥššm, ašku ar‑tsalan ġir ma‑igan win ddunit‑ad.

²⁰ imma nkkʷni nga ayt‑ignna. nga‑n rrja‑nnġ ġ‑unjjam lli‑ra‑d‑yašk zġ‑ignna ar‑srs‑ntql, a‑t‑igan d‑siditnnġ yasuɛ lmasiḥ.

²¹ nttan a‑ra‑irar ddat‑nnġ n‑wakal a‑tg zund ddat‑ns l‑lmjd s‑tḥkimt lli‑s‑iẓḍar a‑ig kullu ma‑illan ġ‑ddu‑ufus‑ns.