filibbi 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

uguz l‑lmasiḥ ula tattuyt‑ns

¹ is‑ur‑tdusm tzɛmm f‑ssibt n‑ma‑tgam win lmasiḥ? is‑ur‑a‑kʷn‑tssfjjij tayri‑ns? is‑ur‑a‑tssḥssam s‑tamunt n‑rruḥ‑ns? is‑ur‑darun lḥnant ula lmḥbbt iggutn n‑ingratun?

² lliġ darun illa kullu mayan, ra‑kʷn‑ḍalbġ ad‑iyi‑tkmmlm lfrḥ‑inu, tgm kullu yan ġ‑iswingimn‑nnun ula tayri‑nnun, tmunm ġ‑yan‑uġaras, tmšaškam‑d ġ‑yat‑tnbaṭṭ.

³ a‑ur‑tskarm kra f‑a‑tzzwurm ih̬f‑nnun ula‑da‑ttirim a‑tmlm is‑tgam kra, walaynni ẓẓimẓayat ih̬f‑nnun ar‑bdda‑ttggam wiyyaḍ d‑ma‑kʷn‑yufn.

⁴ illa f‑kud yan gigun a‑ur‑iswingim ġir ġ‑ma‑ira i‑ih̬f‑ns, walaynni a‑iswingim ula ġ‑ma‑rad‑irin wiyyaḍ.

⁵ illa fllawn a‑tswingimm ġmklli iswingim lmasiḥ yasuɛ.

⁶ iga ntta ġmklli iga rbbi, walaynni ur‑iġwi ġ‑mayan a‑n‑sul‑iqama ġmklli iga rbbi.

⁷ hati ifl‑n kullu mad‑dars‑illan, iwrri ig zund ismg, ilul ġ‑ṣṣurt n‑bnadm.

⁸ lliġ iga s‑ssift n‑bnadm, yadr‑d i‑ih̬f‑ns, iskr kullu ma‑gis‑ira rbbi aylliġ immut s‑lmut išqan f‑uggjdi.

⁹ f‑mayan a‑f‑t‑yull rbbi s‑tattuyt n‑ignna, ifk‑as ism lli‑yugʷrn kraygatt ism,

¹⁰ baš a‑d‑iknu kraygatt afud s‑ism n‑yasuɛ, ġ‑ignna ula ġ‑wakal ula ġ‑ddu‑wakal,

¹¹ yini kraygatt ils: «yasuɛ lmasiḥ a‑igan sidis n‑kullu ma‑illan.» ġmkad a‑s‑rad‑kullu‑uqqrn lmjd n‑rbbi babatnnġ.

itran ġ‑tillas n‑ddunit

¹² f‑mayan a‑f‑ra‑kʷn‑uṣṣaġ ay‑aytma ɛzzanin, ašku ssnġ is‑tram a‑tskarm ma‑fllawn‑illan, ġilad ġ‑d‑fllawn‑aggugġ ġmklli‑ti‑tskarm ġakud lliġ‑n‑didun‑lliġ. f‑mayan a‑f‑rad‑awn‑iniġ: skarat kullu baš a‑tssafum ajnjm lli‑s‑tnjmm, ar‑bahra‑ttuqqarm rbbi ar‑bdda‑stti‑ttawim ġ‑ma‑ira ntta.

¹³ ašku rbbi a‑bdda‑gigun‑iḥkamn baš a‑ttirim ma‑t‑irḍan ar‑srs‑tskarm.

¹⁴ zaydat ġ‑kullu mayad bla‑da‑ttngmugm ula‑da‑ttẓim,

¹⁵ baš a‑tġusm bla gigun illa kra l‑lɛib, tgm tarwa šwanin n‑rbbi ġ‑wammas n‑tasut‑ad yʷh̬šnn ijlan. ha‑kunni zund itran ġ‑ignwan a‑s‑a‑tfawm ġ‑wammas‑nsn,

¹⁶ ar‑asn‑tmalam awal n‑tudrt. mayan a‑s‑rad‑srun‑frḥġ bahra ġ‑wass lli‑ġ‑ra‑d‑yašk lmasiḥ, ẓrġ is‑urd bla lfaytt a‑s‑a‑tazzalġ ar‑tnhatafġ ġ‑darun.

¹⁷ wah̬h̬a iġ‑rad‑ffin idammn‑inu f‑iggi n‑twafka l‑liman‑nnun zund aman n‑waḍil lli‑tffin mddn f‑twafkiw‑nsn ġ‑lgddam n‑rbbi, ha‑yyi rḍiġ s‑mayan, frḥġ srun kullukn.

¹⁸ ula kunni illa fllawn a‑srs‑trḍum, tfrḥm didi.

tugga f‑timutaws d‑abafruditus

¹⁹ ar‑trjuġ ġ‑siditnnġ yasuɛ ad‑awn‑in‑aznġ timutaws ġ‑mayd‑d‑yakmurn baš a‑yyi‑d‑issfrḥ ula nkki s‑kra l‑lh̬bar zġ‑darun.

²⁰ ur‑dari yan iswingimn zund nttan, ar‑tt‑itawi bahra ġ‑mamnk a‑tgam.

²¹ ašku kud yan ar‑iswingim ġ‑ma‑igan wins, urd ma‑igan win yasuɛ lmasiḥ.

²² imma kunni tssnm f‑timutaws is‑ifulki bahra, tissanm mamnk a‑didi‑ith̬dam zund arraw d‑babas ġ‑twuri l‑lh̬bar ifulkin.

²³ ar‑trjuġ a‑t‑in‑aznġ ġilad, walaynni ar‑tqlġ ard ẓrġ ma‑s‑rad‑iyi‑tggʷru ġid.

²⁴ ha‑yyi tiqqnġ ġ‑siditnnġ ra‑n‑aškġ ula nkki s‑darun ġ‑mayd‑d‑yakmurn.

²⁵ swangmġ is‑ra‑yaf ad‑awn‑in‑rarġ ula gʷmatnnġ abafruditus lli‑didi‑ith̬damn ar‑itbddad ġ‑tama‑nu. iga amazan‑nnun, tuznm‑t‑id a‑yyi‑iɛawn ġ‑ma‑yyi‑ih̬ṣṣan.

²⁶ ašku ar‑t‑inqqa‑umarg‑nnun kullukn, ṭiyyr‑as lliġ issn is‑tsfldm f‑tmaḍunt‑ns.

²⁷ s‑ṣṣaḥt yuḍn bahra aylliġ illa f‑lmut, imma rbbi iḥnna gis. iḥnnu flla ula nkki lliġ‑t‑ijjujji, ikkis flla taġuft‑an zġ‑tġufiwin yaḍni.

²⁸ mayad a‑f‑riġ ad‑awn‑t‑in‑aznġ ġilad baš a‑ti‑tẓrm tfrḥm dids, wala a‑sul‑asiġ taġuft‑ns nkki.

²⁹ šškšmat‑t s‑darun, tfrḥm srs bahra s‑ism n‑siditnnġ. talġat mddn zund ġwad,

³⁰ ašku h̬da ur‑immut f‑ssibt n‑twuri l‑lmasiḥ. ur‑iġwi ġ‑tudrt‑ns ašku ira a‑yyi‑itɛawan ġ‑maylli mi ur‑tẓḍarm kunni.