filibbi 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus d‑timutaws, ih̬ddamn l‑lmasiḥ yasuɛ, i‑kullu imẓlayn l‑lmasiḥ yasuɛ ġ‑tmdint n‑filibbi ula ingabaln d‑imɛawann‑nnun.

² ad‑awn‑tili lbaraka d‑sslamt zġ‑rbbi babatnnġ d‑siditnnġ yasuɛ lmasiḥ.

bulus iḍalb rbbi a‑ibark ayt‑filibbi

³ ar‑tškarġ rbbi‑nu ġakud nna‑fllawn‑swingimġ.

⁴ ar‑tfraḥġ ġakud nna‑ti‑tḍalabġ f‑ssibt‑nnun kullukn,

⁵ ašku ar‑didi‑ttmɛawanm ġ‑twuri l‑lh̬bar ifulkin zġ‑wass amzwaru sul s‑ġassad.

⁶ hati ssnġ mayad bahra: rbbi lli‑gigun‑igran afulki ra‑t‑issafaw ard ikmml ġ‑wass lli‑ġ‑ra‑d‑iwrri lmasiḥ yasuɛ.

⁷ iqqan‑iyi‑d a‑gigun‑swingimġ kullukn ġmkan, ašku usiġ‑kʷn‑bdda ġ‑uwl‑inu. lliġ a‑tḥamaġ f‑lh̬bar ifulkin ar‑t‑zzgaġ ġ‑uwlawn n‑mddn, ula ġilad ġ‑tyamaẓġ iliġ ġ‑iskraf, tkšmm didi kullukn ġ‑lbaraka n‑twuri‑ad.

⁸ rbbi a‑flla‑igan inigi, yissan mamnk a‑yyi‑inqqa‑umarg‑nnun, ar‑kʷn‑ttiriġ s‑tayri l‑lmasiḥ yasuɛ.

⁹ imma ġilad ar‑tḍalabġ rbbi ad‑awn‑issigat bahra lḥnant n‑ingratun, ifk‑awn a‑tissanm kullu ma‑igan win lḥqq ar‑taṭṭum ma‑išwan zġ‑ma‑yʷh̬šnn.

¹⁰ ġmkad a‑s‑ra‑tiẓḍarm a‑bdda‑ttnawalm afulki, tġusm zġ‑kullu ma‑igan lɛib ula kullu ma‑iššḥššamn mddn ar ass lli‑ġ‑ra‑d‑yašk lmasiḥ.

¹¹ rad‑awn‑tigat ṣṣabt n‑ufulki lli‑gigun‑iskar yasuɛ lmasiḥ, iban gigun lmjd n‑rbbi, alġn‑t mddn f‑ssibt‑nnun.

ifrḥ bulus s‑mad‑as‑ijran

¹² way‑aytma, riġ a‑tissanm ġayad‑iyi‑ijran izuyd ġ‑twassna l‑lh̬bar ifulkin,

¹³ aylliġ ssnn kullu imh̬zniyn l‑lqṣr d‑wiyyaḍ ggutnin izd f‑ssibt l‑lmasiḥ a‑f‑tyamaẓġ.

¹⁴ ula aytmatnnġ, iggut gisn ma‑iwrrin idus ġ‑siditnnġ f‑ssibt n‑iskraf‑inu. zɛmn bahra ar‑tbrraḥn s‑uggʷar s‑wawal n‑rbbi, ur‑a‑tiksaḍn yat.

¹⁵ ssnġ kra gisn ar‑ttirin ad‑zzwurn ssimġurn ih̬f‑nsn, ġayan ka‑f‑a‑tbrraḥn f‑lmasiḥ. walaynni illa sul mad‑dar‑tlla nniyt iṣfan,

¹⁶ ar‑tbrraḥn f‑ssibt l‑lḥnant lli‑gisn‑illan, ašku ssnn is‑iyi‑d‑yiwi rbbi s‑ġid baš ad‑tḥamaġ f‑lh̬bar ifulkin.

¹⁷ imma wiyyaḍ yaḍni urd s‑uwl iṣfan a‑s‑a‑tbrraḥn f‑lmasiḥ, ašku ran ad‑amẓn ġir kra i‑ih̬f‑nsn, irin ad‑iyi‑ssigatn tanukmut ġ‑lḥbs.

¹⁸ imma nkki, ma‑rad‑iniġ? abla‑ad‑frḥġ iġ‑a‑sflidn mddn i‑tbrraḥt f‑lmasiḥ, ig‑iyt f‑imi n‑ayt‑sin‑uwdmawn nġd wid dar ul iṣfan. hati rad‑sul‑frḥġ,

¹⁹ ašku mayd‑iyi‑ijran, ssnġ is‑ra‑zgis‑njmġ tigira f‑ssibt n‑ma‑flla‑ttḍalabm rbbi ar‑iyi‑itɛawan rruḥ n‑yasuɛ lmasiḥ.

²⁰ iggut gigi rrja, iriġ bahra ad‑skarġ kullu ma‑yyi‑d‑iqqann s‑zzɛamt iggutn, baš a‑gigi‑tban‑tmuġra l‑lmasiḥ ġilad zund kraygatt luqt, iġ‑sulġ ula iġ‑mmutġ.

²¹ ašku dari nkki: iġ‑ddrġ, lmasiḥ a‑igan tudrt‑inu. iġ‑mmutġ, rad‑iyi‑yili ma‑yufn tudrt‑ad.

²² ur‑ssinġ manwa ra‑gisn‑iriġ, ašku iġ‑sulġ ġ‑ddat rad‑iẓḍarġ ad‑zaydġ ġ‑twuri‑ad ifulkin.

²³ riġ mayad ula mayan s‑sin. riġ bahra ad‑ffuġġ ddunit‑ad iliġ d‑lmasiḥ, ašku ifulki mayan s‑uggʷar.

²⁴ walaynni f‑ssibt‑nnun ra‑yaf ad‑qamaġ ġ‑ddat.

²⁵ ssnġ bahra is‑yuf ġmkad. rad‑sulġ qamaġ didun kullukn baš a‑ttzayadm ar‑ttfraḥm ġ‑uġaras n‑siditnnġ.

²⁶ ġmkad a‑s‑rad‑bahra‑ttfraḥm s‑lmasiḥ yasuɛ f‑ssibt‑inu ġakud lliġ ra‑n‑daġ‑darun‑aškġ.

²⁷ walaynni illa fllawn a‑tskarm s‑ma‑d‑imšaškan d‑lh̬bar ifulkin l‑lmasiḥ. ašku riġ a‑bdda‑fllawn‑sflidġ is‑kullu‑tzgam ġ‑yan‑uġaras, iġ‑d‑fllawn‑aggugġ nġd iġ‑n‑darun‑uškiġ, ar‑kullu‑tth̬damm s‑yat‑tnbaṭṭ baš a‑tsslmadm lḥqq l‑lh̬bar ifulkin ġmklli iga

²⁸ bla‑da‑ttiksaḍm zġ‑willi‑kʷn‑ssrfufunnin. ġmkad a‑s‑rad‑ẓrn is‑llan ntni ġ‑uġaras l‑lhalak tilim kunni ġ‑uġaras n‑ujnjm, ašku rbbi a‑ra‑kʷn‑ijjnjm.

²⁹ ašku lliġ‑awn‑ifka a‑tamnm s‑lmasiḥ, ifka‑yawn ula tarfufnt f‑ssibt‑ns.

³⁰ tkšmm ula kunni s‑imiġ lli‑tẓram mmaġġ srs nkki, tsfldm ula ġilad is‑a‑sul‑srs‑tmmaġġ.