anurẓm 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ yut wis smmus l‑lmalayka nnffar‑ns, s‑ẓriġ yan‑itri iḍr zġ‑ignwan s‑wakal. ttfk‑as yat‑tsarut i‑itri‑an, igan tin‑tdrut n‑wakal.

² iddu irẓm imi n‑tdrut, iġli‑d zġ‑gis kra n‑waggu iggutn zund aggu n‑ufarnu imqqurn, aylliġ tllas tafukt illas lḥal kullu s‑waggu lli‑d‑iġlin zġ‑tdrut n‑wakal.

³ tffuġ‑d‑ilmma‑tmurġi zġ‑waggu, tettrs f‑wakal, ttfk‑as‑tẓḍḍart a‑tqqs zund iġrdm.

⁴ ityawnna‑yas a‑ur‑thlk tuga n‑wakal wala isġarn wala tifrawin n‑isafarn, walaynni a‑thlk ġir mddn lli‑ur‑dar ṭṭabɛ n‑rbbi f‑ignzi‑nsn.

⁵ ur‑tẓḍar a‑tn‑tnġ, walaynni ityawfka‑yas a‑tn‑tssmḥakka smmus‑iyrn, ar‑tn‑tẓẓaḍ zund ġmklli iẓẓaḍ ssmm n‑iġrdm iġ‑iqqs bnadm.

⁶ ġ‑uwssan‑an rad‑bahra‑irin mddn ad‑mmtn, walaynni ur‑rad‑iẓḍarn ad‑mmtn. rad‑bahra‑ẓuẓḍn lmut, walaynni ur‑ra‑stt‑afn.

⁷ trwas‑tmurġi‑an i‑yissan ujadnin i‑imiġ. kud yat, illa f‑ih̬f‑ns kra irwasn ttaj n‑uwrġ. gn‑uwdmawn‑nsnt zund udm n‑bnadm,

⁸ ig‑wazzar‑nsnt zund azzar n‑tmġart, gn‑uwh̬san‑nsnt zund uh̬san n‑izm.

⁹ lsnt f‑idmarn‑nsnt kra irwasn abannk n‑uwzzal. ig ijjij n‑ifrawn‑nsnt zund ijjij l‑lkrarṣ d‑yissan ggutnin ar‑kullu‑tazzaln s‑imiġ.

¹⁰ kud yat teṭṭaf timġilt d‑usaqs zund iġrdm. ġ‑tmġilt‑nsnt a‑ġ‑tlla‑tẓḍḍart lli‑s‑rad‑ssmḥakkant mddn smmus‑iyrn.

¹¹ tamurġi‑an, agllid lli‑gis‑iḥkamn iga lmalak n‑tdrut n‑wakal. ig ism‑ns ‹abaddun› s‑wawal n‑ayt‑yudaya, ig ‹abullyun› (ġwalli ifnnun) s‑wawal n‑ayt‑yunan.

¹² ġmkad a‑tzri‑tguḍi tamzwarut. rad‑sul‑ilint snat‑tguḍiwin yaḍni.

¹³ yut wis sḍiṣ l‑lmalayka nnffar‑ns, s‑sfldġ i‑yan‑wawal isawl‑d zġ‑dar kkuẓ‑waskawn n‑tġmrin n‑ṭṭbla n‑uwrġ lli‑illan ġ‑lgddam n‑rbbi.

¹⁴ iġr i‑lmalak‑an wis sḍiṣ lli‑yusin nnffar yini‑as: «rẓm‑d i‑kkuẓ lmalayka lli‑tyamaẓnin ġ‑dar‑wasif n‑furat imqqurn.»

¹⁵ irẓm ilmma i‑kkuẓ lmalayka lli‑ujadnin i‑tasaɛt‑an n‑wass‑an n‑wayyur‑an n‑usggʷas‑an baš ad‑nġn tulut n‑bnadm.

¹⁶ sfldġ i‑kra imla‑yyi mnnaw ad‑gan imnnayn n‑yissan n‑imiġ. gan sin id‑miyya n‑id‑milyun (200.000.000).

¹⁷ ġmkad a‑s‑iyi‑d‑bann‑yissan ġ‑twargit lli‑ẓriġ. kraygatt amnnay ilsa abannk illa‑gis‑uẓggʷaġ d‑uẓrqi d‑uwraġ, gn iguyya n‑yissan zund agayyu n‑izm, ar‑di‑ttffuġ lɛafit d‑waggu d‑lkbrit zġ‑imi‑nsn.

¹⁸ ġakudan a‑immut tulut n‑bnadm s‑kraṭṭ‑tguḍiwin‑an, s‑lɛafit d‑waggu d‑lkbrit lli‑d‑itffuġn zġ‑imawn‑nsn.

¹⁹ ašku ġ‑imi‑nsn d‑tmġilt‑nsn a‑ġ‑tlla‑tẓḍḍart n‑yissan‑an. kud yan, timġilt‑ns teṭṭaf ih̬f zund algmmaḍ ma‑s‑a‑issyaggas mddn.

²⁰ imma kullu willi ur‑mmutnin s‑tguḍiwin‑an, sul ur‑ta‑rin ad‑fln ġaylli skarn s‑ifassn‑nsn. zuydn ntni ar‑tɛbadn ljnun ula laṣnam n‑uwrġ d‑nnuqrt d‑wanas d‑uẓru d‑ukššuḍ lli‑ur‑tmnadnin ula‑da‑sflidn ula‑da‑fttun.

²¹ ntni ur‑tn‑akkʷ‑tʷgraẓ f‑iskkirn‑nsn, ar‑nqqan ar‑skarn ssiḥr ar‑tfsadn ar‑takʷrn.