anurẓm 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

wis ssa n‑ṭṭwabɛ ula taṭṭast n‑uwrġ

¹ ifsi‑ulqqaġ ilmma wis ssa n‑ṭṭwabɛ, s‑ifssa kullu ma‑illan ġ‑ignna aylliġ izri ma‑itggan mnaṣṣ n‑tasaɛt.

² ẓrġ ilmma ssa l‑lmalayka lli‑biddnin ġ‑lgddam n‑rbbi, ttfkn‑asn ssa n‑nnffarat.

³ iddu yal‑lmalak yaḍni ibidd ġ‑tama n‑uẓru n‑tġrsi, yasi taṭṭast n‑uwrġ. ittfk‑as lbh̬ur iggutn a‑dids‑issmun tiẓulla n‑kullu‑imẓlayn n‑rbbi, baš a‑tnt‑in‑issakmur i‑rbbi f‑ṭṭbla n‑uwrġ lli‑illan ġ‑lgddam l‑lɛrš.

⁴ ar‑yaqlay‑waggu l‑lbh̬ur d‑tẓulla n‑imẓlayn zġ‑ufus l‑lmalak s‑lgddam n‑rbbi.

⁵ iddu lmalak ilmma, iɛmmr taṭṭast s‑tirgin l‑lɛafit zġ‑dar ṭṭbla, iluḥ‑tt‑in f‑ddunit. immass iggig s‑uqqryan itjhhdn, utn‑uwsmann immass‑wakal.

ssa l‑lmalayka lli‑dar ssa n‑nnffarat

⁶ nkrn ilmma ssa lmalayka lli‑dar ssa nnffarat, skrn f‑a‑tn‑utn.

⁷ yut lmalak amzwaru nnffar‑ns, s‑iḍr ibruri d‑lɛafit f‑ddunit h̬lḍn d‑idammn. ijdr tulut ġ‑ddunit ula tulut ġ‑isġarn, tjdr ula tuga izgzawn kullutt.

⁸ yut wis sin l‑lmalayka nnffar‑ns, s‑ityattay kra irwasn yan‑udrar imqqurn ijddrn s‑lɛafit, ittluḥ‑n ġ‑umda.

⁹ iwrri iẓggʷaġ tulut ġ‑umda zund idammn, immt tulut ġ‑lmh̬luqat lli‑llanin ġ‑umda, itthlk ula tulut ġ‑wanawn lli‑tkkanin amda.

¹⁰ yut wis kraḍ l‑lmalayka nnffar‑ns, s‑iḍr yan‑itri imqqurn zġ‑ignwan ar‑ijddr zund asafu, iḍr f‑tulut n‑isaffn d‑talɛinin n‑waman.

¹¹ iga ism n‑itri ‹asmmum›, iwrri ismmum tulut ġ‑waman, immt ma‑iggutn ġ‑mddn lli‑swanin aman‑an, ašku wrrin smmumn bahra.

¹² yut wis kkuẓ l‑lmalayka nnffar‑ns, s‑tettut tafukt illas tulut‑ns, ittut‑wayyur ula ntta illas tulut‑ns, ttutn itran ula ntni illas tulut‑nsn. ar‑tlaḥ tifawt ġ‑tulut n‑uzal ula tulut n‑iyḍ.

¹³ ssmaqqlġ‑n‑daġ s‑ẓriġ yan‑igidr yuyl ġ‑wammas n‑ignwan, sfldġ‑as inna s‑wawal itjhhdn: «taguḍi taguḍi taguḍi a‑ra‑yili i‑imzdġn n‑ddunit f‑ssibt n‑nnffarat lli‑rad‑utn kraḍ lmalayka yaḍni.»