anurẓm 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

kkuẓ lmalayka

¹ lliġ izri mayan, ẓrġ kkuẓ lmalayka biddn ġ‑kkuẓṭ‑tsgiw n‑ddunit, ḥṣarn‑in aḍu a‑ur‑yut akal ula amda ula kra n‑usġar.

² ẓrġ‑n ilmma yal‑lmalak yaḍni iġli‑d zġ‑illiġ a‑di‑taqlay tafukt, yasi‑d ṭṭabɛ n‑rbbi bab n‑tudrt. iġr lmalak‑an s‑wawal itjhhdn i‑kkuẓ lmalayka lli‑yuṣṣa rbbi ad‑hlkn akal d‑umda,

³ yini‑asn: «ad‑ur‑thlkm akal ula amda ula isġarn ard ng ṭṭabɛ f‑ignzi n‑kullu ih̬ddamn n‑rbbi‑nnġ.»

⁴ sfldġ ilmma i‑kra imla‑yyi mnnaw ad‑gan ġwilli‑mi‑gan ṭṭabɛ. gan miyya d‑kkuẓ id‑mraw d‑kkuẓ n‑walf (144.000). gan ntni zġ‑kullu tiqbilin n‑ayt‑rbbi,

⁵ yili sin d‑mraw‑walf (12.000) zġ‑kraygatt taqbilt: zġ‑yahuda d‑rawbin d‑gad

⁶ d‑ašir d‑naftali d‑manassi

⁷ d‑šimɛun d‑lawi d‑yassakar

⁸ d‑zabulun d‑yusf d‑bnyamin.

mddn ggutnin ġ‑ignna

⁹ lliġ izri mayan ssmaqqlġ‑n ẓrġ mddn ggutnin bahra, ur‑ra‑yiẓḍar yan a‑tn‑iḥasb. gan ntni zġ‑kullu timizar d‑tqbilin d‑tasutin d‑lluġat n‑ddunit. biddn ġ‑lgddam l‑lɛrš ula alqqaġ s‑tmlsa tumlilin, asin talḍayin ġ‑ufus‑nsn.

¹⁰ alln awal‑nsn ar‑ttinin: «rbbi‑nnġ lli‑iskiwsn f‑lɛrš, nttan d‑ulqqaġ ad‑aġ‑ijjnjmn.»

¹¹ biddn ġin kullu lmalayka, lullin i‑lɛrš ula imġarn ula kkuẓṭ lmh̬luqat, ḍrn‑in f‑uwdm‑nsn ġ‑lgddam l‑lɛrš sjdn i‑rbbi

¹² inin: «amin. a‑yili lḥmd d‑lmjd d‑tḥkimt d‑ššukr d‑ttuqir d‑lḥukm d‑lquwwa i‑rbbi‑nnġ ġilad ula kullu mayd‑d‑iftan, amin.»

¹³ isqsa‑yyi yan zġ‑imġarn: «is‑tssnt mad‑gan ġwid lsanin timlsa tumlilin? manizġ‑d‑uškan?»

¹⁴ iniġ‑as: «kiyi a‑issnn a‑sidi.» yini‑yyi: «ntni gan ġwilli‑d‑ffuġnin zġ‑unukmu lli‑bahra‑išqan, sirdn timlsa‑nsn s‑idammn n‑ulqqaġ aylliġ mllulnt bahra.

¹⁵ f‑mayan a‑f‑biddn ġ‑lgddam l‑lɛrš n‑rbbi ar‑ti‑tɛbadn ġ‑untal‑ns ġ‑iyḍ ula azal. ġwalli iskiwsn f‑lɛrš rad‑bdda‑tn‑issntal ġ‑dars.

¹⁶ ur‑sar‑tn‑inġi laẓ ula irifi. ur‑sar‑tn‑tut tafukt ula ijawan.

¹⁷ ašku alqqaġ lli‑illan ġ‑lɛrš, nttan a‑ra‑tn‑iks izwur‑asn s‑talɛinin n‑waman n‑tudrt. rad‑asn‑isfiḍ rbbi kullu imṭṭawn‑nsn.»