anurẓm 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

alqqaġ ifsi ṭṭwabɛ

¹ ẓrġ‑n alqqaġ ifsi yan zġ‑ssa n‑ṭṭwabɛ, s‑sfldġ i‑yat zġ‑kkuẓṭ lmh̬luqat tsawl s‑wawal itjhhdn zund iggig tini: «ffuġ‑d.»

² ssmaqqlġ‑n s‑n‑ẓriġ yan‑wayyis umlil, yusi‑umnnay‑ns yal‑lqus n‑imiġ. ittfk‑as yan‑ttaj, iffuġ‑d a‑inru, ig wad bdda itnrun.

³ ifsi‑ulqqaġ wis sin ṭṭwabɛ, s‑sfldġ i‑tis snat lmh̬luqat tnna: «ffuġ‑d.»

⁴ iffuġ‑d‑wayyis yaḍni iga aẓggʷaġ. ittfk i‑umnnay‑ns a‑ikkis sslamt f‑ddunit f‑ad‑nqqan mddn i‑ngratsn, ttfk‑as yat taẓẓit imqqurn.

⁵ ifsi‑ulqqaġ wis kraḍ ṭṭwabɛ, s‑sfldġ i‑tis kraṭṭ lmh̬luqat tnna: «ffuġ‑d.» ssmaqqlġ s‑ẓriġ ayyis iḍili, yusi‑umnnay‑ns yal‑lmizan ġ‑ufus‑ns.

⁶ sfldġ i‑kra irwas awal zġ‑gr kkuẓṭ lmh̬luqat yini: «ġir kilu n‑irdn s‑uqarid n‑nnuqrt. ġir kraḍ id‑kilu n‑ṭmẓẓin s‑uqarid n‑nnuqrt. walaynni a‑ur‑tssukfm zzit ula aḍil.»

⁷ ifsi‑ulqqaġ wis kkuẓ ṭṭwabɛ, s‑sfldġ i‑tis kkuẓṭ lmh̬luqat tnna: «ffuġ‑d.»

⁸ ssmaqqlġ s‑ẓriġ ayyis awraġ, ig ism n‑umnnay‑ns ‹lmut›, iḍfur‑t‑‹umḍḍal›. ittfk‑asn ad‑ḥkamn f‑yan‑ugzzum zġ‑kkuẓ igzman n‑ddunit, ad‑nġn ġwilli gis zdġnin s‑taẓẓit d‑uġni d‑waṭṭan d‑luḥuš n‑ddunit.

⁹ ifsi‑ulqqaġ wis smmus ṭṭwabɛ, s‑ẓriġ larwaḥ n‑willi mmutnin f‑ssibt n‑tbrraḥt‑nsn s‑wawal n‑rbbi ula tugga‑nsn lli‑fllas‑fkan. ġ‑ddu‑uẓru n‑tġrsi a‑ġ‑llan,

¹⁰ alln awal‑nsn inin: «wa‑sidi rbbi itjhhdn, tgit amẓlay tgt lḥqq. ar managu a‑ra‑n‑tssmaṭlt lɛqubit lli‑illan f‑mddn n‑ddunit, trart‑asn f‑idammn‑nnġ?»

¹¹ ġakudan a‑ityawfka i‑kraygatt yan gisn timlsit tumlilt, yini‑asn rbbi ad‑qln sul imikk ard ikmml ġunšk lli‑d‑iqqann zġ‑aytmatsn d‑imɛawann‑nsn lli‑rad‑nġn mddn ġmklli‑tn‑nġan ntni.

¹² ifsi‑ulqqaġ wis sḍiṣ ṭṭwabɛ. ssmaqqlġ‑n ẓrġ akal immussa s‑jjhd, twrri tllas tafukt zund ah̬nif iḍlan, iwrri iẓggʷaġ‑wayyur kullut zund idammn.

¹³ ḍrn‑d itran zġ‑ignwan s‑wakal ġmklli‑d‑itluḥ‑waḍu iqurayn zġ‑wazar.

¹⁴ ittin ignwan, muttln zund kra n‑warra imuttln f‑iɛmad‑ns, ityattay kullu ma‑igan adrar d‑igzir zġ‑illiġ illa.

¹⁵ rwln igldan n‑ddunit d‑inmġurn n‑tmizar d‑inmġurn l‑lɛskr, rwln ayt‑wayda d‑ayt‑ssulṭa, ntni ula kullu mddn ismgan ula ġwilli ganin win ih̬f‑nsn, rgsn ġ‑ifran ula ġ‑gr ijarifn n‑idrarn.

¹⁶ ar‑aqran i‑idrarn d‑ijarifn ar‑asn‑ttinin: «ḍrad‑d fllannġ tssntalm‑aġ zġ‑uwdm n‑walli iskiwsn f‑lɛrš ula zġ‑lġaḍab n‑ulqqaġ.

¹⁷ ašku ilkm‑d‑wass lli‑bahra‑išqan ig ass l‑lġaḍab‑nsn. ma‑ra‑yiẓḍar a‑gis‑ibidd?»