anurẓm 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

arra lli‑iqqnn s‑ssa n‑ṭṭwabɛ

¹ ẓrġ ilmma yan‑warra imuttln ġ‑ufus afasi n‑walli iskiwsn f‑lɛrš, ityara zġ‑snat‑tsgiw, iqqn s‑ssa n‑ṭṭwabɛ.

² ẓrġ‑n yal‑lmalak itjhhdn yull awal‑ns yini: «ma‑isthllan a‑irẓm arra‑yad, ifsi ṭṭwabɛ lli‑fllas‑illan?»

³ walaynni ur‑illi yan ġ‑ignna ula ġ‑wakal ula ġ‑ddu‑wakal iẓḍarn a‑irẓm arra‑yan ula issmaqql gis.

⁴ ar‑allaġ bahra ašku ur‑ityafa yan isthllan a‑irẓm arra‑yan ula a‑gis‑issmaqql.

⁵ ġakudan isawl‑d sri yan zġ‑imġarn yini‑yyi‑d: «ad‑ur‑tallat. hay‑izm n‑tqbilt n‑yahuda, hay‑aẓur n‑ugllid dawd, nttan a‑inran, yiẓḍar a‑ifsi ssa n‑ṭṭwabɛ‑ad, irẓm arra.»

alqqaġ lli‑isthllan

⁶ ẓrġ ilmma yan‑ulqqaġ, ibidd ġ‑dar lɛrš ġ‑gr kkuẓṭ lmh̬luqat, lullin‑as imġarn. irwas is‑ityawġras, iṭṭaf ssa n‑taskiwin d‑ssa n‑walln, a‑tn‑igan d‑ssa l‑larwaḥ n‑rbbi lli‑yuzn ad‑kn kullu ddunit.

⁷ yasi‑d‑ulqqaġ arra‑yan zġ‑ufus afasi n‑walli iskiwsn f‑lɛrš.

⁸ lliġ‑d‑yusi arra, ḍrnt‑n kkuẓṭ lmh̬luqat ula sin id‑mraw d‑kkuẓ (24) n‑umġar ġ‑lgddam n‑ulqqaġ. kraygatt yan yusi lutar, asin ula taṭṭasin n‑uwrġ ɛmmrnin s‑lbh̬ur lli‑igan tiẓulla n‑imẓlayn n‑rbbi.

⁹ ar‑ttirirn yan‑umarg l‑ljdid ar‑ttinin: «kiyi a‑isthllan a‑tasit arra‑yad tfsit ṭṭwabɛ‑ns, ašku ttyawġrast tfrut mddn s‑idammn‑nnk zġ‑kraygatt taqbilt ula kraygatt l‑luġa ula kraygatt tasut ula kraygatt tamazirt, trart‑tn ad‑gn kullu win rbbi.

¹⁰ tskrt zġ‑gisn ayt‑tgldit n‑rbbi‑nnġ f‑a‑n‑srasn ġ‑lgddam‑ns tiwafkiw ma‑s‑a‑itrḍu. d‑ntni a‑ra‑iḥkam ġ‑ddunit.»

¹¹ ssmaqqlġ‑n‑daġ s‑sfldġ i‑waqqur n‑wafḍan n‑wafḍan d‑id‑walf n‑id‑walf l‑lmalayka, sutln i‑lɛrš d‑lmh̬luqat d‑imġarn.

¹² ar‑ttinin s‑wawal itjhhdn: «isthlla‑ulqqaġ lli‑ityawġrasn a‑yamẓ lḥukm d‑lh̬ir d‑tḥkimt d‑tẓḍḍart d‑ttuqir d‑lmjd d‑lḥmd.»

¹³ sfldġ ġakudan i‑kullu ma‑ih̬lq rbbi ġ‑ignna ula ġ‑wakal ula ġ‑ddu‑wakal ula ġ‑umda, sfldġ i‑kullu ma‑iddrn ġ‑kraygatt mani ar‑ttinin: «a‑yili lḥmd d‑ttuqir d‑lmjd d‑lquwwa i‑walli iskiwsn f‑lɛrš ula i‑ulqqaġ, ġilad ula kullu mayd‑d‑iftan.»

¹⁴ inint kkuẓṭ lmh̬luqat: «amin.» ḍrn‑in imġarn sjdn‑as.