anurẓm 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lɛrš n‑rbbi

¹ ẓrġ ilmma kra yaḍni, yan‑imi irẓm ġ‑ignna. sfldġ i‑wawal lli‑sttin‑ikkan isawl‑d sri, iga zund nnffar, yini‑yyi: «ġli‑d s‑ġid ad‑ak‑mlġ ma‑d‑iqqann a‑ijru tigira.»

² yawi‑yyi rruḥ lqudus ġakudan, s‑ẓriġ yal‑lɛrš ġ‑ignna, ẓrġ ula ġwalli fllas iskiwsn.

³ ġwalli iskiwsn f‑lɛrš, ar‑zgis‑kkatn lalwan n‑uẓggʷaġ d‑uqrfi tili‑tslit n‑unẓar tsutl i‑lɛrš, ar‑ttisfiw s‑tifawt tazgzawt.

⁴ ẓrġ sin id‑mraw d‑kkuẓ (24) l‑lɛrš lullin i‑lɛrš‑an, skiwsn fllasn sin id‑mraw d‑kkuẓ (24) n‑umġar, lsn timlsa tumlilin. kud yan, illa f‑ih̬f‑ns yan‑ttaj n‑uwrġ.

⁵ ar‑d‑kkatn‑uwsmann zġ‑dar lɛrš, yigat‑uqqryan n‑iggig. ar‑ssufun ssa n‑isufa ġ‑lgddam l‑lɛrš, a‑tn‑igan d‑ssa l‑larwaḥ n‑rbbi.

⁶ yili ula ġ‑lgddam l‑lɛrš kra irwas yat‑tmda n‑jjaj iṣfan zund adfl. ẓrġ kkuẓṭ lmh̬luqat ddrnin, lullint i‑lɛrš, kraygatt yat ġ‑tsga. ggutnt‑gisnt‑walln, lan‑tnt zġ‑lgddam ula tiġurdin.

⁷ tamzwarut trwas izm. tis snat trwas azgr. tis kraṭṭ, irwas‑uwdm‑ns udm n‑urgaz. tis kkuẓṭ trwas igidr yuyln.

⁸ kraygatt yat ġ‑lmh̬luqat‑an teṭṭaf sḍiṣ ifrawn, igatnt‑gisnt‑walln zġ‑kraygatt mani. ar‑ttirirnt ġ‑iyḍ ula azal bla‑da‑tfssant ar‑ttinint: «amẓlay, amẓlay, amẓlay a‑iga sidi rbbi lli‑iḥkamn kullu ma‑illan. ikka‑ttin illa, yili, rad‑bdda‑yili.»

⁹ kullu mad‑kkant ar‑talġnt ar‑tmjjadnt ar‑tḥmadnt ġwalli iskiwsn f‑lɛrš, ig ġwalli bdda illan rad‑bdda‑yili.

¹⁰ ar‑n‑ṭṭarn sin id‑mraw d‑kkuẓ n‑umġar ġ‑lgddam n‑walli iskiwsn f‑lɛrš, sjdn i‑walli bdda illan rad‑bdda‑yili, ar‑n‑tluḥn ttaj‑nsn ġ‑lgddam l‑lɛrš ar‑ttinin:

¹¹ «wa‑rbbi siditnnġ, kiyi a‑isthllan lmjd d‑ttuqir d‑lḥukm, ašku kiyi a‑ih̬lqn kullu ma‑illan. hati ityawh̬laq yili, ašku kiyi a‑t‑iran.»