anurẓm 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tabrat i‑umnaggar ġ‑sardis

¹ «ara awal‑ad i‑lmalak n‑umnaggar ġ‑tmdint n‑sardis: ha‑ma‑inna ġwalli dar ssa l‑larwaḥ n‑rbbi ula ssa n‑itran. ssnġ kullu ma‑tskart. ar‑ttinin mddn is‑tddrt walaynni tmmutt.

² rar lɛaql tssdust ma‑gik‑iqaman ur‑ta‑immut. ufiġ‑n maylli tskart ur‑ta‑ikmmil ġ‑iẓri n‑rbbi‑nu.

³ swangm‑d ma‑tlmdt ula maylli mi‑tsfldt ġayd izrin. skar srs, twrrid‑d zġ‑ddnub‑nnk. iġ‑ur‑trurt lɛaql, hati ra‑n‑srk‑aškġ zund amh̬h̬ar, ur‑ra‑tissant man tasaɛt ġ‑ra‑k‑in‑lkmġ.

⁴ walaynni llan sul dark ġ‑sardis kra n‑mddn drusnin lli‑ur‑ssrkinin timlsa‑nsn. ntni a‑ra‑didi‑imun s‑tmlsa tumlilin, ašku ntni a‑isthllan.

⁵ kullu wanna inran, ra‑ils ula ntta timlsit tumlilt. rad‑addrġ ism‑ns ġ‑dar baba rbbi ula lmalayka‑ns, iniġ fllas izd winu a‑iga. ur‑sar‑kkisġ ism‑ns zġ‑warra n‑tudrt.

⁶ wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn.

tabrat i‑umnaggar ġ‑filadalfya

⁷ «ara awal‑ad i‑lmalak n‑umnaggar ġ‑tmdint n‑filadalfya: ha‑ma‑inna ġwalli igan amẓlay ig lḥqq, iṭṭaf tasarut n‑ugllid dawd. aynna rẓmġ nkki, ur‑iẓḍar yan a‑t‑iqqn. d‑aynna qqnġ, ur‑iẓḍar yan a‑t‑irẓm.

⁸ ssnġ kullu ma‑tskart. hati rẓmġ yan‑imi ġ‑lgddam‑nnk, ur‑ra‑yiẓḍar yan a‑t‑iqqn. ssnġ is‑ur‑tẓḍart i‑ma‑iggutn walaynni tumẓt ġ‑wawal‑inu, ur‑tnnit ur‑iyi‑tssint.

⁹ imma mddn‑an n‑ayt‑tgmmi n‑tẓallit n‑šiṭan, ar‑sskirkisn ar‑ttinin izd ayt‑yudaya ad‑gan walaynni ur‑akkʷ‑gin ayt‑yudaya. ra‑tn‑d‑awiġ ad‑knun s‑wakal ġ‑dar iḍarn‑nnk, baš ad‑issann izd kiyi a‑dari‑iɛzzan.

¹⁰ hati tṣbrt tzgat ġmklli‑k‑uṣṣaġ. f‑mayan a‑f‑ra‑k‑ssntalġ ġ‑tasaɛt n‑tnukmut lli‑ra‑izri f‑ddunit a‑tarm kullu willi gis zdġnin.

¹¹ ġir imikk ra‑n‑aškġ. amẓ ġ‑ma‑dark‑illan, a‑ur‑tadjt yan ad‑ak‑yakʷr ttaj‑nnk.

¹² kullu wanna inran, ra‑t‑gġ d‑tannalt ġ‑tgmmi n‑rbbi‑nu, ur‑sar‑tt‑iffuġ. ra‑fllas‑araġ ism n‑rbbi‑nu d‑ism n‑tmdint n‑rbbi‑nu, a‑stt‑igan d‑urušalim l‑ljdid lli‑ra‑d‑igguz zġ‑ignna zġ‑dar rbbi‑nu, araġ fllas ula ism‑inu l‑ljdid.

¹³ wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn.

tabrat i‑umnaggar ġ‑lawdikiyya

¹⁴ «ara awal‑ad i‑lmalak n‑umnaggar ġ‑tmdint n‑lawdikiyya: ha‑ma‑inna ġwalli igan ‹amin› ig inigi iṣḥan izgan, izwur kullu ma‑ih̬lq rbbi.

¹⁵ ssnġ kullu ma‑tskart. ssnġ is‑ur‑tsmmiṭṭ ula trġit. amar yufan ġir a‑tsmmiṭṭ nġd a‑trġt.

¹⁶ walaynni tulbit, ur‑tsmmiṭṭ ula trġit. ġayan a‑f‑ra‑k‑ssufsġ zġ‑imi‑nu.

¹⁷ ha‑kiyi ar‑ttinit «labas gigi. iggut dari lh̬ir. ur‑ḥtajjaġ yat.» walaynni ur‑akkʷ‑tssint mamnk a‑tḍɛft thršt tẓlḍt tbukḍt tqamat bla timlsit.

¹⁸ rad‑ak‑iniġ yuf‑ak a‑zġ‑dari‑tsġt urġ lli‑iṣfan s‑lɛafit f‑a‑dark‑nnit‑yili lh̬ir. tsġt zġ‑dari ula timlsa tumlilin f‑a‑tlst tdlt lɛib n‑ddat‑nnk. tsġt zġ‑dari ula asafar i‑walln‑nnk f‑a‑tisfiwt.

¹⁹ winna dari ɛzzanin ar‑tn‑tẓiġ ar‑tn‑trbbaġ. awi‑tt ġ‑ih̬f‑nnk ġilad, twrrid‑d zġ‑ddnub‑nnk.

²⁰ ha‑yyi biddġ ġ‑imi ar‑ssḍuqqurġ. iġ‑illa ma‑isfldn i‑wawal‑inu irẓm‑iyi, ra‑dars‑kšmġ ššġ dids išš didi.

²¹ kullu wanna inran, rad‑as‑fkġ a‑didi‑iskiws f‑lɛrš‑inu ġmklli nriġ nkki skiwsġ d‑baba rbbi f‑lɛrš‑ns.

²² wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn.»