anurẓm 22 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ iml‑iyi ilmma lmalak asif n‑waman n‑tudrt. ar‑issmrqiqiy zund adfl iṣfan, iffi‑d zġ‑dar lɛrš n‑rbbi d‑ulqqaġ,

² iftu ġ‑wammas n‑usuk n‑tmdint. yili‑usġar n‑tudrt ġ‑snat‑tsgiw n‑wasif. ar‑yakka lġllt‑ns kraygatt ayyur, snat d‑mrawt‑twal ġ‑usggʷas. gn ifrawn‑ns asafar ma‑s‑a‑tjjin mddn zġ‑kullu timizar n‑ddunit,

³ ur‑sar‑ra‑tili tagat. ġin a‑ġ‑ra‑yili lɛrš n‑rbbi d‑ulqqaġ. ra‑ti‑tɛbadn ih̬ddamn‑ns,

⁴ ar‑tmnadn udm‑ns, ityara ism‑ns f‑ignzi‑nsn.

⁵ ur‑sul‑ra‑yili iḍ, wala ra‑sul‑ḥtajjan tifawt l‑lqnadl ula tin tafukt. ašku sidi rbbi a‑igan tifawt‑nsn, d‑ntni a‑ra‑iḥkam. ur‑ra‑sar‑itmmu lḥukm‑nsn.

ġir imikk ra‑d‑yašk lmasiḥ

⁶ yini‑yyi ilmma lmalak: «ʷġẓann iwaliwn‑ad, lḥqq ad‑gan. sidi rbbi lli‑idḥayn s‑rruḥ‑ns ġwilli sawalnin s‑mad‑asn‑imala, yuzn‑d lmalak‑ns ġilad a‑d‑iml i‑ih̬ddamn‑ns ma‑d‑iqqann a‑ijru ġ‑mayd‑d‑yakmurn.»

⁷ inna yasuɛ: «hati ġir yan imikk ra‑n‑aškġ.» ambarki a‑iga wanna iskarn s‑iwaliwn lli‑d‑issbayyn rbbi ġ‑warra‑yad.

⁸ nkki yuḥanna sfldġ i‑tġawsiwin‑ad ẓrġ‑tnt. lliġ izri kullu mayd mi sfldġ ẓrġ‑t, ḍrġ‑n ad‑sjdġ ġ‑dar iḍarn l‑lmalak lli‑yyi‑tnt‑imlan,

⁹ s‑iyi‑inna: «a‑ur‑tskrt ġmkan, ašku ah̬ddam kad‑giġ, zund kiyi d‑aytmak lanbiya ula kullu willi skarnin s‑iwaliwn n‑warra‑yad. rbbi waḥdut a‑ttɛbadt.»

¹⁰ izayd yini‑yyi: «iwaliwn n‑warra‑yad lli‑ak‑issbayyn rbbi, a‑tn‑ur‑tqqnt s‑ṭṭabɛ tḥḍut‑tn. ašku yakmur‑d‑uzmz lli‑ġ‑rad‑kullu‑ijru mayd ityaran.

¹¹ wanna iskarn ma‑yʷh̬šnn, ra‑iqama ġ‑ma‑yʷh̬šnn. wanna iskarn ma‑issrkawn, ra‑iqama ġ‑ma‑issrkawn. wanna iskarn afulki, ra‑iqama ġ‑ufulki. wanna irḍan rbbi, ra‑iqama ġ‑ma‑irḍan rbbi.»

¹² inna yasuɛ: «hati ġir yan imikk ra‑n‑aškġ, fkġ i‑kullu mddn mad‑sthllan, rarġ i‑kraygatt yan f‑ma‑iskr.

¹³ giġ amzwaru gġ amggʷaru. gġ ġwalli izwarn gġ ġwalli iggʷran. gġ isizwar gġ isiggʷra.»

¹⁴ imbarkin ad‑gan ġwilli sirdnin timlsa‑nsn ad‑asn‑yili lḥqq ad‑kšmn zġ‑imawn n‑tmdint ššn zġ‑usġar n‑tudrt.

¹⁵ imma ġwilli rkanin ra‑n‑qaman ġ‑brra. gan‑tn ġwilli skarnin ssiḥr d‑willi tfsadnin d‑willi nqqanin d‑willi tɛbadnin ilahat n‑ddunit, ntni ula kullu willi sskirkisnin ar‑tfraḥn s‑tkrkas.

¹⁶ «nkki yasuɛ uznġ‑awn‑in lmalak‑inu a‑iml tiġawsiwin‑ad i‑imnaggarn n‑aytmatn. giġ aẓur n‑dawd gġ agʷlas‑ns. gġ itri lli‑isfawn zikk ṣṣbaḥ.»

¹⁷ isawl‑d rruḥ n‑rbbi ula taslit inin‑as: «ašk‑id.» wanna isfldn, illa fllas a‑yini: «ašk‑id.» d‑wanna yaġ irifi, iẓḍar a‑d‑yašk, isu zġ‑waman n‑tudrt, kullu wanna iran bla ifka yat.

¹⁸ awiyat‑stt ġ‑ma‑rad‑iniġ i‑kullu wanna isfldn i‑iwaliwn lli‑d‑issbayyn rbbi ġ‑warra‑yad: iġ‑idda yan ard‑asn‑izayd kra, rad‑as‑izayd rbbi kullu tiguḍiwin lli‑ibdr ġ‑warra‑yad.

¹⁹ iġ‑idda yan ard ikkis kra zġ‑iwaliwn lli‑d‑issbayyn rbbi ġ‑warra‑yad, rad‑as‑ikkis taġamt n‑usġar n‑tudrt ula ġ‑tmdint tamẓlayt lli‑ibdr ġ‑warra‑yad.

²⁰ isawl ġwalli‑d‑issbayynn tiġawsiwin‑ad yini: «lḥqq ayad. ġir imikk ra‑n‑aškġ.» amin. ašk‑id a‑siditnnġ yasuɛ.

²¹ a‑tili lbaraka n‑siditnnġ yasuɛ i‑imẓlayn n‑rbbi kullutn. amin.