anurẓm 21 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ignna l‑ljdid ula akal l‑ljdid

¹ ẓrġ ilmma ignna l‑ljdid d‑wakal l‑ljdid. ur‑sul‑qaman ignwan iqdimn ula ikalln iqdimn, laḥ ula amda.

² ẓrġ tamdint tamẓlayt, a‑stt‑igan d‑urušalim l‑ljdid, tgguz‑d zġ‑ignna zġ‑dar rbbi. tfulki bahra zund yat‑tslit ilsan timlsit n‑tmġra, tujad a‑tmnaggar asli‑ns.

³ sfldġ i‑yan‑wawal itjhhdn isawl‑d zġ‑dar lɛrš yini: «hati ġ‑gr bnadm a‑ġ‑ra‑tili‑tzdġt n‑rbbi, izdġ ġilad ġ‑wammas‑nsn, gn ayt‑dars. rbbi rad‑didsn‑yili, ig rbbi‑nsn.

⁴ ra‑isfiḍ kullu imṭṭawn‑nsn. ur‑sul‑ra‑tili lmut ula taguḍi ula tiġwiyya ula aṭṭan, ašku ddunit taqdimt ur‑sul‑tqama.»

⁵ isawl‑d ġwalli iskiwsn f‑lɛrš yini: «skrġ kullu ġilad zġ‑ljdid.» yini‑yyi‑daġ: «ara mayad. ašku ʷġẓann iwaliwn‑ad, lḥqq ad‑gan.»

⁶ izayd yini‑yyi: «hati ikmml. nkki giġ amzwaru gġ amggʷaru. gġ isizwar gġ isiggʷra. wanna yaġ irifi, ra‑t‑ssuġ zġ‑talɛint n‑waman n‑tudrt bla gis ifka yat.

⁷ imma wanna inran, rad‑as‑fkġ lwrt‑ad: rad‑gġ rbbi‑ns, ig ntta iwi.

⁸ imma ġwilli rwlnin zġ‑lḥqq wrrin zġ‑uġaras‑inu ssrkan ih̬fawn‑nsn ar‑nqqan ar‑tfsadn ar‑skarn ssiḥr ar‑tɛbadn ilahat n‑ddunit, rad‑ftun ntni d‑kullu ayt‑tkrkas s‑udġar‑nsn ġ‑tmda lli‑ijddrn s‑lɛafit d‑lkbrit. ġmkad a‑ra‑tg lmut tis snat.»

urušalim l‑ljdid

⁹ yašk‑id ilmma yan zġ‑ssa l‑lmalayka lli‑usinin ssa n‑taṭṭasin lli‑ɛmmrnin s‑ssa n‑tguḍiwin ggʷranin. isawl‑d sri yini‑yyi: «ašk‑id mlġ‑ak taslit lli‑igan tamġart n‑ulqqaġ.»

¹⁰ yawi‑yyi s‑tḥkimt n‑rruḥ ar iggi n‑yan‑udrar imqqurn yattuyn, iml‑iyi‑d tamdint tamẓlayt n‑‹urušalim› tgguz‑d zġ‑ignna zġ‑dar rbbi.

¹¹ ar‑tssmrqiqiy s‑lmjd n‑rbbi zund yat‑tẓrut taqrfit iʷġlan bahra, ula zund adfl iṣfan.

¹² ilulli‑as yan‑uġʷrab imqqurn yattuyn, ila sin d‑mraw n‑imi. biddn ġin sin d‑mraw l‑lmalak ġ‑lgddam n‑imawn. kraygatt imi ityara gis ism n‑tqbilt zġ‑snat d‑mrawt n‑tqbilt n‑ayt‑rbbi.

¹³ llan kraḍ imawn ġ‑tsga lli‑zġ‑a‑taqlay tafukt, ilin kraḍ imawn ġ‑tsga taẓlmaṭṭ, ilin kraḍ imawn ġ‑tsga tafasit, ilin kraḍ imawn ġ‑tsga lli‑ġ‑a‑n‑teṭṭar tafukt.

¹⁴ llan sin d‑mraw n‑uẓru ġ‑llsas n‑uġʷrab n‑tmdint, tyaran gisn ismawn n‑sin d‑mraw n‑urqqas n‑ulqqaġ.

¹⁵ lmalak lli‑d‑sri‑isawln, illa dars yan‑uɛmud n‑uwrġ ma‑s‑a‑issġal, yiri a‑srs‑issġl tamdint d‑imawn‑ns d‑uġʷrab‑ns.

¹⁶ tngadda‑tġzi n‑tmdint zġ‑kkuẓṭ‑tsgiw. iddu lmalak issġl tamdint s‑uɛmud‑ns. sin id‑walf d‑sin id‑miyya (2200) n‑kilimitr a‑illan ġ‑kraygatt tasga ula ġ‑tiddi‑ns.

¹⁷ issġl ula aġʷrab lli‑as‑isutln. ssa n‑id‑mraw d‑sin (72) mitru a‑ġ‑n‑tlla tiddi‑ns s‑mklli‑s‑a‑ssġaln mddn.

¹⁸ ityawbna‑uġʷrab‑ns s‑iẓran iqrfin ġʷlanin. ttyawskar‑tmdint zġ‑uwrġ bahra iṣfan, tfaw zund jjaj.

¹⁹ ityawskar llsas n‑uġʷrab n‑tmdint zġ‑kigan d‑iẓran ġʷlanin. amzwaru iga aqrfi, wis sin iga aẓrqi, wis kraḍ iga aqhawi, wis kkuẓ iga azgzaw,

²⁰ wis smmus iga abrar, wis sḍiṣ iga aẓggʷaġ, wis ssa iga ašibi, wis tam iga umlil, wis tẓa iga awraġ, wis mraw iga ah̬ršufi, wis yan d‑mraw iga amšmaši, wis sin d‑mraw iga iḍili.

²¹ imma imawn‑an s‑sin d‑mraw gan sin d‑mraw l‑ljuhr, kraygatt imi iga taljuhrt. imma asuk n‑tmdint iga win‑uwrġ iṣfan, ifaw zund jjaj.

²² ur‑ẓriġ kra n‑tgmmi ġ‑a‑tɛbadn mddn ġ‑tmdint, ašku ar‑gis‑tɛbadn sidi rbbi lli‑iḥkamn kullu ma‑illan, nttan d‑ulqqaġ, ġ‑illiġ llan ntni.

²³ ur‑tḥtajja‑tmdint ad‑as‑ttisfiw tafukt ula ayyur, ašku lmjd n‑rbbi iga tifawt‑ns, ig‑ulqqaġ lqndil‑ns.

²⁴ s‑tifawt n‑tmdint a‑s‑ra‑ttidun ayt‑tmizar kullutn, rad‑as‑d‑awin igldan n‑ddunit tirzzifin l‑lmjd‑nsn.

²⁵ ur‑sar‑qqinn imawn n‑tmdint ġ‑uzal, ula sar illa iḍ.

²⁶ tirzzifin ula timih̬ar a‑rad‑as‑d‑awin zġ‑kullu timizar n‑ddunit.

²⁷ walaynni ur‑ra‑srs‑ikšm ma‑ijlh̬n ula ma‑issrkawn ula ma‑isskirkisn. ur‑ra‑srs‑ikšm abla ġwilli mi tyaran ismawn‑nsn ġ‑warra n‑tudrt n‑ulqqaġ.