anurẓm 20 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

alf n‑usggʷas

¹ ẓrġ ilmma yal‑lmalak igguz‑d zġ‑ignna, yusi tasarut n‑tdrut n‑wakal, tili ġ‑ufus‑ns yat‑ssnslt imqqurn.

² yamẓ algmmaḍ lli‑mi‑ttinin ‹abnkal aqdim› ula ‹iblis› ula ‹šiṭan›, ikrs‑t baš a‑iqama ġ‑iskraf alf n‑usggʷas.

³ iluḥ‑t‑in ġ‑tdrut n‑wakal, iqqn‑n fllas imi n‑tdrut, iskr‑as ṭṭabɛ baš a‑ur‑sul‑ijllu timizar n‑ddunit ard izri‑walf n‑usggʷas. tigira n‑mayan ra‑d‑iqqan a‑inurẓm zġ‑iskraf yat luqt idrusn.

⁴ ẓrġ ilmma kra l‑lɛruš ġ‑ignna. ityawfka i‑willi fllasn skiwsnin lḥqq ad‑tḥkamn. ẓrġ larwaḥ n‑willi mi ityawbbay ih̬f‑nsn f‑ssibt n‑tugga‑nsn f‑yasuɛ ula f‑wawal n‑rbbi. ur‑a‑tɛbadn aġʷẓn ula ṣṣurt‑ns, ula qbln ṭṭabɛ‑ns f‑ignzi‑nsn ula f‑ufus‑nsn. nkrn ntni zġ‑lmut ar‑tḥkamn d‑lmasiḥ alf n‑usggʷas.

⁵ ġmkad a‑tga‑tnkra tamzwarut. imma wiyyaḍ sul qaman ġ‑lmut, ur‑rad‑nkrn ard izri‑walf n‑usggʷas.

⁶ imbarkin d‑imẓlayn ad‑gan ġwilli‑d‑nkrnin ġ‑tnkra tamzwarut. ur‑ra‑tiẓḍar lmut tis snat a‑tn‑tlkm. rad‑gn inmġurn n‑rbbi d‑lmasiḥ, ra‑dids‑ḥkamn alf n‑usggʷas.

lhalak n‑iblis

⁷ ġakud nna‑ikmml‑walf n‑usggʷas ra‑ityawfsay šiṭan zġ‑iskraf‑ns,

⁸ iffuġ‑d a‑ijlu kullu timizar n‑ddunit, issmun imzdġn‑nsnt i‑imiġ. ntni ‹gug› ula ‹magug› ad‑gan, igatn zund amlal n‑tama n‑umda,

⁹ ar‑zziggizn ard kn ddunit kullutt, sutln i‑untal n‑imẓlayn n‑rbbi a‑t‑igan d‑tmdint lli‑dars‑iɛzzan. imil tḍr‑d fllasn lɛafit zġ‑ignna thlk‑tn.

¹⁰ ittluḥ‑n iblis lli‑tn‑ijlan ġ‑tmda l‑lɛafit d‑lkbrit lli‑ġ‑illa‑waġʷẓn d‑nnabi bu‑tkrkas. rad‑kullu‑ġin‑trfufunn ġ‑iyḍ ula azal s‑urfufn ur‑sar‑itmmin.

arratn l‑lḥukm ula lmut tis snat

¹¹ ẓrġ ilmma yal‑lɛrš imqqurn imlluln, ẓrġ ula ġwalli fllas iskiwsn. lliġ‑d‑iban ntta, rwln zġ‑gis ignwan d‑wakal, laḥ‑tn kullu.

¹² s‑ẓriġ ġwilli mmutnin, ma‑imqqurn ula ma‑imẓẓin, biddn kullu ġ‑lgddam l‑lɛrš. tyawrẓamn kra n‑warratn ġakudan, s‑ityawrẓam yan‑warra yaḍni igan arra n‑tudrt. yut rbbi lḥukm ġakudan f‑willi mmutnin, irar‑asn f‑ġaylli skrn ġmklli ityaran ġ‑warratn.

¹³ idḥi‑d‑umda kullu willi gis mmutnin, tdḥi‑d lmut d‑udġar l‑lmut kullu willi gis llanin, iḥkam rbbi fllasn kullutn f‑ġaylli skrn.

¹⁴ tettluḥ‑n ilmma lmut d‑udġar l‑lmut ġ‑tmda l‑lɛafit. lmut tis snat a‑tga‑tmda l‑lɛafit.

¹⁵ wanna mi ur‑ityara ism‑ns ġ‑warra n‑tudrt, ittluḥ‑n ġ‑tmda l‑lɛafit.