anurẓm 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tabrat i‑umnaggar ġ‑afsus

¹ «ara awal‑ad i‑lmalak n‑umnaggar ġ‑tmdint n‑afsus: ha‑ma‑inna wad yusin ssa n‑itran ġ‑ufus‑ns afasi ar‑ittidu ġ‑gr ssa l‑lḥsaki n‑uwrġ.

² ssnġ kullu ma‑tskart ula mamnk a‑ttnhataft tṣbrt. ssnġ mamnk a‑tngarat d‑mddn ʷh̬šnnin, tarmt ula ġwilli ittinin izd irqqasn ad‑gan, taft‑tn‑in is‑a‑sskirkisn ur‑gin irqqasn.

³ ssnġ is‑tzgat tṣbrt i‑tnukmut f‑ssibt n‑ism‑inu bla‑da‑ttrmayt.

⁴ «walaynni illa sul dari kra fllak: ur‑sul‑a‑yyi‑ttirit ġunšk lli‑s‑a‑yyi‑ttirit ġ‑isizwar.

⁵ swangm‑d manizġ‑n‑tḍrt. wrri‑d zġ‑ddnub‑nnk ar‑tskart ġmklli tskart ġ‑isizwar. iġ‑ur‑di‑twrrit zġ‑ddnub‑nnk, ra‑n‑srk‑aškġ ssittiġ‑ak lḥska‑nnk zġ‑udġar‑ns.

⁶ walaynni sul gik iqama ma‑ifulkin, ašku ar‑ttkrhut iskkirn n‑mddn‑an n‑nikulawin ġmklli‑tn‑tkrhuġ nkki.

⁷ wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn. kullu wanna inran, rad‑as‑fkġ a‑išš zġ‑lġllt n‑usġar n‑tudrt lli‑illan ġ‑talɛrṣt l‑lmjd n‑rbbi.

tabrat i‑umnaggar ġ‑smirna

⁸ «ara awal‑ad i‑lmalak n‑umnaggar ġ‑tmdint n‑smirna: ha‑ma‑inna ġwalli igan amzwaru ig amggʷaru, immt iwrri iddr.

⁹ ssnġ mamnk a‑tzrit ġ‑tassast ar‑ttẓlaṭṭ, walaynni s‑ṣṣaḥt lh̬ir iggutn ad‑ak‑illan. ssnġ is‑a‑gik‑rggmn ġwilli ittinin is‑gan ayt‑yudaya walaynni ur‑gin ayt‑yudaya. hati ayt‑tgmmi n‑tẓallit n‑šiṭan ad‑gan.

¹⁰ imma ġilad, ad‑ur‑tiksaṭṭ tanukmut lli‑ra‑fllak‑izri. hati ra‑k‑yarm iblis iluḥ‑n kra gigun ġ‑lḥbs. ra‑trfufnt mraw‑uwssan. zga ġ‑uġaras‑inu ar lmut, fkġ‑ak ttaj n‑tudrt.

¹¹ wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn. kullu wanna inran, ur‑akkʷ‑ra‑ti‑tlkm lmut tis snat.

tabrat i‑umnaggar ġ‑bargamus

¹² «ara awal‑ad i‑lmalak n‑umnaggar ġ‑tmdint n‑bargamus: ha‑ma‑inna ġwalli dar taẓẓit imsadn zġ‑snat‑tsgiw.

¹³ ssnġ maniġ tzdġt izd illiġ illa lɛrš n‑šiṭan. tġwit‑bdda ġ‑ism‑inu, ur‑akkʷ‑twrrit zġ‑uġaras‑inu. tamẓt gigi ula ġ‑uwssan lli‑ġ‑nġan inigi‑nu izgan antibas ġin ġ‑izdġ šiṭan.

¹⁴ «walaynni llant sul dari kra n‑tġawsiwin fllak. llan ġ‑gratun kra n‑mddn umẓn almmud n‑balɛam lli‑imlan i‑ugllid balaq mamnk a‑ijllu ayt‑rbbi, aylliġ a‑šttan ma‑ityawġrasn i‑laṣnam ar‑tfsadn.

¹⁵ ilin‑daġ ġ‑gratun kra n‑mddn umẓn almmud n‑nikulawin.

¹⁶ f‑mayan a‑f‑rad‑ak‑iniġ: wrri‑d zġ‑ddnub‑nnk. iġ‑ur‑di‑twrrit ra‑n‑srk‑aškġ ġ‑mayd‑d‑yakmurn, mmaġġ d‑mddn‑an s‑taẓẓit n‑imi‑nu.

¹⁷ wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn. kullu wanna inran, rad‑as‑fkġ zġ‑uġrum intln lli‑mi‑ttinin ‹manna›. fkġ‑as ula yan‑uẓru umlil, ityara gis yan‑ism l‑ljdid ur‑t‑issin yan abla ġwalli mi ityawfka.

tabrat i‑umnaggar ġ‑tyatira

¹⁸ «ara awal‑ad i‑lmalak n‑umnaggar ġ‑tmdint n‑tyatira: ha‑ma‑inna yus n‑rbbi lli‑mi‑ssufunt‑walln zund isufa l‑lɛafit, ar‑ssmrqiqiyn iḍarn‑ns zund anas ityawmzayn s‑ssql.

¹⁹ ssnġ kullu ma‑tskart ula mamnk a‑yyi‑ttirit, tzgat ġ‑uġaras‑inu ar‑tskart tawuri‑nu bahra, ar‑ttṣbart ġ‑tnukmut nna‑fllak‑izrin. ssnġ is‑a‑tskart ġilad uggʷar n‑maylli tskart ġ‑isizwar.

²⁰ «walaynni illa sul dari kra fllak. ur‑a‑tssfssat tamġart‑an ‹izabil› lli‑ittinin is‑a‑tsawal s‑iwaliwn n‑rbbi. nttat ar‑bahra‑tjllu ih̬ddamn‑inu s‑ulmmud‑ns ar‑tn‑ttrara ad‑fsadn ar‑šttan ma‑ityawġrasn i‑laṣnam.

²¹ fkiġ‑as amhal a‑tfl ddnub‑ns, walaynni ur‑tri a‑di‑twrri zġ‑lfsad lli‑tskar.

²² han ra‑stt‑in‑luḥġ f‑tisi n‑waṭṭan a‑gis‑taḍn nttat d‑willi dids tfsadnin. ġmkad a‑rad‑asn‑skrġ iġ‑ur‑d‑wrrin zġ‑iskkirn‑ns.

²³ rad‑utġ tarwa‑ns s‑lmut. ġakudan a‑rad‑ẓrn ayt‑imnaggarn kullutn is‑giġ wad issnn kullu mad‑swingimn mddn ula ma‑ttirin ġ‑uwl‑nsn. rad‑rarġ i‑kraygatt yan gigun f‑ma‑iskr.

²⁴ «imma wiyyaḍ ġ‑tyatira lli‑ur‑umẓnin almmud‑an ula lmdn ma‑mi‑ttinin ‹tiġawsiwin ntlnin n‑šiṭan›, ur‑ra‑n‑fllawn‑zaydġ kra n‑taẓayt yaḍni.

²⁵ ġir amẓat ġ‑ma‑darun‑illan ard‑n‑aškġ.

^26-27 kullu wanna inran ar‑iskar mad‑riġ ar isiggʷra, rad‑as‑fkġ taẓḍḍart f‑tmizar n‑ddunit ġmklli‑yyi‑ifka baba rbbi. ra‑tnt‑iḥkam s‑uɛmud n‑uwzzal, irẓ‑tnt zund irukutn n‑idqqi.

²⁸ rad‑as‑fkġ itri lli‑ifawn zikk ṣbaḥ.

²⁹ wanna dar imzgan, iqqan‑t‑id a‑isfld i‑mayd ittini rruḥ lqudus i‑imnaggarn.