anurẓm 19 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tamġra n‑ulqqaġ

¹ lliġ izri mayan sfldġ i‑kra itjhhdn irwas‑iyi taqqurt n‑mddn ggutnin ġ‑ignna, ulln awal‑nsn ar‑ttinin: «halliluya, rbbi‑nnġ a‑ijjnjamn, ig bab l‑lmjd d‑lquwwa.

² yʷġẓan lḥukm‑ns, s‑lḥqq a‑s‑a‑itḥkam. yut lɛqubit f‑tmggant imqqurn lli‑issrkan kullu ddunit s‑lfsad‑ns. irar‑as rbbi f‑idammn n‑ih̬ddamn‑ns.»

³ alln‑daġ awal‑nsn ar‑ttinin: «halliluya, ar‑bdda‑yaqlay‑waggu‑ns, ur‑sar‑itmmi.»

⁴ ḍrn‑in ilmma sin id‑mraw d‑kkuẓ (24) n‑umġar d‑kkuẓṭ lmh̬luqat ġ‑lgddam n‑rbbi lli‑iskiwsn f‑lɛrš, sjdn‑as ar‑ttinin: «amin, halliluya.»

⁵ isawl‑d ilmma yan‑wawal zġ‑dar lɛrš yini: «alġat rbbi‑nnġ a‑ih̬ddamn‑ns kullukn lli‑t‑uqqrnin, ġwilli mqqurnin ula ġwilli mẓẓinin.»

⁶ sfldġ ilmma i‑kra irwas‑iyi iwaliwn n‑mddn ggutnin bahra, zund ijjijn n‑isaffn n‑waman ggutnin ula zund aqqryan n‑iggig itjhhdn, ar‑ttinin: «halliluya. rbbi siditnnġ itjhhdn, nttan a‑iḥkamn kullu ma‑illan.

⁷ a‑nfrḥ ġilad, nall awal‑nnġ s‑lfrḥ, nini mnšk a‑bahra‑iggut lmjd‑ns. ašku truḥ‑d‑tmġra n‑ulqqaġ. ha‑taslit‑ns tjjujad ih̬f‑ns,

⁸ ifk‑as rbbi timlsit l‑lkttan išwan iġusn issmrqiqiyn.» lmɛna l‑lkttan tga «ifulkitn lli‑skrn imẓlayn n‑rbbi.»

⁹ yini‑yyi ilmma lmalak: «ara awal‑ad, ‹imbarkin ad‑gan ġwilli mi iġra rbbi ad‑d‑aškin s‑imnsi n‑tmġra n‑ulqqaġ.›» izayd yini‑yyi: «ġwid gan iwaliwn n‑rbbi. lḥqq ad‑gan.»

¹⁰ imma nkki ḍrġ‑n ġ‑dar iḍarn‑ns iriġ ad‑as‑sjdġ, s‑iyi‑inna: «a‑ur‑tskrt ġmkan. ašku ah̬ddam kad‑giġ, zund kiyi d‑aytmak lli‑umẓnin ġ‑tugga n‑yasuɛ. rbbi waḥdut a‑ttɛbadt.» ašku tugga n‑yasuɛ a‑idḥayn ġwilli sawalnin s‑mad‑asn‑imala rbbi.

amnnay f‑wayyis umlil

¹¹ ẓrġ ilmma ignna rẓmn, s‑iyi‑d‑iban yan‑wayyis umlil. amnnay‑ns, ar‑as‑ttinin ‹lḥqq› ula ‹ġwalli izgan ġ‑wawal‑ns›. s‑lḥqq a‑s‑a‑ikkat lḥukm ar‑srs‑itmmaġ.

¹² ar‑d‑ssufunt‑walln‑ns zund isufa l‑lɛafit, ilin f‑ih̬f‑ns ttijan ggutnin. ityara fllas yan‑ism lli‑ur‑issin yan abla nttan.

¹³ immġ‑uqššab‑ns s‑idammn, ig ism‑ns ‹awal n‑rbbi›.

¹⁴ ḍfurn‑t ljyuš n‑ignna, lsn lkttan išwan iġusn imlluln, nin f‑yissan umliln.

¹⁵ iffuġ‑d zġ‑imi‑ns zund yat taẓẓit imsadn. ra‑srs‑yut timizar n‑ddunit. ra‑tnt‑iḥkam s‑uɛmud n‑uwzzal, yaḍḍr aḍil ġ‑lmɛṣṣrt n‑ssh̬ṭ l‑lġaḍab n‑rbbi lli‑iḥkamn kullu ma‑illan.

¹⁶ ityara yan ism ġ‑uqššab‑ns f‑uflla n‑umṣaḍ‑ns, iga ‹agllid n‑igldan d‑unmġur n‑inmġurn›.

¹⁷ ẓrġ ilmma yal‑lmalak ibidd f‑tafukt, yall awal‑ns iġr s‑igḍaḍ kullutn lli‑tayylalnin ġ‑ignwan yini‑asn: «aškad‑d tmunm f‑imnsi imqqurn lli‑awn‑ijjujad rbbi,

¹⁸ a‑tšttam tifiyi n‑igldan d‑iɛskrin d‑inmġurn l‑lɛskr, d‑yissan ula imnnayn‑nsn, ar‑tšttam tifiyi n‑kullu mddn, ismgan ula ġwilli ganin win ih̬f‑nsn, ma‑imẓẓin ula ma‑imqqurn.»

¹⁹ ẓrġ ilmma aġʷẓn, nttan d‑igldan n‑ddunit d‑ljyuš‑nsn. munn‑d kullutn ad‑mmaġn d‑walli inin f‑wayyis d‑ljiš‑ns.

²⁰ imma ntta yumẓ aġʷẓn, yamẓ ula nnabi bu‑tkrkas lli‑iskrn lmɛjizat s‑ism n‑waġʷẓn ijlu srsnt ġwilli dar ṭṭabɛ n‑waġʷẓn d‑willi tɛbadnin ṣṣurt‑ns. ġakudan sul ddrn a‑tn‑in‑iluḥ s‑sin ġ‑tmda l‑lɛafit lli‑ijddrn s‑lkbrit.

²¹ izayd ilmma ġwalli inin f‑wayyis inġ ma‑iqaman zġ‑ljyuš‑nsn s‑taẓẓit lli‑d‑iffuġn zġ‑imi‑ns. munn‑d fllasn igḍaḍ kullutn ar‑šttan tifiyi‑nsn aylliġ šbɛan.