anurẓm 18 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lhalak n‑tmdint n‑babil

¹ lliġ izri mayan ẓrġ yal‑lmalak yaḍni itjhhd bahra, igguz‑d zġ‑ignna, isfaw kullu ddunit s‑nnur lli‑gis‑illan.

² yall awal‑ns yini: «tthlk, tthlk babil imqqurn. ur‑tgi ġilad abla tazdġt l‑ljnun, tɛmmr s‑kullu kra igan rruḥ yʷh̬šnn ula kullu kra igan agḍiḍ ur‑iḥllan lli‑issmsar bnadm.

³ ašku tsswa kullu timizar n‑ddunit s‑tissi iktin l‑lfsad‑ns, fsadn dids igldan n‑ddunit. tssrbḥ isbbabn n‑ddunit zġ‑tuggt n‑ššhwat‑ns.»

⁴ sfldġ ilmma i‑wawal yaḍni zġ‑ignna inna: «wa‑mddn‑inu, ffuġad‑d zġ‑dars, a‑ur‑dids‑tmunm ġ‑ddnub‑ns baš a‑ur‑dids‑tkšmm ġ‑tguḍiwin‑ns.

⁵ han ddnub‑ns gudin ar ignna. ur‑ittu rbbi‑nnun kullu ma‑tskr yʷh̬šn.

⁶ imma ġilad skrat‑as ġmklli‑awn‑tskr, trarm‑as f‑snat‑twal f‑iskkirn‑ns, tɛmmrm‑as lkas s‑tissi iḥrran f‑snat‑twal f‑tissi lli‑awn‑tsswa nttat,

⁷ tɛbbrm‑as tarfufnt d‑tguḍi s‑lɛbrt lli‑s‑tɛbbr i‑ih̬f‑ns lmjd d‑lh̬ir. ašku ar‑ttini nttat ġ‑uwl‑ns: ‹ha‑yyi tagllitt ad‑giġ f‑lɛrš‑inu. ur‑giġ tahjjalt, ur‑sar‑kkin imṭṭawn alln‑inu.›

⁸ f‑ġayan a‑f‑ra‑stt‑utnt‑kullu‑tguḍiwin‑ns ġ‑yan‑wass. ra‑fllas‑iḍr‑waṭṭan d‑taġuft d‑uġni, ar‑tti‑tjddr lɛafit. ašku rbbi siditun lli‑ra‑fllas‑izzugz lɛqubit, hati itjhhd bahra.

⁹ «imma igldan n‑ddunit lli‑dids‑fsadnin ššn dids lh̬ir, rad‑ssġuyyun ar‑fllas‑allan ġakud nna‑ẓran aggu l‑lɛafit ar‑tti‑tjddr.

¹⁰ ra‑n‑biddn ġ‑tuggugt, iksaḍn a‑ur‑dids‑rfufnn ula ntni, ar‑ttinin: ‹taguḍi, taguḍi ayd‑fllam‑iḍrn a‑tamdint imqqurn. wa‑tamdint n‑babil itjhhdn, tasaɛt idrusn a‑ġ‑fllam‑tgguz lɛqubit‑nnm.›

¹¹ «rad‑ssġuyyun isbbabn n‑ddunit ar‑fllas‑allan, ašku ur‑sul‑illi ma‑isaġn sslaɛt‑nsn

¹² n‑uwrġ d‑nnuqrt d‑tẓratin ġʷlanin d‑ljuhr d‑lkttan išwan d‑lḥrir d‑ttub iḍili d‑ttub aẓggʷaġ d‑ikššuḍn lqmari d‑sslaɛt l‑lɛaj d‑ukššuḍ iʷġlan d‑sslaɛt n‑wanas d‑uwzzal d‑rrh̬am

¹³ d‑lqrfa d‑lḥnuḍ d‑tujjut imimn d‑usafar lmurr d‑lbh̬ur d‑waman n‑waḍil iktin d‑zzit d‑uggurn d‑irdn d‑imugayn d‑uwlli d‑yissan d‑lkrarṣ d‑ismgan d‑mddn tyamaẓnin ġ‑imiġ.

¹⁴ «rad‑as‑inin: ‹laḥ‑am kullu timih̬ar lli‑ttirit. ityattay fllam kullu ma‑s‑trḍit, tssfulkit srs ih̬f‑nnm. ur‑sar‑ti‑tẓrit‑daġ.›

¹⁵ ula isbbabn lli‑rbḥnin s‑sslaɛt lli‑gis‑zznzan, rad‑biddn ġ‑tuggugt, iksaḍn a‑ur‑fllasn‑tḍr lɛqubit ula ntni dids. ar‑ssġuyyun ar‑allan ar‑ttinin:

¹⁶ ‹taguḍi, taguḍi ayd iḍrn f‑tmdint imqqurn lli‑ilsan lkttan išwan d‑ttub iḍili d‑ttub aẓggʷaġ d‑ikʷlan n‑uwrġ d‑ljuhr d‑tẓratin ġʷlanin.

¹⁷ hati ġir tasaɛt idrusn a‑ġ‑kullu‑laḥ timih̬ar‑an.› «biddn‑in ġ‑tuggugt kullu willi tkkanin amda, rrways n‑wanawn d‑willi gisn ssudunin d‑willi gisn th̬damnin.

¹⁸ lliġ a‑tmnadn aggu l‑lɛafit lli‑s‑a‑tjddr ar‑ssġuyyun ar‑ttinin: ‹is‑jju‑tlla kra n‑tmdint zund tamdint‑ad imqqurn?›

¹⁹ ar‑allan ar‑tluḥn agdrur f‑iggi n‑iguyya‑nsn ar‑ssġuyyun ar‑ttinin: ‹taguḍi, taguḍi ayd iḍrn f‑tmdint imqqurn lli‑issrbaḥn s‑tmih̬ar‑ns kullu willi dar anawn f‑umda. hati ġir tasaɛt idrusn a‑ġ‑laḥ kullu ma‑gis‑illan.›

²⁰ frḥat ay‑ayt‑ignna s‑lhalak‑ns, tfrḥm ay‑imẓlayn n‑rbbi d‑irqqasn‑ns d‑lanbiya, ašku izzugz‑d fllas rbbi‑nnun lɛqubit f‑ġaylli‑awn‑tskr.»

²¹ ġakudan a‑inkr yal‑lmalak itjhhdn, yasi yan‑uẓru imqqurn zund aẓru n‑uzrg, iluḥ‑t‑in ġ‑umda yini: «ġmkad a‑s‑ra‑n‑ttyawlwaḥ‑tmdint n‑babil imqqurn s‑jjhd. ur‑sar‑km‑iẓri yan.

²² ur‑sul‑ra‑gim‑sfldn i‑lḥss n‑ayt‑lutar nġd ayt‑umarg nġd ayt‑tɛuwwatt nġd ayt‑nnffar. ur‑sul‑ra‑gim‑ilin ayt‑twuri, wala ra‑gim‑sllan i‑taqqurt n‑uzrg,

²³ wala ra‑gim‑tfaw tifawt l‑lqnadl, wala ra‑gim‑sfldn i‑wawal n‑usli d‑tslit. ašku isbbabn‑nnm, inmġurn n‑ddunit ad‑gan. s‑ssiḥr‑nnm a‑s‑a‑tjllut kullu timizar.

²⁴ lɛqubit a‑iḍrn f‑babil ašku yufa‑n gis rbbi‑nnun idammn l‑lanbiya d‑imẓlayn‑ns d‑win kullu mddn lli‑tyawnġanin ġ‑ddunit.»