anurẓm 17 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lɛqubit lli‑ra‑iḍr f‑tmdint yʷh̬šnn

¹ yašk‑id dari yan zġ‑ssa l‑lmalayka lli‑usinin ssa n‑taṭṭasin yini‑yyi: «ašk‑id ad‑ak‑mlġ lɛqubit lli‑ra‑iḍr f‑tmggant imqqurn lli‑iskiwsn ġ‑gr isaffn n‑waman.

² fsadn dids igldan n‑ddunit, tssnufl imzdġn n‑ddunit s‑tissi iktin l‑lfsad‑ns.»

³ yasi‑yyi ġakudan s‑tḥkimt n‑rruḥ, yawi‑yyi s‑yan mani ih̬wan. ẓrġ ġin yat‑tmġart tni f‑yan‑waġʷẓn aẓggʷaġ. iṭṭaf ssa n‑ih̬fawn d‑mraw‑waskawn, tyaran fllas kigan d‑ismawn, gan kullu tirggam i‑rbbi.

⁴ tls‑tmġart‑an ma‑iḍlan d‑ma‑iẓggʷaġn, tg‑n ikʷlan n‑uwrġ d‑ljuhr d‑tẓratin ġʷlanin. tasi ġ‑ufus‑ns yal‑lkas n‑uwrġ iɛmmrn s‑tjlh̬it d‑irkan l‑lfsad‑ns.

⁵ ityara f‑ignzi‑ns yan ism s‑lmɛna intln, iga «babil imqqurn, innas n‑tmgganin ula kullu ma‑igan tajlh̬it n‑ddunit.»

⁶ ẓrġ tamġart‑an tnufl s‑tissi n‑idammn n‑imẓlayn n‑rbbi d‑win inagan n‑yasuɛ. lliġ‑tt‑ẓriġ, tɛjjbġ gis bahra.

⁷ yini‑yyi lmalak: «mah̬ aylliġ gis ttɛjjbt? rad‑ak‑mlġ lmɛna‑yad fllak intln n‑tmġart ula aġʷẓn lli‑f‑tni lli‑iṭṭafn ssa n‑ih̬fawn d‑mraw‑waskawn.

⁸ aġʷẓn‑an ikka‑ttin illa, ur‑sul‑a‑itban, ra‑d‑iġli zġ‑tdrut n‑wakal iftu s‑lhalak. ra‑gis‑tɛjjabn imzdġn n‑ddunit lli‑mi‑ur‑ityara ism‑nsn ġ‑warra n‑tudrt zġ‑isizwar n‑ddunit. ašku rad‑ẓrn aġʷẓn lli‑sttin‑ikkan illa, ur‑sul‑a‑itban, ra‑d‑daġ‑iban.

⁹ «ma‑iṭṭafn lɛaql baš a‑ifhm lmɛna‑yad? ašku ssa n‑ih̬fawn‑lli, gan ssa n‑iwrar lli‑f‑tskiws‑tmġart.

¹⁰ gn ula ssa n‑igldan, ḍrn zġ‑gisn smmus, isul yan, ra‑d‑sul‑yašk wayyaḍ. ġakud nna‑d‑yuška rad‑as‑ityawfka a‑iḥkam yat luqt idrusn.

¹¹ imma aġʷẓn lli‑sttin ikkan illa ur‑a‑sul‑itban, nttan a‑ra‑ig wis tam igldan. ikka‑ttin iga yan zġ‑ssa n‑igldan lli‑zrinin. ra‑d‑iwrri, iftu ilmma s‑lhalak.

¹² «imma mraw‑waskawn lli‑tẓrit, ntni gan mraw igldan lli‑ur‑ta‑ḥkamnin. rad‑asn‑ttyawfka‑tẓḍḍart ad‑ḥkamn ntni d‑waġʷẓn yat tasaɛt idrusn.

¹³ yat‑tnbaṭṭ ka‑darsn‑illan, rad‑fln taẓḍḍart ula tiglday‑nsn ġ‑ufus n‑waġʷẓn.

¹⁴ rad‑mmaġn d‑ulqqaġ, walaynni ra‑tn‑inru‑ulqqaġ ntta d‑mddn‑ns lli‑mi‑iġra, iẓli‑tn ad‑gn wins, ġwin‑bdda gis. ašku iga ntta anmġur n‑inmġurn, ig agllid n‑igldan.»

¹⁵ izayd lmalak yini‑yyi: «isaffn n‑waman lli‑tẓrit tskiws‑tmggant ġ‑gratsn, ntni gan mddn n‑tasutin d‑tqbilin d‑tmizar d‑lluġat n‑ddunit.

¹⁶ walaynni mraw‑waskawn d‑waġʷẓn lli‑tẓrit, ntni rad‑krhun tamggant, kkisn‑as kullu ma‑dars‑illan, fln‑tt bla yat. rad‑ššn tifiyi‑ns jdrn‑tt kullu s‑lɛafit.

¹⁷ ašku iskr rbbi ġ‑uwlawn‑nsn ad‑skarn ma‑gisn‑iqṣad ntta, mšaškan‑d ad‑fln taẓḍḍart ula tiglday‑nsn ġ‑ufus n‑waġʷẓn ard kullu ijru maylli‑yad‑inna rbbi ra‑ijru.

¹⁸ imma tamġart lli‑tẓrit, nttat a‑igan tamdint imqqurn lli‑iḥkamn ġ‑kullu igldan ddunit.»