anurẓm 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ssa n‑taṭṭasin n‑ssh̬ṭ n‑rbbi

¹ sfldġ i‑yan‑wawal itjhhdn isawl‑d zġ‑tḥanut tamẓlayt, yini i‑ssa l‑lmalayka: «ddwat tffim‑n f‑ddunit ssa n‑taṭṭasin n‑ssh̬ṭ n‑rbbi.»

² iddu lmalak amzwaru iffi‑n taṭṭast‑ns f‑ddunit, s‑wrrin iḥbba šqanin ʷh̬šnnin ġ‑mddn lli‑dar ṭṭabɛ n‑waġʷẓn ar‑tɛbadn ṣṣurt‑ns.

³ iddu lmalak wis sin iffi‑n taṭṭast‑ns f‑umda, s‑iwrri ig‑umda zund idammn n‑iniġi, immt kullu ma‑iddrn ġ‑umda.

⁴ iddu lmalak wis kraḍ iffi‑n taṭṭast‑ns f‑isaffn d‑talɛinin n‑waman, s‑wrrin kullu ẓggʷaġn zund idammn.

⁵ sfldġ i‑lmalak lli‑igabln aman inna: «wa‑rbbi amẓlay lli‑illan ikka‑ttin bdda illa, s‑lḥqq a‑s‑tutt lḥukm‑ad f‑bnadm,

⁶ ašku ffin ntni idammn n‑imẓlayn‑nnk d‑lanbiya. hatni ġila idammn ad‑asn‑tsswat. ġmkan ad‑asn‑igan.»

⁷ sfldġ i‑kra isawl‑d zġ‑ṭṭbla l‑lbh̬ur inna: «s‑ṣṣaḥt a‑sidi rbbi lli‑iḥkamn kullu ma‑illan, yʷġẓan lḥukm‑nnk. s‑lḥqq a‑s‑a‑ttḥkamt.»

⁸ iddu lmalak wis kkuẓ iffi‑n taṭṭast‑ns f‑tafukt, s‑as‑ityawfka a‑tqd bnadm s‑lɛafit‑ns.

⁹ tjdr mddn s‑trġi‑ns iḥrran, aylliġ rgmn ism n‑rbbi lli‑dar taẓḍḍart a‑tn‑yut s‑tguḍiwin‑an, walaynni ur‑rin ad‑fln ddnub‑nsn uqqrn lmjd‑ns.

¹⁰ iddu lmalak wis smmus iffi‑n taṭṭast‑ns f‑lɛrš n‑waġʷẓn, tllas‑tgldit‑ns s‑wrrin mddn ar‑gllin ils‑nsn s‑waṭṭan lli‑tn‑ibrrin.

¹¹ ar‑rggmn rbbi n‑ignna f‑ssibt n‑waṭṭan d‑iḥbba lli‑gisn‑illan, walaynni ur‑ta‑jju‑rin ad‑fln iskkirn‑nsn ʷh̬šnnin.

¹² iddu lmalak wis sḍiṣ iffi‑n taṭṭast‑ns f‑wasif n‑furat imqqurn, s‑iwrri iqqur zġ‑waman, baš a‑ig aġaras yujad i‑igldan lli‑ra‑d‑yašk zġ‑usġlay n‑tafukt.

¹³ ẓrġ ilmma kraḍ ljnun ʷh̬šnnin zund kraḍ igʷra, ffuġn‑d zġ‑imi n‑ulgmmaḍ d‑win‑waġʷẓn d‑win nnabi bu‑tkrkas.

¹⁴ ntni larwaḥ l‑ljnun ad‑gan, ar‑skarn lmɛjizat ar‑tkkan dar kullu igldan n‑ddunit a‑tn‑ssmununn i‑imiġ lli‑s‑rad‑mmaġn ġ‑wass l‑lḥsab n‑rbbi lli‑iḥkamn kullu ma‑illan.

¹⁵ inna siditnnġ: «hati ra‑n‑aškġ zund amh̬h̬ar. ambarki a‑ra‑ig wanna iḍufn yawi dids timlsa‑ns a‑ur‑iffuġ bla yat iḥšm ġ‑lgddam n‑mddn.»

¹⁶ rad‑ssmunn igldan‑lli ġ‑udġar lli‑mi‑ttinin ‹harmagaddun› s‑wawal n‑ayt‑yudaya.

¹⁷ iddu lmalak wis ssa iffi‑n taṭṭast‑ns f‑ignwan, s‑d‑isawl yan‑wawal itjhhdn zġ‑dar lɛrš ġ‑tḥanut tamẓlayt yini: «hati ikmml.»

¹⁸ ar‑kkatn‑uwsmann, immass iggig s‑uqqryan itjhhdn, immass‑wakal ula ntta bahra. ur‑jju‑immussi‑wakal ġmkan zġ‑lliġ ityawh̬laq bnadm ġ‑ddunit.

¹⁹ tbḍu‑tmdint imqqurn f‑kraṭṭ‑twal, tthlknt kullu timdinin n‑tmizar n‑ddunit. ur‑ittu rbbi tamdint n‑babil imqqurn, isswa‑yas kullu lkas n‑ssh̬ṭ l‑lġaḍab‑ns.

²⁰ ġakudan laḥ igzirn, astwan kullu idrarn.

²¹ ar‑n‑iṭṭar ibruri zġ‑ignwan zund iẓran, iḍni bahra yakmur‑n s‑kkuẓ id‑mraw n‑kilu. ar‑n‑iṭṭar f‑mddn aylliġ rgmn rbbi f‑tguḍi‑an n‑ibruri, ašku išqa bahra.