anurẓm 15 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

amarg n‑willi nranin aġʷẓn

¹ ẓrġ ilmma tamatart yaḍni ġ‑ignna, tmqqur bahra, tɛjjbġ gis s‑kigan. tga ssa l‑lmalayka asin ssa n‑tguḍiwin. timggura ġ‑tguḍiwin ad‑gant, ašku rbbi iḥudda srsnt ssh̬ṭ‑ns.

² ẓrġ kra irwas‑iyi tamda n‑jjaj ih̬lḍn s‑lɛafit. ẓrġ ġwilli nranin aġʷẓn ula ṣṣurt‑ns ula nnmra n‑ism‑ns, biddn ġ‑tama n‑tmda n‑jjaj asin lutarat n‑rbbi.

³ ar‑ttirirn asin amarg n‑musa ah̬ddam n‑rbbi d‑umarg n‑ulqqaġ ar‑ttinin: «wa‑sidi rbbi lli‑iḥkamn kullu ma‑illan, imqqur kullu ma‑tskart, lɛjb a‑iga. way‑agllid n‑tasutin, yʷġẓan kullu ma‑ttnbaṭṭ. lḥqq a‑iga.

⁴ wa‑sidi rbbi, ma‑ur‑ra‑iḍr ġ‑lgddam‑nnk? ma‑ur‑ra‑yuqqr lmjd n‑ism‑nnk? ašku kiyi waḥduk a‑iṣfan. rad‑d‑aškin mddn ad‑ak‑sjdn zġ‑kullu timizar n‑ddunit. ašku ibayyn‑asn‑d lḥqq n‑tnbaḍin‑nnk.»

⁵ lliġ izri mayan ssmaqqlġ‑n s‑ẓriġ taḥanut tamẓlayt trẓm ġ‑uh̬iyyam n‑tmitar n‑rbbi ġ‑ignna.

⁶ ẓrġ ssa l‑lmalayka lli‑ra‑yasi ssa n‑tguḍiwin, ffuġn‑d zġ‑tḥanut tamẓlayt. lsn timlsa l‑lkttan iṣfan ar‑ssmrqiqiynt. bkisn zġ‑wammas‑nsn s‑ibkkasn n‑uwrġ.

⁷ tddu yat zġ‑kkuẓṭ lmh̬luqat tfk i‑ssa l‑lmalayka ssa n‑taṭṭasin n‑uwrġ, ɛmmrnt s‑ssh̬ṭ n‑rbbi lli‑bdda‑illan rad‑bdda‑yili.

⁸ twrri tɛmmr‑tḥanut tamẓlayt s‑waggu l‑lmjd n‑rbbi d‑tḥkimt‑ns itjhhdn. ur‑ra‑yiẓḍar yan a‑ikšm s‑tḥanut‑an tamẓlayt ard kmmlnt ssa n‑tguḍiwin lli‑usin ssa l‑lmalayka.