anurẓm 14 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

alqqaġ d‑willi ifra zġ‑ddunit

¹ ssmaqqlġ‑n ġakudan s‑ẓriġ alqqaġ ibidd f‑iggi n‑uwrir n‑tgmmi n‑rbbi. biddn dids miyya d‑kkuẓ id‑mraw d‑kkuẓ‑walf (144.000) n‑mddn lli‑mi‑ityara f‑ignzi‑nsn ism n‑ulqqaġ ula ism n‑babas.

² sfldġ ilmma i‑yan‑wawal isawl ġ‑ignna zund ijjij n‑isaffn n‑waman ggutnin ula zund aqqryan n‑iggig itjhhdn. irwas lḥss l‑lutarat ar‑tn‑kkatn id‑bab‑nsn.

³ ar‑kullu‑tasin yan‑umarg l‑ljdid ġ‑lgddam l‑lɛrš ġ‑dar kkuẓṭ lmh̬luqat d‑imġarn. ur‑iẓḍar yan a‑yissan amarg‑an, abla miyya d‑kkuẓ id‑mraw d‑kkuẓ‑walf (144.000) n‑mddn lli‑ifra rbbi zġ‑ddunit.

⁴ ntni gan ġwilli ġusnin, ur‑ssrkin ih̬f‑nsn d‑tmġarin. gn ġwilli‑bdda‑itmunun d‑ulqqaġ s‑innas a‑ittidu. gn imnza n‑bnadm lli‑ifra ad‑gn win rbbi d‑ulqqaġ.

⁵ kra n‑tkrkist ur‑tkki imi‑nsn. kra yʷh̬šnn ur‑gisn‑illi.

kraḍ lmalayka uyln ġ‑wammas n‑ignwan

⁶ ẓrġ ilmma yal‑lmalak yaḍni yuyl ġ‑wammas n‑ignwan, yawi‑d lh̬bar ifulkin lli‑rad‑bdda‑yili, a‑srs‑itbrraḥ i‑kullu imzdġn n‑ddunit n‑kraygatt tasut d‑tqbilt d‑lluġa d‑tmazirt.

⁷ yall awal‑ns yini: «ḍrat a‑ttɛbadm rbbi ar‑ti‑ttalġm, ašku tlkm‑d tasaɛt a‑yut lḥukm f‑bnadm. sjdat i‑walli iskrn ignwan d‑wakal, iskr amda ula talɛinin n‑waman.»

⁸ iggʷru‑as‑d lmalak wis sin yini: «tthlk, tthlk‑tmdint n‑babil itjhhdn. tthlk h̬talli isswan kullu timizar n‑ddunit s‑tissi iktin l‑lfsad‑ns issnufuln.»

⁹ iggʷru‑asn‑d lmalak wis kraḍ, yall awal‑ns yini: «winna tɛbadnin aġʷẓn ula ṣṣurt‑ns, d‑winna qblnin ṭṭabɛ‑ns f‑ignzi‑nsn ula f‑ufus‑nsn,

¹⁰ ntni rad‑sun zġ‑tissi iḥrran n‑ssh̬ṭ n‑rbbi lli‑s‑iɛmmr lkas l‑lġaḍab‑ns. rad‑rfufnn s‑lɛafit d‑lkbrit ġ‑lgddam l‑lmalayka n‑rbbi ula ġ‑lgddam n‑ulqqaġ.

¹¹ rad‑bdda‑yaqlay‑waggu n‑urfufn‑nsn, ur‑sar‑itmmi. ur‑sar‑rad‑asn‑tili rraḥt, la ġ‑iyḍ ula azal, i‑willi tɛbadnin aġʷẓn ula ṣṣurt‑ns, ula ġwilli qblnin ṭṭabɛ n‑ism‑ns.»

¹² mayan a‑f‑illa f‑imẓlayn n‑rbbi ad‑ṣbrn zgan, a‑tn‑igan d‑willi skarnin s‑luṣiyat n‑rbbi ġwin‑bdda ġ‑yasuɛ.

¹³ sfldġ ilmma i‑yan‑wawal isawl ġ‑ignna yini‑yyi: «ara maya, ‹imbarkin ad‑gan winna mmutnin f‑ism n‑siditnnġ zġ‑ġilad s‑uflla.›» isawl‑d rruḥ n‑rbbi yini: «s‑ṣṣaḥt, rad‑sunfun ntni zġ‑unhataf‑nsn, awin didsn lḥsab n‑kullu mad‑skarn ifulki.»

tamgra n‑ṣṣabt n‑ddunit

¹⁴ ssmaqqlġ‑n ilmma s‑ẓriġ yat‑tmdlut tumlilt, iskiws fllas yan irwas bnadm. yili ttaj n‑uwrġ f‑ih̬f‑ns, yili‑usmmawd imsadn ġ‑ufus‑ns.

¹⁵ iffuġ‑d yal‑lmalak zġ‑tgmmi n‑rbbi, yall awal‑ns yini i‑walli iskiwsn f‑tmdlut: «luḥ‑n asmmawd‑nnk a‑imgr, ašku ilkm‑uzmz n‑tmgra, tnu ṣṣabt n‑ddunit.»

¹⁶ inkr ġwalli iskiwsn f‑tmdlut iluḥ‑n asmmawd‑ns f‑ddunit imgr ṣṣabt‑ns.

¹⁷ ġakudan iffuġ‑d yal‑lmalak yaḍni zġ‑tgmmi n‑rbbi ġ‑ignna, ula ntta yusi asmmawd imsadn.

¹⁸ iffuġ‑d ilmma yal‑lmalak yaḍni zġ‑dar ṭṭbla l‑lbh̬ur, ig ġwalli igabln lɛafit. isawl s‑walli yusin asmmawd imsadn yini‑as s‑wawal itjhhdn: «luḥ‑n asmmawd‑nnk, tssmunt tizrmin zġ‑ddalit n‑ddunit, ašku inwa‑waḍil.»

¹⁹ iddu lmalak iluḥ‑n asmmawd‑ns f‑ddunit issmun aḍil. iluḥ‑n aḍil n‑ddunit ġ‑lmɛṣṣrt imqqurn n‑ssh̬ṭ n‑rbbi.

²⁰ tlla lmɛṣṣrt ġ‑brra n‑tmdint, ar‑gis‑taḍḍrn aḍil. ffuġn zġ‑gis idammn, ngin zund asif, aylliġ idra s‑ma‑itggan tiddi n‑wagmar. ilkm‑unggay‑ns ma‑itggan kraḍ id‑miyya n‑kilimitr.