anurẓm 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

aġʷẓn lli‑iġlin zġ‑umda

¹ ẓrġ ilmma yan‑waġʷẓn iġli‑d zġ‑umda. iṭṭaf mraw‑waskawn d‑ssa n‑ih̬fawn, yili f‑kraygatt isk yan‑ttaj imẓẓin, ityara f‑kraygatt ih̬f yan‑ism igan targgimt i‑ism n‑rbbi.

² ig‑waġʷẓn‑an zund agrzam, ṣḥun iḍarn‑ns ilin‑gisn‑wah̬bbašn mqqurnin, ig imi‑ns zund imi n‑izm. ifk‑as‑ulgmmaḍ lḥukm‑ns ula taẓḍḍart itjhhdn n‑tgldit‑ns.

³ irwas is‑ityaggas yan zġ‑ih̬fawn‑ns ra‑immt, walaynni ijji‑waggas‑lli išqan ur‑immut. ar‑tɛjjabn kullu imzdġn n‑ddunit ġ‑waġʷẓn‑an, wrrin ḍfurn‑t.

⁴ ar‑tɛbadn algmmaḍ ašku ifka taẓḍḍart‑ns i‑waġʷẓn, ar‑tɛbadn aġʷẓn ula ntta ar‑ttinin: «ma‑itjhhdn zund aġʷẓn? ma‑iẓḍarn a‑t‑inru?»

⁵ ityawfka i‑waġʷẓn a‑isawal ar‑issfurrug ar‑irggm rbbi, ittfk‑as a‑iḥkam kkuẓ id‑mraw d‑sin (42) n‑wayyur.

⁶ irẓm imi‑ns s‑trggam, ar‑irggm ġ‑ism n‑rbbi ula tazdġt‑ns ula kullu ayt‑ignna.

⁷ ittfk‑as a‑itmmaġ d‑imẓlayn n‑rbbi inru‑tn, ittfk‑as a‑iḥkam ġ‑mddn n‑kraygatt taqbilt d‑tasut d‑lluġa d‑tmazirt.

⁸ ra‑ti‑tɛbadn kullu imzdġn n‑ddunit, abla ġwilli mi ityara ism‑nsn zġ‑isizwar n‑ddunit ġ‑warra n‑tudrt n‑ulqqaġ lli‑ityawġrasn.

⁹ wanna dar imzgan, iqqan‑t‑id a‑isfld.

¹⁰ «wanna‑d‑iqqann a‑ityamaẓ ra‑ityamaẓ. wanna‑d‑iqqann a‑immt s‑taẓẓit ra‑immt s‑taẓẓit. mayan a‑f‑illa f‑imẓlayn n‑rbbi a‑gis‑amẓn, zgan ġ‑uġaras‑ns.»

aġʷẓn lli‑iffuġn zġ‑wakal

¹¹ ẓrġ ilmma aġʷẓn yaḍni iffuġ‑d zġ‑wakal. iṭṭaf sin‑waskawn zund askawn n‑ulqqaġ, ar‑isawal zund algmmaḍ.

¹² ar‑itḥkam s‑ism n‑waġʷẓn amzwaru, iṭṭaf kullu taẓḍḍart‑ns. ar‑itamr ddunit d‑imzdġn‑ns ad‑tɛbadn aġʷẓn amzwaru lli‑mi‑ijji‑waggas‑ns išqan.

¹³ izayd ar‑iskar timitar mqqurnin, ar‑d‑izzuguz lɛafit zġ‑ignna ar akal a‑stt‑ẓrn kullu mddn.

¹⁴ ityawfka‑yas a‑iskar lmɛjizat ġ‑tama n‑waġʷẓn amzwaru, ar‑srsnt‑ijllu kullu imzdġn n‑ddunit. yuṣṣa‑tn ad‑skrn yat‑ṣṣurt imqqurn n‑waġʷẓn amzwaru lli‑ityaggasn s‑taẓẓit iwrri‑daġ iddr.

¹⁵ ittfk‑as a‑izrɛ kra n‑rruḥ ġ‑ṣṣurt‑lli n‑waġʷẓn amzwaru, aylliġ twrri ar‑tsawal ṣṣurt ar‑ttamr mddn ad‑nġn wanna yagʷin a‑stt‑itɛbad.

¹⁶ izayd‑waġʷẓn‑lli ar‑itamr kullu mddn, ma‑imẓẓin ula ma‑imqqurn, ayt‑wayda ula imẓlaḍ, ismgan ula ġwilli ganin win ih̬f‑ns, yini‑asn ad‑qbln ṭṭabɛ f‑ufus‑nsn afasi nġd f‑ignzi‑nsn.

¹⁷ ġmkan a‑s‑a‑itamr baš a‑ur‑yiẓḍar yan a‑isġ ula izznza bla dars illa ṭṭabɛ n‑ism n‑waġʷẓn amzwaru nġd nnmra lli‑imalan ism‑ns.

¹⁸ ma‑ra‑ifhm lmɛna‑yad? wanna dar lɛaql, illa fllas a‑iḥasb nnmra n‑waġʷẓn, ašku tga nttat nnmra n‑ism n‑bnadm, tg sḍiṣ id‑miyya d‑sḍiṣ id‑mraw d‑sḍiṣ (666).