anurẓm 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tamġart d‑ulgmmaḍ

¹ tban ilmma yat‑tmatart imqqurn ġ‑ignwan. tga zund yat‑tmġart ilsan tafukt, yili‑wayyur ġ‑ddu iḍarn‑ns, yili f‑ih̬f‑ns yan‑ttaj n‑sin d‑mraw n‑itri.

² ar‑trbbu takmur a‑taru, ar‑tssġuyyu s‑ungaẓ n‑tlalit.

³ tban‑ilmma‑tmatart yaḍni ġ‑ignwan. tga zund yan‑ulgmmaḍ aẓggʷaġ, imqqur bahra. iṭṭaf ssa n‑ih̬fawn d‑mraw‑waskawn, ilin ssa n‑ttijan mẓẓinin f‑ih̬fawn‑ns.

⁴ issmass imġil‑ns ijurr srs tulut n‑itran zġ‑ignwan, iluḥ‑tn s‑wakal. ibidd ġ‑lgddam n‑tmġart lli‑ra‑yaru, yiri a‑išš arraw‑ns ġakud nna‑ti‑turu.

⁵ taru yan‑warraw, ig yus lli‑ra‑iḥkam kullu timizar n‑ddunit s‑uɛmud n‑uwzzal. ityattay‑warraw‑ns ġakudan s‑lɛrš n‑rbbi.

⁶ trwl‑tmġart s‑lh̬la, s‑illi‑as‑ijjujad rbbi. ġin a‑ġ‑ra‑d‑as‑ifk kullu ma‑tḥtajja alf d‑sin id‑miyya d‑sḍiṣ id‑mraw (1260) n‑wass.

⁷ ġakudan inkr imiġ ġ‑ignna. inkr lmalak imqqurn mih̬ayl d‑lmalayka lli‑llanin ġ‑ddu‑ufus‑ns mmaġn d‑ulgmmaḍ. irar‑fllasn‑ulgmmaḍ d‑lmalayka‑ns, mmaġn didsn

⁸ walaynni ur‑tn‑nrin, ur‑ẓḍarn ad‑qaman ġ‑ignna.

⁹ ityawgar‑n‑ulgmmaḍ‑an imqqurn s‑iyzdar. nttan a‑mi‑ttinin ‹iblis› ula ‹šiṭan›, ig abnkal aqdim lli‑ijllun kullu imzdġn n‑ddunit. ityawgar‑n s‑wakal ntta d‑lmalayka‑ns.

¹⁰ sfldġ ilmma i‑yan‑wawal itjhhdn isawl ġ‑ignna yini: «ġilad ad‑aġ‑ijjnjm rbbi‑nnġ, tban‑d‑tḥkimt‑ns itjhhdn, tašk‑id‑tgldit‑ns, yamẓ lmasiḥ‑ns lḥukm. ašku ġwalli itaštkkan s‑aytmatnnġ ġ‑lgddam n‑rbbi‑nnġ ġ‑iyḍ ula azal, hati ityawlwaḥ s‑iyzdar.

¹¹ nran‑t ntni s‑idammn n‑ulqqaġ ula s‑wawal n‑tugga‑nsn, ašku ujadn ad‑fkn ih̬f‑nsn ar lmut.

¹² frḥat ay‑ignwan ula kullu ma‑gisn‑illan. imma kunni ay‑akal d‑umda, taguḍi a‑rad‑awn‑yili ašku igguz srun iblis, nkrn‑d gis iriyn bahra ašku issn is‑ur‑as‑tqama ġir luqt idrusn.»

¹³ imma algmmaḍ, lliġ iẓra ih̬f‑ns is‑n‑ityawlwaḥ s‑wakal, iddu ar‑iṭṭay tamġart lli‑yurun arraw.

¹⁴ imma nttat tyawfkan‑as sin ifrawn zund ifrawn n‑igidr imqqurn baš a‑tayyl zġ‑dar‑ubnkal s‑lh̬la s‑illiġ rad‑as‑ityawfka kullu ma‑tḥtajja kraḍ isggʷasn d‑mnaṣṣ.

¹⁵ walaynni ingi‑d imi n‑ubnkal s‑waman zund asif itjhhdn baš a‑yawi‑unggay‑ns tamġart.

¹⁶ akal a‑iskrn afulki i‑tmġart ġilan, ašku irẓm imi‑ns isu anggay lli‑d‑iffuġn zġ‑imi n‑ulgmmaḍ.

¹⁷ imma algmmaḍ, nkrn‑d gis iriyn ggutnin, ṭiyyr‑as bahra f‑tmġart. iddu a‑itmmaġ d‑tarwa yaḍni n‑tmġart, a‑tn‑igan d‑kullu willi skarnin s‑luṣiyat n‑rbbi ar‑tamẓn ġ‑tugga n‑yasuɛ.

¹⁸ ibidd f‑umlal ġ‑tama n‑umda.