anurẓm 11 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

sin inagan

¹ ttfk‑iyi ilmma yat‑tġanimt ma‑s‑a‑ssġalġ, yini‑yyi rbbi: «nkr tssġlt tigmmi n‑rbbi‑nnk d‑uẓru n‑tġrsi, tḥasbt kullu willi gis tɛbadnin.

² walaynni ad‑ur‑tssġlt targgit‑an illan ġ‑brra n‑tgmmi, ašku flġ‑tt i‑willi ur‑ginin mddn‑inu. rad‑akʷln ntni f‑tmdint tamẓlayt kkuẓ id‑mraw d‑sin (42) n‑wayyur.

³ walaynni rad‑aznġ sin inagan‑inu ad‑tbrraḥn alf d‑sin‑id‑miyya d‑sḍiṣ id‑mraw (1260) n‑wass s‑iwaliwn lli‑rad‑asn‑malaġ. lh̬iš n‑tguḍi a‑rad‑lsn.»

⁴ rad‑gn ntni zund snat‑tizutna ula sin lqnadl, biddn ġ‑lgddam n‑rbbi lli‑iḥkamn kullu ddunit.

⁵ iġ‑inawl kra n‑yan a‑tn‑ihlk, ra‑di‑tffuġ lɛafit zġ‑imi‑nsn tsu‑n ġwilli‑tn‑kurhanin. iqqan‑d a‑immt wanna iran a‑tn‑ihlk.

⁶ rad‑asn‑tili‑tẓḍḍart ad‑qqnn ignwan a‑ur‑iḍr‑unẓar ġ‑uwssan lli‑ġ‑a‑tbrraḥn s‑iwaliwn lli‑asn‑imala rbbi. rad‑asn‑tili‑tẓḍḍart ad‑rarn aman n‑talɛinin ad‑ẓggʷaġn zund idammn. rad‑asn‑tili‑tẓḍḍart f‑ddunit a‑stt‑utn s‑kullu kra igan taguḍi ġakud nna‑ran.

⁷ ġakud lliġ rad‑kmmln tabrraḥt s‑tugga‑nsn, rad‑srsn‑inkr‑waġʷẓn lli‑d‑iġlin zġ‑tdrut n‑wakal, inru‑tn inġ‑tn.

⁸ tqama ddat‑nsn ġ‑usuk n‑tmdint imqqurn lli‑ġ‑ugʷln siditsn f‑uggjdi, ar‑srs‑kkatn mddn lmɛna n‑‹sadum› ula ‹miṣr›.

⁹ kraḍ‑uwssan d‑mnaṣṣ a‑ra‑n‑tmunun mddn zġ‑kullu tasutin d‑tqbilin d‑lluġat d‑tmizar ad‑ssmuqquln ġ‑ddat‑nsn, agʷin a‑tn‑mḍln.

¹⁰ rad‑frḥn imzdġn n‑ddunit s‑lmut‑nsn. rad‑bahra‑ḍṣṣan i‑ngratsn ar‑akkan tarragin i‑ngratsn, ašku ur‑sul‑ddrn sin inagan lli‑zzuguznin tammara iggutn f‑bnadm.

¹¹ walaynni tiġurdin n‑kraḍ‑uwssan d‑mnaṣṣ, irar‑d gisn rbbi rruḥ n‑tudrt, biddn f‑iḍarn‑nsn. ḍrnt‑tksaḍ ggutnin ġ‑kullu willi‑tn‑ẓranin.

¹² ġakudan sfldn inagan‑lli i‑yan‑wawal itjhhdn zġ‑ignna yini‑asn: «ġlyad‑d s‑ġid.» tyalaln ilmma s‑ignna ġ‑yat‑tmdlut ġ‑lgddam n‑willi‑tn‑kurhanin.

¹³ immass‑wakal bahra ġ‑tasaɛt‑an, iḍr yan‑ugzzum zġ‑mraw igzman n‑tmdint, mmtn ssa n‑id‑walf (7000) n‑mddn lliġ immussa‑wakal. ksuḍn bahra ġwilli sulnin ar‑ttinin: «mnšk a‑bahra‑itjhhd rbbi n‑ignna.»

¹⁴ ġmkad a‑tzri tis snat‑tguḍiwin. imma tis kraṭṭ‑tguḍiwin, hati takmur‑d.

wis ssa n‑nnffarat

¹⁵ yut ilmma wis ssa l‑lmalayka nnffar‑ns, s‑sfldġ i‑waqqur s‑iwaliwn tjhhdnin ġ‑ignna ar‑ttinin: «hati tagldit n‑ddunit twrri tga tagldit n‑siditnnġ ula tin lmasiḥ‑ns. nttan a‑stt‑iḥkamn ġilad ula kullu mayd‑d‑iftan.»

¹⁶ imma sin id‑mraw d‑kkuẓ (24) n‑umġar lli‑skiwsnin f‑lɛruš‑nsn ġ‑lgddam n‑rbbi, ḍrn‑in f‑uwdmawn‑nsn sjdn‑as

¹⁷ inin: «nškr‑k a‑sidi rbbi lli‑iḥkamn kullu ma‑illan, ig ġwalli illan yili bdda, ašku tnkrt s‑tḥkimt‑nnk itjhhdn tgrt ġ‑lḥukm.

¹⁸ hajnt‑tmizar n‑ddunit walaynni ilkm‑d‑uzmz l‑lġaḍab‑nnk. ig azmz lli‑ġ‑ra‑tut lḥukm f‑willi mmutnin, trart lh̬ir i‑ih̬ddamn‑nnk lanbiya ula imẓlayn‑nnk ula kullu willi uqqrnin ism‑nnk, ma‑imẓẓin ula ma‑imqqurn. ig azmz lli‑ġ‑ra‑thlkt ġwilli thlaknin ddunit.»

¹⁹ ġakudan a‑ttyawrẓam‑tgmmi n‑rbbi ġ‑ignna, ẓrġ‑n ṣṣnduq l‑lɛhd n‑rbbi ġ‑ugʷns n‑tgmmi. utn‑uwsmann, immass iggig s‑uqqryan itjhhdn. immass‑wakal ula ntta, iḍr ibruri išqan.