anurẓm 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmalak lli‑yusin arra imẓẓin

¹ ẓrġ ilmma yal‑lmalak yaḍni, itjhhd bahra igguz‑d zġ‑ignna. isutl‑as‑umdlu zund timlsit, tlulli‑tslit n‑unẓar i‑ih̬f‑ns, yisfiw‑uwdm‑ns zund tafukt, gn iḍarn‑ns zund tannalin l‑lɛafit.

² yasi ġ‑ufus‑ns yan‑warra imẓẓin irẓmn. isrs‑n aḍar‑ns afasi f‑umda, isrs‑d aḍar‑ns aẓlmaḍ f‑wakal.

³ isawl s‑yan‑wawal itjhhdn zund tandra n‑izm. lliġ isawl utn ssa n‑iggign.

⁴ lliġ utn ssa n‑iggign gġ‑n ad‑araġ, walaynni sfldġ i‑yan‑wawal zġ‑ignna inna‑yyi: «ḥḍu mayd nnan ssa n‑iggign, a‑t‑ur‑tarat.»

⁵ imma lmalak lli‑ẓriġ ibidd f‑umda d‑wakal, yull afus‑ns afasi s‑ignna,

⁶ iggall s‑rbbi lli‑bdda‑illan rad‑bdda‑yili, ig ġwalli iskrn ignna d‑wakal d‑umda ula kullu ma‑gisn‑illan. yini: «hati ur‑ra‑sul‑imaṭl.

⁷ ašku ġakud lliġ ra‑yut wis ssa l‑lmalayka nnffar‑ns, ra‑issafu rbbi maylli iqṣad, a‑t‑igan d‑lbaraka intln lli‑f‑isawl i‑ih̬ddamn‑ns lanbiya.»

⁸ ġakudan isawl‑d‑daġ‑sri‑wawal lli‑mi‑sfldġ zġ‑ignna yini‑yyi‑d: «ddu, tamẓt arra lli‑irẓmn ġ‑ufus l‑lmalak lli‑ibiddn f‑umda ula akal.»

⁹ ftuġ s‑dar lmalak ḍalbġ‑t ad‑iyi‑ifk arra‑lli imẓẓin, yini‑yyi: «amẓ‑t tššt‑t. ra‑ismmum ġ‑udis‑nnk walaynni ra‑imim zund tammnt ġ‑imi‑nnk.»

¹⁰ amẓġ arra‑lli imẓẓin zġ‑ufus l‑lmalak ššġ‑t. imim zund tammnt ġ‑imi‑nu, walaynni lliġ‑t‑ššiġ iwrri ismmum ġ‑udis‑inu.

¹¹ yini‑yyi ġakudan: «iqqan‑k‑id a‑tzaydt ar‑ttbrraḥt s‑ma‑rad‑ak‑iml rbbi f‑mddn n‑kigan d‑tmizar d‑tasutin d‑lluġat d‑igldan.»