anurẓm 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ arra‑yad, ityara gis maylli‑d‑issbayyn yasuɛ lmasiḥ, ifk‑as‑t rbbi baš a‑d‑iml i‑ih̬ddamn‑ns ma‑d‑iqqann a‑ijru ġ‑mayd‑d‑yakmurn. yazn‑d yal‑lmalak a‑t‑id‑issbayyn i‑uh̬ddam‑ns yuḥanna.

² ar‑yaddr yuḥanna kullu ma‑iẓra, ifk tugga‑ns f‑wawal‑ad n‑rbbi ula lh̬bar‑ad n‑yasuɛ lmasiḥ.

³ ambarki a‑iga wanna yaqran iwaliwn‑ad n‑rbbi. imbarkin ad‑gan winna‑yasn‑sflidnin ar‑skarn s‑mayd ityaran, ašku yakmur‑d‑uzmz lli‑ġ‑rad‑kullu‑jrunt‑tġawsiwin‑ad.

lmjd n‑yasuɛ lmasiḥ

⁴ f‑ufus n‑yuḥanna i‑ssa n‑imnaggarn n‑aytmatn ġ‑tmazirt n‑asiyya. ad‑awn‑tili lbaraka d‑sslamt zġ‑walli illan ikka‑ttin illa rad‑bdda‑yili, ula zġ‑ssa l‑larwaḥ lli‑iwalan lɛrš‑ns,

⁵ ula zġ‑yasuɛ lmasiḥ lli‑igan inigi iṣḥan, ig amzwaru lli‑d‑inkrn zġ‑lmut, ig wad iḥkamn ġ‑igldan n‑ddunit. nttan a‑ginnġ‑iḥnnan ifsi‑aġ s‑idammn‑ns zġ‑iskraf n‑ddnub‑nnġ,

⁶ irar‑aġ a‑ng ayt‑tgldit n‑rbbi babas f‑a‑n‑nsras ġ‑lgddam‑ns tiwafkiw ma‑s‑a‑itrḍu. nttan a‑mi‑illa lmjd d‑lquwwa, ġilad ula kullu mayd‑d‑iftan, amin.

⁷ hati ra‑d‑iftu ġilad ġ‑gr imdla, ẓrn‑t kullu mddn, ẓrn‑t ula ġwilli‑t‑ssyaggasnin. rad‑allant‑kullu‑tmizar n‑ddunit f‑ssibt‑ns. ġmkad a‑ra‑yili, amin.

⁸ «nkki giġ wad izwarn, gġ wad iggʷran.» ġmkad a‑s‑inna sidi rbbi lli‑iḥkamn kullu ma‑illan. ikka‑ttin illa, yili, rad‑bdda‑yili.

iban lmasiḥ i‑yuḥanna

⁹ imma nkki yuḥanna gʷmatun d‑usmun‑nnun ġ‑tnukmut ula tagldit ula ṣṣbr lli‑aġ‑illan s‑ism n‑yasuɛ, lliġ ġ‑igzir n‑baṭmus tyamaẓġ f‑ssibt n‑tbrraḥt n‑wawal n‑rbbi ula f‑tugga n‑yasuɛ.

¹⁰ hati ġ‑wass n‑siditnnġ yiwi‑iyi rruḥ lqudus, s‑sfldġ i‑wawal itjhhdn zund nnffar isawl‑d ġ‑tġurdin‑inu

¹¹ yini‑yyi: «ara mayd ra‑tẓrt ġ‑yan‑warra, taznt‑t s‑ssa n‑imnaggarn, i‑afsus ula smirna ula bargamus ula tyatira ula sardis ula filadalfya ula lawdikiyya.»

¹² grawlġ ad‑ẓrġ ma‑d‑sri‑isawln, s‑ẓriġ ssa l‑lḥsaki n‑uwrġ,

¹³ ẓrġ ġ‑gr lḥsaki yan irwas i‑bnadm. ilsa tšamir iġzzifn, ibkis zġ‑wammas‑ns s‑yan‑ubkkas n‑uwrġ.

¹⁴ imllul‑bahra‑wazzar‑ns zund taḍut iṣfan nġd adfl, ar‑d‑ssufunt‑walln‑ns zund isufa l‑lɛafit.

¹⁵ ar‑ssmrqiqiyn iḍarn‑ns zund anas iṣfan ityawmzayn s‑ssql. itjhhd‑wawal‑ns zund ijjij n‑isaffn n‑waman ggutnin.

¹⁶ yasi ssa n‑itran ġ‑ufus‑ns afasi, iffuġ‑d zġ‑imi‑ns zund yat taẓẓit imsadn zġ‑snat‑tsgiw. ifaw‑uwdm‑ns zund tafukt n‑ṭuẓẓunt n‑wass.

¹⁷ ġir ẓriġ‑t ḍrġ‑n ġ‑dar iḍarn‑ns zund iġ‑mmutġ. isrs‑d flla afus‑ns afasi yini‑yyi: «ad‑ur‑tiksaṭṭ. nkki a‑igan amzwaru ula amggʷaru,

¹⁸ gġ bab n‑tudrt. kkiġ‑ttin mmutġ, walaynni ha‑yyi ddrġ ġilad ula kullu mayd‑d‑iftan. ṭṭafġ tisura l‑lmut ula adġar n‑willi mmutnin.

¹⁹ imma kiyi, ara mayd tẓrit, ma‑illan ġilad ula ma‑ra‑yili tigira.

²⁰ ġmkad a‑tga lmɛna n‑ssa n‑itran lli‑tẓrit ġ‑ufus‑inu afasi ula ssa l‑lḥsaki n‑uwrġ. ssa n‑itran‑an, gan lmalayka n‑ssa n‑imnaggarn, imma ssa l‑lḥsaki gant imnaggarn s‑ssa.