afsus 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tarwa d‑ayt‑darsn

¹ imma kunni a‑tarwa mẓẓinin rad‑awn‑iniġ, skarat s‑wawal n‑ayt‑darun ġmklli ira siditnnġ, ašku mayad iga lḥqq gigun.

² ityara: «awi‑tt ġ‑babak d‑innak.» luṣit‑ad tga tamzwarut lli‑f‑inna rbbi ra‑ibark ġwilli srs skarnin,

³ ašku izuyd inna: «baš ad‑ak‑yili lh̬ir, tġzzif tudrt‑nnk f‑wakal.»

⁴ imma kunni a‑id‑babatsn rad‑awn‑iniġ, a‑ur‑tssqlaqalm tarwa‑nnun, walaynni rbbat‑tn s‑ulmmud n‑siditnnġ ar‑asn‑tmalam mamnk a‑s‑srs‑skarn.

ih̬ddamn d‑id‑siditsn

⁵ imma kunni a‑ih̬ddamn rad‑awn‑iniġ, skarat s‑wawal n‑id‑siditun n‑ddunit‑ad, ar‑tn‑ttuqqarm ar‑ttadrm i‑ih̬f‑nnun ġ‑lgddam‑nsn. skarat s‑iwaliwn‑nsn s‑nniyt n‑uwl‑nnun zund s‑iwaliwn l‑lmasiḥ.

⁶ a‑ur‑tskarm ġir baš a‑kʷn‑ẓrn mddn škrn‑kʷn, walaynni h̬dmat ġmklli‑d‑iqqann ih̬ddamn l‑lmasiḥ, ar‑bdda‑tskarm ma‑ira rbbi s‑nniyt‑nnun.

⁷ h̬dmat s‑lfrḥ zund iġd siditnnġ a‑mi‑tth̬damm urd bnadm,

⁸ tissanm is‑ra‑irar siditnnġ i‑kraygatt yan f‑ma‑iskar ifulki, ig‑iyt ismg nġd win ih̬f‑ns.

⁹ imma kunni a‑id‑siditsn rad‑awn‑iniġ, skarat afulki i‑ih̬ddamn‑nnun bla‑da‑tn‑tssiwidm. ašku tssnm is‑illa yan ġ‑ignna, iga siditsn ig siditun ula kunni, ur‑a‑iskar s‑uwdmawn.

imqlad n‑rbbi

¹⁰ awal‑inu iggʷran iga‑t: dusat ġ‑siditnnġ s‑tdwast‑ns itjhhdn.

¹¹ asiyat kullu imqlad n‑rbbi baš a‑tiẓḍarm a‑ttḍaḍḍam lḥilat n‑iblis.

¹² ašku urd bnadm a‑d‑ntmmaġ, walaynni larwaḥ ʷh̬šnnin ula ljnun tjhhdnin ula ssulṭat n‑ignwan ula lquwwat n‑tillas n‑ddunit‑ad.

¹³ mayan a‑f‑rad‑awn‑iniġ, asiyat kullu imqlad n‑rbbi, baš a‑tiẓḍarm a‑tbiddm tzgam ġ‑wass yʷh̬šnn, tmmaġm ar isiggʷra sul tbiddm.

¹⁴ biddat ġilad tzgam. bkisat s‑tagʷst l‑‹lḥqq›, tgm i‑idmarn‑nnun abannk n‑‹rrḍa n‑rbbi›,

¹⁵ tqqnm i‑iḍarn‑nnun turẓiyin n‑‹zzɛamt s‑tbrraḥt l‑lh̬bar n‑sslamt›,

¹⁶ tasim tamsntlt n‑‹ttiqa ġ‑rbbi› lli‑iẓḍarn a‑n‑fllawn‑tḥṣar kullu iẓḍkan jddrnin lli‑s‑a‑kʷn‑ikkat iblis.

¹⁷ gat f‑ih̬f‑nnun asddul n‑‹ujnjm›, tamẓm ġ‑ufus‑nnun taẓẓit n‑‹wawal n‑rbbi› lli‑awn‑ifka rruḥ lqudus,

¹⁸ ar‑ttẓallam ġ‑kraygatt luqt ġmklli‑awn‑imala rruḥ lqudus, ar‑ttḍalabm rbbi f‑kraygatt kra, trarm lɛaql bla‑da‑ttrmaym, ar‑bdda‑ti‑ttḍalbm a‑itɛawan kullu willi iẓli ad‑gn wins.

¹⁹ ḍalbat rbbi flla ula nkki, ad‑iyi‑iml ma‑rad‑iniġ ġakud nna‑sawalġ s‑mddn, baš a‑tbrraḥġ s‑zzɛamt f‑lh̬bar ifulkin i‑willi ur‑jju‑fllas‑sfldnin.

²⁰ hati ġilad ‹amazan ġ‑iskraf› ad‑giġ f‑ssibt l‑lh̬bar‑ad. ḍalbat rbbi a‑yyi‑iɛawn ad‑sawlġ s‑zzɛamt ġmklli‑yyi‑d‑iqqann.

²¹ imma ġilad, uznġ‑awn‑in tih̬ikus. iga gʷmatnnġ iɛzzan, ig ah̬ddam ifulkin n‑siditnnġ. rad‑awn‑yini kullu f‑mamnk ad‑giġ ula mad‑skarġ.

²² mayad a‑f‑awn‑t‑in‑uznġ, baš a‑tissanm mamnk a‑nga, izzɛam ulawn‑nnun.

²³ ad‑awn‑tili sslamt ay‑aytma kullukn. ḍalbġ rbbi babatnnġ d‑siditnnġ yasuɛ lmasiḥ ad‑awn‑ifk a‑ttḥnnum i‑ngratun ar‑ttamnm bahra.

²⁴ a‑tili lbaraka i‑kullu willi ittirin siditnnġ yasuɛ lmasiḥ s‑tayri idumn.