afsus 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ayt‑tifawt

¹ f‑mayan a‑f‑rad‑awn‑iniġ, ḍfurat rbbi ġ‑ma‑iskar, ġmklli illan f‑tarwa‑ns ɛzzanin.

² tḥnnwat ġ‑kullu mddn ġmklli ginnġ iḥnna lmasiḥ, isrs ih̬f‑ns ġ‑lgddam n‑rbbi f‑ssibt‑nnġ zund yat‑tġrsi ijddrn s‑tujjut imimn.

³ walaynni a‑ur‑darun‑yili ma‑yaddrn lfsad ula ššhwat ʷh̬šnnin ula illa ma‑isawaln f‑ma‑ira a‑issmun i‑ih̬f‑ns. ur‑yukʷi i‑imẓlayn n‑rbbi ad‑sawaln s‑ġmkan.

⁴ anfat i‑ijrman ula tajmmaɛt ih̬wan ula taḍṣa f‑ma‑iɛibn. ur‑tšwi‑tjmmaɛt f‑wan ġayan, walaynni ra‑išwu iġ‑a‑bdda‑ttškarm rbbi.

⁵ ašku iqqan‑kʷn‑d a‑tissanm is‑ur‑ra‑tili taġamt ġ‑tgldit l‑lmasiḥ d‑rbbi i‑yan itfsadn nġd yan iskarn s‑ššhwat lli‑ʷh̬šnnin nġd yan ittirin a‑issmun ma‑iggutn i‑ih̬f‑ns. ašku yan ittirin ayda iggutn, iga zund iġ‑a‑itɛbad ilahat n‑ddunit‑ad.

⁶ a‑ur‑tadjm yan a‑kʷn‑ijlu s‑iwaliwn h̬wanin, ašku f‑ssibt l‑lh̬ʷšanat‑an a‑f‑ra‑iḍr lġaḍab n‑rbbi f‑willi srs rurnin tiġurdin‑nsn.

⁷ anfat‑bdda i‑mddn zund ġwin.

⁸ ula kunni tkkam‑ttin tllam ġ‑tillas, imma ġilad twrrim tkšmm s‑tifawt n‑siditnnġ. skarat ġmklli‑d‑iqqann ayt‑tifawt,

⁹ ašku ġ‑tifawt a‑ġ‑tlla‑tmgra n‑ufulki d‑lḥqq d‑kullu ma‑irḍan rbbi.

¹⁰ siggilat a‑tissanm ma‑itrḍun siditnnġ.

¹¹ a‑ur‑tkšmm ġ‑iskkirn h̬wanin n‑ayt‑tillas‑an walaynni ššḥššamat‑tn,

¹² ašku ġaylli skarn ġ‑tntla, ur‑akkʷ‑nri a‑t‑nbdr.

¹³ imma kullu ma‑d‑iffuġn zġ‑tillas s‑tifawt ra‑d‑iban ġmklli iga,

¹⁴ ula kraygatt kra‑ġ‑tsfaw tifawt ra‑ifaw ula ntta. mayad a‑f‑a‑nttini: «faq, a‑ġwan iṭṭasn, tnkrd‑d zġ‑lmut ad‑ak‑yisfiw lmasiḥ.»

¹⁵ tawiyat‑stt ġ‑ih̬f‑nnun a‑bdda‑tskarm ġmklli‑d‑iqqann ġwilli ssnnin ma‑illan, urd zund ġwilli ur‑ssinnin yat.

¹⁶ skarat afulki nna‑mi‑tufam kraygatt tasaɛt, ašku iggut ma‑yʷh̬šnn ġ‑uwssan‑ad.

¹⁷ a‑ur‑tjlum d‑ih̬f‑nnun walaynni ẓrat ma‑gigun‑ittiri rbbi.

¹⁸ a‑ur‑tssnufulm ih̬f‑nnun s‑tissi lli‑ithlakn mddn, walaynni tɛmmarat s‑rruḥ lqudus

¹⁹ ar‑tsawalm i‑ngratun s‑iwaliwn n‑imurign n‑rbbi ula tahlilat ula talġatin nna‑yawn‑imala rruḥ lqudus, ar‑ttirirm ar‑ttasim amarg i‑siditnnġ zġ‑uwlawn‑nnun,

²⁰ ar‑bdda‑ttškarm rbbi babatnnġ f‑kraygatt kra s‑ism n‑siditnnġ yasuɛ lmasiḥ.

timġarin d‑irgazn

²¹ illa f‑kud yan a‑isflid s‑wayyaḍ. ġmkad a‑s‑ra‑ttuqqarm lmasiḥ.

²² wa‑timġarin, sflidamt s‑irgazn‑nnunt ġmklli tsflidmt s‑siditnnġ.

²³ ašku argaz iga ih̬f n‑tmġart, ġmklli iga lmasiḥ ih̬f n‑umnaggar n‑willi ganin wins. ig‑umnaggar ddat l‑lmasiḥ, ig ntta anjjam‑ns.

²⁴ hati illa f‑tmġart a‑bdda‑tsflid s‑urgaz‑ns ġmklli isflid‑umnaggar s‑lmasiḥ.

²⁵ imma kunni a‑irgazn, tḥnnwat ġ‑tmġarin‑nnun, ġmklli iḥnna lmasiḥ ġ‑umnaggar ifk tudrt‑ns fllas

²⁶ baš a‑t‑iẓli s‑wawal‑ns, issġus‑t s‑usird n‑waman.

²⁷ ġmkan a‑iskr baš a‑t‑yawi zund yat‑tslit ifulkin ġ‑ur‑tlli kra n‑trkkut ula kra n‑iniḍi ula kra igan zund ġayan, baš a‑zgis‑iskr amnaggar amẓlay s‑lmjd iggutn bla gis illa kra yʷh̬šnn.

²⁸ ġmkad a‑s‑illa f‑urgaz a‑itḥnnu ġ‑tmġart‑ns zund ddat‑ns. ašku yan itḥnnun ġ‑tmġart‑ns, hati ih̬f‑ns a‑ġ‑a‑itḥnnu.

²⁹ ur‑illi ma‑itkrhun ddat‑ns, walaynni ar‑tt‑iššuša ar‑tt‑gis‑itawi. ġmkad a‑s‑a‑stt‑itawi lmasiḥ ġ‑umnaggar n‑willi ganin wins.

³⁰ imma nkkʷni nga igzman n‑ddat‑ns,

³¹ ġmklli ityaran: «mayan a‑f‑ra‑ifl‑urgaz babas d‑innas imun d‑tmġart‑ns. hatnin sin rad‑wrrin gn yan.»

³² awal‑ad tlla gis yat lmɛna intln, ašku imla‑yaġ f‑tamunt l‑lmasiḥ d‑umnaggar‑ns.

³³ walaynni imla‑yaġ‑daġ is‑illa f‑kraygatt yan gigun a‑bdda‑itḥnnu ġ‑tmġart‑ns zund ih̬f‑ns, yili f‑tmġart a‑bdda‑tsflid s‑urgaz‑ns.