afsus 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

igzman n‑ddat

¹ imma ġilad ra‑kʷn‑ḍalbġ bahra, nkki‑ad igan aḥbbas f‑ism n‑siditnnġ. ḍalbġ‑kʷn a‑tskarm ġmklli illa f‑willi iẓli rbbi ad‑gn wins.

² ẓẓimẓayat ih̬f‑nnun ar‑ttrh̬um ar‑ttṣbarm ar‑ttḥnnum i‑ngratun.

³ skarat kullu baš a‑bdda‑tgm yan ġ‑tamunt n‑sslamt lli‑s‑kʷn‑d‑issmun rruḥ lqudus.

⁴ yat‑ddat a‑tgam, yili gigun yan rruḥ, ġmklli darun yan rrja lli‑mi‑kʷn‑iẓli rbbi.

⁵ yili yan siditun ula yan‑uġaras lli‑s‑tumnm ula yan‑udum lli‑s‑tddmm ġ‑waman.

⁶ yili yan rbbi babas n‑kraygatt yan, ar‑kʷn‑itgabal, ar‑srun‑iskar afulki, ar‑gigun‑itbarak kullukn.

⁷ kraygatt yan ginnġ, ttyawfka‑yas kra l‑lbaraka s‑unšk lli‑tlla‑twafka l‑lmasiḥ.

⁸ ġmklli ityaran: «ġakud lliġ yattuy s‑tattuyt, yawi dids ġwilli inra, ifk lbarakat i‑mddn.»

⁹ walaynni mad‑aġ‑imla‑wawal‑ad ‹yattuy›? imla‑yaġ f‑lmasiḥ is‑igguz zwar s‑tdrut n‑wakal.

¹⁰ ašku ġwalli‑d‑igguzn a‑igan ġwalli yattuyn tigira s‑iggi n‑ignwan baš a‑ikmml kullu ma‑illan ġ‑kraygatt mani.

¹¹ nttan a‑ifkan i‑kra ginnġ ad‑gn irqqasn‑ns, ifk i‑wiyyaḍ ad‑sawaln s‑mad‑asn‑imala rbbi, ifk i‑wiyyaḍ ad‑tbrraḥn s‑lh̬bar ifulkin, ifk i‑wiyyaḍ ad‑tgabaln ar‑sslmadn mddn‑ns

¹² baš ad‑iẓḍarn kullu imẓlayn n‑rbbi ad‑qasan tawuri n‑rbbi ar‑ssdusn ddat l‑lmasiḥ.

¹³ ġmkad a‑s‑rad‑kullu‑ntzayad ġ‑uġaras l‑lmasiḥ ard nwrri ng yan, nissan yus n‑rbbi ġmklli iga, nwrri nimġur zund lmasiḥ s‑tmuġra‑ns ikmmln.

¹⁴ ur‑sul‑ra‑ng zund tarwa mẓẓinin, ar‑tn‑itawi‑waḍu n‑kraygatt almmud l‑ljdid, ar‑jllun s‑lḥilat n‑imġḍarn lli‑stt‑zzraynin f‑mddn s‑tkrkas.

¹⁵ illa fllannġ a‑nttini lḥqq s‑lḥnant, ar‑ntimġur ġ‑tamunt l‑lmasiḥ lli‑igan ih̬f‑nnġ.

¹⁶ nttan a‑iḥkamn ġ‑ddat ar‑izddi igzman‑ns ar‑tn‑issmyalla, kraygatt agzzum ġ‑illiġ ira. ġmkad a‑s‑ra‑ttimġur ddat ar‑ttdus s‑lḥnant iġ‑a‑iskar kraygatt agzzum ġmklli‑t‑id‑iqqann.

tinbaḍin n‑tudrt l‑ljdid

¹⁷ imma ġilad ra‑kʷn‑uṣṣaġ s‑ism n‑siditnnġ, iniġ‑awn a‑ur‑sul‑tskarm zund ġwilli ur‑ssinnin rbbi. ntni jlan‑tn iswingimn‑nsn bahra,

¹⁸ illas lɛaql‑nsn. aggugn‑in f‑tudrt n‑rbbi, ašku iqqur ih̬f‑nsn iqar‑uwl‑nsn.

¹⁹ wrrin ur‑sul‑a‑tḥšamn ġ‑yat. ar‑skarn kullu mad‑rant ššhwat‑nsn, ar‑zzrayn ussan‑nsn ġ‑ma‑iɛibn, ar‑ttirin a‑tzayadn ġir ġ‑iskkirn‑nsn ʷh̬šnnin.

²⁰ imma kunni, urd ġmkan a‑tlmdm f‑lmasiḥ.

²¹ ašku ssnġ is‑tsfldm bahra f‑yasuɛ, tlmdm lḥqq ġmklli‑t‑id‑issbayyn ntta.

²² tlmdm is‑kʷn‑ih̬ṣṣa a‑tbddlm zġ‑ugʷns‑nnun, a‑ur‑sul‑tgm ġmklli tgam ġayd izrin lliġ ttin‑tkkam ar‑tskarm ma‑ira ih̬f‑nnun, tġalm is‑išwa, ur‑tssinm is‑a‑kʷn‑itawi s‑lhalak.

²³ tlmdm is‑kʷn‑ih̬ṣṣa a‑tadjm rbbi a‑kʷn‑iskr zġ‑ljdid ġ‑kullu ma‑ttirim ula ma‑tswingimm,

²⁴ baš a‑twrrim tgm mddn l‑ljdid. ašku iskr‑kʷn rbbi zġ‑ljdid baš a‑tfulkim ġmklli ifulki ntta, ar‑tskarm kullu ma‑t‑itrḍun.

²⁵ mayan a‑f‑rad‑awn‑iniġ, kkisat fllawn kullu tikrkas. illa f‑kud yan a‑isawal d‑gʷmas s‑lḥqq, ašku nga kullwaġ yan ġ‑ddat l‑lmasiḥ.

²⁶ iġ‑tqlaqlm a‑ur‑tadjm ġayan a‑kʷn‑idḥi ard tskrm kra yʷh̬šnn. ssittiyat aqlaqal‑an ur‑ta‑n‑tḍr tafukt,

²⁷ baš a‑ur‑tadjm i‑iblis manizġ a‑n‑srun‑ikšm.

²⁸ imma wanna igan amh̬h̬ar, ih̬ṣṣa‑t a‑ur‑sul‑itakʷr. yili fllas a‑igr ġ‑kra n‑twuri, ih̬dm s‑ifassn‑ns ġ‑kra išwan, baš a‑dars‑yili ma‑yakka i‑willi ur‑dar yat.

²⁹ a‑ur‑tadjm kra n‑iwaliwn ʷh̬šnnin a‑tkkan infurn‑nnun. sawalat s‑iwaliwn šwanin lli‑ra‑iɛawn ġwilli sflidnin ġ‑maylli ḥtajjan, awin‑asn‑d lbaraka.

³⁰ a‑ur‑tti‑tssṭiyyarm i‑rruḥ lqudus n‑rbbi lli‑awn‑ifka baš a‑ig tamatart n‑is‑tgam wins ar‑d‑iruḥ‑wass lli‑ġ‑ra‑kʷn‑ifukku zġ‑ddunit‑ad.

³¹ a‑ur‑ttẓim ula‑da‑ttmmaġm ula‑da‑ttkrhum yan. a‑ur‑trggmm ula‑da‑ttġuwwatm ula‑da‑ttnuwwašm ġ‑yan.

³² illa fllawn a‑ttḥnnum ar‑ttfulkim ar‑ttṣamaḥm i‑ngratun ġmklli‑awn‑iṣamḥ rbbi f‑ssibt l‑lmasiḥ.