afsus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawuri n‑bulus ġ‑gr ayt‑tmizar yaḍni

¹ mayan a‑f‑a‑fllawn‑tḍalabġ rbbi, nkki bulus lli‑igan aḥbbas f‑ism l‑lmasiḥ yasuɛ f‑ssibt n‑twuri lli‑skarġ ġ‑gratun kunni n‑tmizar yaḍni.

² is‑ur‑tsfldm f‑mamnk ad‑iyi‑ifk rbbi lbaraka‑yad baš ad‑awn‑tt‑in‑sslkmġ s‑darun kunni?

³ imla‑yyi‑d taġawsa‑yad lli‑intln kullu ġayd izrin, uriġ‑awn‑in fllas kra ġ‑tbrat‑ad.

⁴ iġ‑tġram maylli uriġ ra‑tissanm taġawsa‑yad l‑lmasiḥ ġmklli‑stt‑fhmġ nkki.

⁵ trgs f‑kullu tasutin lli‑zrinin, imma ġilad issbayyn‑aġ‑tt‑id rbbi s‑tḥkimt n‑rruḥ lqudus i‑ġwid iẓli ad‑gn irqqasn‑ns ula lanbiya‑ns.

⁶ iml‑aġ‑d lh̬bar ifulkin n‑is‑rad‑kšmn ayt‑tmizar yaḍni ġ‑lbarakat n‑ayt‑rbbi ula ġ‑umnaggar n‑willi ganin wins, amẓn ula ntni kullu ma‑inna rbbi rad‑aġ‑t‑ifk f‑uwdm l‑lmasiḥ yasuɛ.

⁷ ibark‑iyi rbbi ifk‑iyi ad‑skarġ tawuri‑ad l‑lh̬bar ifulkin s‑tḥkimt‑ns itjhhdn lli‑gigi‑illan.

⁸ wah̬h̬a mẓẓiġ bahra ġ‑gr kullu imẓlayn n‑rbbi, ifka‑yyi lbaraka‑yad ad‑tbrraḥġ i‑ayt‑tmizar n‑ddunit f‑tmih̬ar l‑lmasiḥ lli‑ugʷrnin kullu iswingimn n‑bnadm.

⁹ ifk‑iyi ad‑malaġ i‑kullu mddn taġawsa‑yad ihiyyan lli‑fllasn‑intln kullu ġayd izrin, iqṣad‑stt rbbi lli‑ih̬lqn kullu ma‑illan.

¹⁰ ašku ġilad f‑ufus n‑umnaggar n‑imẓlayn‑ns a‑f‑ira rbbi a‑issbayyn i‑ssulṭat ula lquwwat n‑ignwan mnšk a‑bahra‑tggut‑tḥkimt‑ns

¹¹ lli‑s‑ikmml f‑ufus l‑lmasiḥ yasuɛ siditnnġ maylli iqṣad zġ‑isizwar.

¹² f‑ssibt n‑ma‑iskr lmasiḥ ula f‑ssibt n‑ma‑srs‑numn a‑f‑nẓḍar a‑n‑nakmur s‑rbbi ġilad bla‑da‑ntḥšam ula‑da‑ntiksaḍ.

¹³ f‑mayan a‑f‑rad‑awn‑iniġ, a‑kʷn‑ur‑tigʷraẓ f‑urfufn‑ad ġ‑a‑zrayġ f‑ssibt‑nnun, ašku ar‑t‑zzrayġ baš ad‑awn‑ig lh̬ir kunni.

lḥnant l‑lmasiḥ

¹⁴ mayan a‑f‑ḍrġ f‑ifaddn‑inu ġ‑lgddam n‑rbbi babatnnġ.

¹⁵ nttan a‑ifkan ism‑ad‑ns ‹babatnnġ› i‑kullu‑winna dar tarwa ġ‑ignna ula ġ‑ddunit.

¹⁶ ḍalbġ‑t ad‑awn‑yakka zġ‑tmih̬ar l‑lmjd‑ns, issdus‑kʷn ġ‑ugʷns‑nnun s‑tḥkimt itjhhdn n‑rruḥ‑ns,

¹⁷ baš a‑izdġ lmasiḥ ġ‑uwl‑nnun ġmklli srs tumnm. ḍalbġ‑t a‑kʷn‑iẓẓu ġ‑lḥnant izzga‑kʷn gis,

¹⁸ baš a‑tiẓḍarm a‑tfhmm, kunni ula kullu imẓlayn n‑rbbi, mnšk a‑s‑tusɛa tiġzzif tattuy tdru lḥnant l‑lmasiḥ,

¹⁹ tssḥssum ġ‑uwl‑nnun s‑lḥnant‑ns lli‑bahra‑yugʷrn tawassna n‑bnadm, ard twrrim tɛmmrm kullu s‑ufulki n‑rbbi.

²⁰ imma ġilad a‑nalġ rbbi lli‑iẓḍarn a‑iskr uggʷar n‑kullu ma‑nḍalb ula kullu ma‑nswingim s‑tḥkimt‑ns itjhhdn lli‑ginnġ‑illan.

²¹ ad‑as‑yili lmjd ġ‑umnaggar ula ġ‑lmasiḥ yasuɛ ġ‑kud tasut n‑tasutin, ġilad ula kullu mayd‑d‑iftan, amin.