afsus 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmut ula tudrt

¹ imma kunni ġayd izrin tgam zund iġ‑tmmutm i‑ma‑igan win rbbi, f‑ssibt n‑ddnub‑nnun ula kullu ma‑tskarm yʷh̬šn.

² tkkam‑ttin ar‑ttidum ġ‑uġaras n‑ddunit‑ad, ar‑ttḍfarm lquwwa yʷh̬šnn lli‑itjhhdn ġ‑ignwan. tga rruḥ lli‑itḥkamn ġilad ġ‑ġwilli ur‑sflidnin s‑rbbi.

³ nkka‑ttin kullwaġ ar‑didsn‑nttidu ġ‑uġaras‑an ar‑nskar s‑kullu ma‑ira bnadm i‑ih̬f‑ns ar‑tt‑ntawi ġir ġ‑iswingimn‑nnġ ula ššhwat‑nnġ. ula nkkʷni ġ‑uwssan‑an, illa fllannġ lġaḍab n‑rbbi zund kullu mddn.

⁴ imma rbbi, tggut dars rrḥmt, iḥnnu ginnġ s‑lḥnant‑ns iggutn,

⁵ issddr‑aġ d‑lmasiḥ ġakud lliġ sul nmmut ġ‑ddnub‑nnġ. hati s‑lḥnant n‑rbbi a‑s‑tnjmm.

⁶ issnkr‑aġ‑d yall‑aġ d‑lmasiḥ yasuɛ, issgawr‑aġ dids ġ‑tgldit n‑ignna,

⁷ baš a‑iml, ġilad ula kullu mayd‑d‑iftan, mnšk a‑s‑bahra‑tggut lḥnant‑ns lli‑s‑aġ‑ibark f‑ssibt l‑lmasiḥ yasuɛ.

⁸ hati f‑lḥnant‑ns a‑f‑tnjmm lliġ srs tumnm. urd f‑ssibt n‑kra tskarm kunni, walaynni tga tawafka ifka‑yawn‑tt rbbi.

⁹ urd f‑ssibt n‑ifulkitn‑nnun, baš a‑ur‑yalġ yan ih̬f‑ns.

¹⁰ ašku rbbi ad‑aġ‑iskrn ġmkan, ig‑aġ d‑win lmasiḥ yasuɛ baš a‑ntnawal ifulkitn lli‑aġ‑zwar‑ijjujad a‑tn‑nskar.

sslamt lli‑aġ‑iskr lmasiḥ

¹¹ swingimad‑d ma‑tgam ġayd izrin, kunni lli‑ur‑igin zġ‑ayt‑rbbi. ar‑awn‑ttinin ‹ġwilli ur‑ẓẓullinin› ašku ur‑a‑ttẓallam i‑ddat‑nnun zund ntni.

¹² ur‑ta‑tssinm lmasiḥ ġ‑uwssan‑an, tilim ġ‑brra n‑ayt‑rbbi lli‑iẓli ad‑gn mddn‑ns. ur‑darun taġamt ġ‑id‑lɛhd lli‑s‑a‑yasn‑imala ma‑rad‑asn‑iskr. ur‑darun rrja, ula tssnm rbbi ġ‑ddunit.

¹³ imma ġilad issakmur‑kʷn‑d s‑dars f‑ssibt l‑lmut l‑lmasiḥ yasuɛ, kunni lli‑sttin ikkan taggugm‑n.

¹⁴ ašku iskr lmasiḥ sslamt ġ‑gr ayt‑rbbi d‑ayt‑tmizar yaḍni, irar sin ad‑gn yan, issḍr aġʷrab n‑taẓit lli‑tn‑issngaran.

¹⁵ issitti ššrɛ s‑luṣiyat‑ns ula lfrayḍ‑ns, baš a‑issmun sin‑ad s‑sslamt, iskr zġ‑gisn yat tasut l‑ljdid lli‑ra‑ig tins.

¹⁶ ġmkan a‑s‑iskr sslamt ġ‑gratnnġ kullwaġ d‑rbbi s‑lmut‑ns f‑uggjdi, a‑ur‑sul‑tili taẓit i‑ngratnnġ.

¹⁷ lliġ‑d‑yuška lmasiḥ yawi‑d lh̬bar n‑sslamt i‑kunni lli‑n‑aggugnin, wala i‑nkkʷni lli‑srs‑akmurnin.

¹⁸ f‑ssibt l‑lmasiḥ a‑f‑nẓḍar ġilad a‑kullu‑nkšm s‑dar rbbi babatnnġ s‑yan‑rruḥ lli‑ginnġ‑illan kullwaġ.

¹⁹ ur‑sul‑tgim ibrraniyn ula iġribn, ašku teṭṭafm ula kunni ġilad taġamt ġ‑gr imẓlayn n‑rbbi, tgm zġ‑ayt‑tgmmi n‑rbbi

²⁰ lli‑ibnnu f‑llsas n‑irqqasn d‑lanbiya, ig lmasiḥ yasuɛ aẓru imqqurn n‑uġẓu.

²¹ nttan a‑d‑issmunn iẓran, ar‑srsn‑ibnnu yat‑tgmmi n‑tẓallit ttyawẓlay i‑siditnnġ.

²² ula kunni ar‑srun‑ibnnu baš a‑kullu‑ng yat‑tgmmi, izdġ gis rruḥ n‑rbbi.