afsus 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus arqqas l‑lmasiḥ yasuɛ ġmklli ira rbbi. i‑imẓlayn n‑rbbi ġ‑tmdint n‑afsus lli‑zganin ġ‑uġaras l‑lmasiḥ yasuɛ.

² ad‑awn‑tili lbaraka d‑sslamt zġ‑rbbi babatnnġ d‑siditnnġ yasuɛ lmasiḥ.

lbarakat lli‑s‑aġ‑ibark rbbi

³ ar‑bahra‑ntalġ rbbi babas n‑siditnnġ yasuɛ lmasiḥ, ašku ibark‑aġ f‑uwdm l‑lmasiḥ s‑kullu lbarakat n‑rruḥ lli‑llanin ġ‑tgldit n‑ignna.

⁴ lliġ ur‑ta‑ih̬lq ddunit, iẓli‑aġ d‑lmasiḥ baš a‑ng wins, nġus ġ‑iẓri‑ns zġ‑kullu ma‑igan lɛib. iḥnnu ginnġ

⁵ iqṣad ad‑aġ‑ig d‑tarwa‑ns f‑uwdm n‑yasuɛ lmasiḥ. ġmkan a‑ira, irḍu srs.

⁶ ar‑t‑bahra‑ntalġ f‑lḥnant‑ad iggutn lli‑s‑aġ‑ibark f‑uwdm n‑yus iɛzzan

⁷ lli‑aġ‑ifran zġ‑lhalak s‑idammn‑ns, issitti fllannġ ddnub‑nnġ. matta ġunškad s‑tggut lḥnant n‑rbbi lli‑s‑aġ‑ibark,

⁸ ula tawassna‑yad d‑tḥkimt‑ad lli‑aġ‑d‑issbayyn.

⁹ ašku issbayyn‑aġ‑d taġawsa‑yad intln, iml‑aġ‑d ma‑ira a‑iskr irḍu srs iqṣad‑t f‑ufus l‑lmasiḥ,

¹⁰ yiri a‑t‑issafu ġ‑isiggʷra n‑ddunit. hati ra‑issmun kullu ma‑illan ġ‑ignna ula ġ‑ddunit, ig‑t kullu ġ‑ddu‑ufus l‑lmasiḥ.

¹¹ rbbi iẓli‑aġ d‑lmasiḥ ula nkkʷni baš a‑ng mddn‑ns, ġmklli iqṣad nttan lli‑bdda‑iskarn ma‑ira ġ‑kullu ma‑ijrrun.

¹² iẓli‑aġ baš a‑d‑ginnġ‑iban lmjd‑ns, nkkʷni lli‑izwarn is‑n‑nga rrja‑nnġ ġ‑lmasiḥ.

¹³ ula kunni, twrrim tgam wins lliġ‑kʷn‑in‑ilkm‑wawal l‑lḥqq, a‑t‑igan d‑lh̬bar ifulkin lli‑s‑tnjmm. lliġ tumnm s‑lmasiḥ ityawfka‑yawn rruḥ lqudus lli‑f‑inna rbbi ra‑t‑ifk i‑mddn‑ns, baš a‑tissanm izd wins a‑tgam.

¹⁴ iga tamatart n‑is‑ra‑issafu rbbi kullu timih̬ar lli‑f‑inna ra‑tnt‑ifk i‑mddn‑ns. matta ġunškad s‑iggut lmjd n‑rbbi, ar‑t‑ntalġ bahra.

bulus iḍalb rbbi a‑ibark ayt‑afsus

^15-16 f‑mayad a‑f‑a‑bdda‑fllawn‑tškarġ rbbi, ašku sfldġ f‑mamnk a‑tumnm s‑siditnnġ yasuɛ, ɛzzan darun imẓlayn n‑rbbi kullutn. ġakud nna‑tẓallaġ ar‑kʷn‑d‑swingimġ,

¹⁷ ar‑tḍalabġ babatnnġ imqqurn lli‑igan rbbi n‑siditnnġ yasuɛ lmasiḥ ad‑awn‑yakka rruḥ n‑tḥkimt d‑twassna baš a‑ti‑tissanm ġmklli iga.

¹⁸ ar‑ti‑tḍalabġ a‑irẓm alln l‑lɛaql‑nnun, baš a‑tissanm ma‑iga rrja‑yad iṣḥan lli‑mi‑kʷn‑iẓli, ula lbarakat ggutnin lli‑ra‑ifk i‑imẓlayn‑ns,

¹⁹ ula taḥkimt‑ns lli‑bahra‑ginnġ‑itjhhdn nkkʷni lli‑srs‑yumnn. ašku taḥkimt lli‑ginnġ‑illan, tga‑t‑tḥkimt itjhhdn

²⁰ lli‑s‑d‑issnkr lmasiḥ zġ‑lmut, issgawr‑t f‑ufasiy‑ns ġ‑tattuyt n‑tgldit n‑ignna

²¹ f‑uflla n‑kullu lmalayka ula larwaḥ ula ssulṭat ula lquwwat, ig ism‑ns f‑uflla n‑kraygatt ism ġ‑ddunit ula lih̬rt.

²² ig‑t d‑ugayyu f‑kullu ma‑illan, isrs kullu ma‑illan ġ‑ddu iḍarn‑ns s‑lh̬ir n‑umnaggar n‑willi ganin wins.

²³ amnaggar iga ddat l‑lmasiḥ, d‑nttan a‑ġ‑a‑itkmmal lmasiḥ lli‑itkmmaln kullu ma‑illan ġ‑kraygatt mani.