2 timutaws 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

maylli‑d‑iqqann ah̬ddam n‑rbbi

¹ ra‑k‑uṣṣaġ ġilad ġ‑lgddam n‑rbbi d‑lmasiḥ yasuɛ lli‑ra‑d‑yašk a‑ikšm s‑tgldit‑ns yut lḥukm f‑willi ddrnin ula ġwilli mmutnin.

² iniġ‑ak: tbrraḥ s‑wawal n‑rbbi, tbrrḥt srs ġ‑uzmz išqan ula wad irh̬an. rar‑d winna ffuġnin aġaras, tššḥššmt‑tn f‑ddnub nna‑skarn, tzzɛamt‑tn f‑ufulki, ar‑tsslmadt bla‑da‑ttrmayt.

³ han rad‑d‑aškin kra n‑uwssan ġ‑ur‑rad‑sflidn mddn s‑ulmmud yʷġẓann. rad‑trḍun iguyya‑nsn ar‑ssigatn i‑ih̬f‑nsn imslmdn lli‑rad‑asn‑ittini ma‑tn‑iɛjbn.

⁴ ur‑rad‑irin ad‑sfldn s‑lḥqq, walaynni ra‑stti‑tawin ġir ġ‑tḥajiyin h̬wanin.

⁵ imma kiyi ih̬ṣṣa‑k a‑bdda‑tġwit ġ‑ih̬f‑nnk, tṣbrt i‑trfufnt, ar‑tth̬damt s‑tbrraḥt l‑lh̬bar ifulkin. skar kullu ma‑d‑iqqann wad igan ah̬ddam n‑rbbi.

⁶ imma nkki, tlkm‑d tasaɛt lli‑ġ‑ra‑n‑srsġ tudrt‑inu ġ‑lgddam n‑rbbi, ffuġġ ddunit‑ad.

⁷ ha‑yyi nriġ tikrrayin lli‑kkatġ, kmmlġ aġaras lli‑ġ‑a‑tazzalġ, sul zgaġ ġ‑liman.

⁸ rad‑iyi‑yili ttaj ġilad n‑yan irḍan rbbi. iḥḍa‑yyi‑t siditnnġ lli‑bdda‑iḥkamn s‑lḥqq, baš ad‑iyi‑t‑ifk ġ‑wass lli‑ġ‑ra‑d‑yašk. urd ġir nkki a‑mi‑ra‑yili, walaynni ra‑t‑ifk i‑kullu willi‑n‑gis‑rjanin ar‑srs‑tqln.

lah̬bar n‑aytmatn

⁹ g‑n tiqqi‑nnk a‑d‑dari‑taškt ġ‑mayd‑d‑yakmurn.

¹⁰ ašku ifl‑iyi ḍimaṣ iddu s‑tmdint n‑tasaluniki, iwrri ar‑ittiri tiġawsiwin n‑ddunit‑ad. iddu ula kriskins s‑tmazirt n‑galaṭiyya, iddu tiṭus s‑tmazirt n‑dalmaṭiyya.

¹¹ ġir luqa a‑didi‑iqaman. riġ a‑tzrit dar marqus tawit‑t‑id didk, ašku iẓḍar a‑yyi‑iɛawn ġ‑twuri.

¹² imma tih̬ikus uznġ‑t s‑afsus.

¹³ iġ‑di‑tuškit tawit‑iyi‑d aslham lli‑n‑flġ ġ‑dar karbus ġ‑tmdint n‑truwwas. tawid‑d ula arratn, riġ bahra ġwilli ganin win ilm.

¹⁴ kigan d‑lh̬ʷšant ad‑iyi‑iskr iskandr lmɛllm n‑wanas. rad‑as‑irar siditnnġ f‑ġayan.

¹⁵ ih̬ṣṣa‑k a‑zgis‑trart lɛaql ula kiyi, ašku iḍaḍḍ almmud‑nnġ bahra.

¹⁶ tawala tamzwarut ġ‑rurġ awal f‑uṣraḍ‑nsn, ur‑didi‑ibidd yan. fln‑iyi kullutn. a‑ur‑tn‑iḥasb rbbi f‑mayan.

¹⁷ walaynni ibidd didi siditnnġ, issdus‑iyi ad‑asn‑tbrraḥġ s‑lh̬bar ifulkin ġmklli iga. sfldn‑as ibrraniyn kullutn, njmġ nkki zġ‑imi n‑yizm.

¹⁸ ra‑yyi‑ijjnjm siditnnġ zġ‑kullu ma‑yʷh̬šnn, issruḥ‑iyi‑n ġ‑laman s‑tgldit‑ns n‑ignna. nttan a‑bahra‑ntalġ ġilad ula kullu mayd‑d‑iftan. amin.

¹⁹ ar‑n‑tsllamġ f‑briskilla d‑akila, ntni d‑ayt‑tgmmi n‑unisifurus.

²⁰ iqama arastus ġ‑tmdint n‑kurintus, imma trufimus, flġ‑t‑in yuḍn ġ‑militus.

²¹ g‑n tiqqi‑nnk a‑di‑taškt ur‑ta‑di‑tlkim‑tgrst. ar‑n‑fllak‑itsllam yubulus d‑budins d‑linus d‑kludya d‑aytmatn yaḍni kullutn.

²² a‑n‑didk‑yili siditnnġ, tili‑awn lbaraka‑ns.