2 timutaws 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

izmaz šqanin

¹ swangm‑d mayad: ġ‑uwssan ggʷranin rad‑ilin izmaz šqanin.

² ašku rad‑tsalan mddn ġir ih̬fawn‑nsn ar‑tsalan iqaridn, ar‑talġn ar‑ssimġurn agayyu‑nsn ar‑rggmn wiyyaḍ. ur‑rad‑sflidn s‑ayt‑darsn ula‑da‑tškarn yan ula‑da‑ttirin rbbi.

³ ur‑rad‑tḥubbun ula‑da‑tṣamaḥn i‑yan, walaynni rad‑bahra‑rggmn ġ‑wiyyaḍ ar‑tẓin ar‑tmmaġn ar‑tkrhun kullu ma‑ifulkin.

⁴ ur‑rad‑zgan ġ‑wawal‑nsn ula‑da‑tnbaḍn ġ‑ih̬f‑nsn, walaynni rad‑tḥgarn wiyyaḍ. rad‑tlhun s‑kullu ma‑tn‑iɛjbn, ur‑ra‑tlhun s‑ma‑ira rbbi.

⁵ rad‑inin izd imumnn ad‑gan, walaynni ur‑gisn‑tlli‑tḥkimt itjhhdn n‑willi umnnin s‑rbbi. tanf i‑mddn‑an.

⁶ wan ġwid a‑ikššmn s‑tgʷmma zund ingʷmarn, ar‑tt‑zzrayn f‑tmġarin lli‑ur dar lɛaql, ẓẓayn fllasnt ddnub‑nsnt, ar‑tnt‑itawi kullu kra ttirint.

⁷ wan ntnti ar‑bdda‑tlmadnt walaynni ur‑jju‑ẓḍarnt ad‑issannt lḥqq.

⁸ han mddn‑an ihrš lɛaql‑nsn, ffuġn aġaras n‑rbbi, ar‑tḍaḍḍan lḥqq ġmklli sttin ikka yannis d‑yambris ar‑tḍaḍḍan musa.

⁹ walaynni ur‑rad‑bahra‑tzayadn ġ‑ġayan, ašku ra‑iban i‑kullu mddn is‑ffuġn ih̬f‑nsn ġmklli iban ġ‑sin irgazn‑an.

arratn n‑rbbi d‑ulmmud yʷġẓann

¹⁰ imma kiyi, tssnt mad‑sslmadġ ula mamnk ad‑skarġ ula mad‑qṣadġ. tissant mamnk ad‑tamnġ awal n‑rbbi ar‑tṣbarġ ar‑tḥnnuġ ar‑tzayadġ bla‑da‑trmayġ.

¹¹ tissant mnšk ad‑trfufunġ ar‑bahra‑kkatġ tammara. tsfldt f‑mad‑iyi‑ijran ġ‑tmdinin n‑anṭakiyya d‑iquniyya d‑listra. tsfldt f‑trfufnt iggutn lli‑flla‑izrin. walaynni kullu ġayan, ifukka‑yyi siditnnġ zġ‑gis.

¹² ašku kullu wanna iran a‑iskar ma‑irḍan rbbi s‑ism l‑lmasiḥ yasuɛ, tarfufnt a‑ġ‑ra‑izri.

¹³ imma mddn ʷh̬šnnin d‑ayt‑tkrkas rad‑ġir‑tzayadn ġ‑lh̬ʷšant‑nsn s‑uggʷar, jlan ntni ar‑jllun wiyyaḍ.

¹⁴ imma kiyi, iqqan‑k‑id a‑ttzayadt ġ‑maylli tlmdt tamnt srs, ašku tssnt manwi‑t dar tlmdt.

¹⁵ kiyi zġ‑mẓẓiy‑nnk a‑zġ‑tssnt arratn n‑rbbi lli‑ẓḍarnin a‑k‑ssfhmn mamnk a‑tamnt s‑lmasiḥ yasuɛ tnjmt.

¹⁶ hati kullu ma‑illan ġ‑warratn‑ad, rbbi a‑t‑id‑issbayynn. išwa kullu a‑srs‑nsslmad lḥqq, nššḥššm wanna iskrn ma‑yʷh̬šnn, nrar‑d wanna ijlan, nml mamnk a‑nskar afulki lli‑s‑irḍa rbbi.

¹⁷ ġmkad a‑s‑ra‑yujad‑uh̬ddam n‑rbbi i‑twuri‑ns, yiẓḍar a‑iskar kullu ma‑ifulkin.