2 timutaws 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

aɛskri ifulkin l‑lmasiḥ

¹ zayd a‑iwi, ar‑ttdust s‑lbaraka l‑lmasiḥ yasuɛ.

² maylli mi zgigi tsflidt ġ‑gr inagan ggutnin, akka‑t ġ‑gr ifassn n‑mddn zganin ẓḍarn ad‑sslmadn wiyyaḍ.

³ bkis ar‑didnnġ‑ttrfufunt zund aɛskri ifulkin l‑lmasiḥ yasuɛ.

⁴ yan igan aɛskri ġ‑imiġ ur‑ra‑ilhu ih̬f‑ns s‑tġawsiwin yaḍni n‑ddunit‑ad, ašku ra‑yiri a‑itrḍu anmġur‑ns.

⁵ ula yan iskrn šala n‑tizzla, ur‑rad‑as‑yili ttaj n‑umzwaru abla iġ‑iskr s‑limur n‑tizzla.

⁶ afllaḥ lli‑ith̬damn s‑nniyt, nttan a‑isthllan a‑yasi taġamt tamzwarut ġ‑tmgra.

⁷ swangm ġ‑mayd‑ak‑nniġ, ra‑k‑issfhm siditnnġ kullu mayad.

⁸ swangm‑d yasuɛ lmasiḥ. iga zġ‑tasut n‑ugllid dawd, inkr‑d zġ‑lmut, ġmklli ittini lh̬bar ifulkin lli‑s‑a‑tbrraḥġ.

⁹ hati f‑ssibt l‑lh̬bar‑ad a‑f‑a‑trfufunġ, qqnġ s‑ssnasl zund yan iffuġn lqanun. walaynni ur‑akkʷ‑iqqin‑wawal n‑rbbi s‑ssnasl.

¹⁰ mayad a‑f‑a‑kullu‑tṣbarġ, baš ad‑tnjamn imẓlayn n‑rbbi f‑uwdm l‑lmasiḥ yasuɛ, kšmn s‑lmjd idumn.

¹¹ izga‑wawal‑ad: «iġ‑dids‑nmmut ra‑dids‑nddr.

¹² iġ‑a‑ntṣbar ra‑dids‑ntḥkam. iġ‑nenna ur‑t‑nssin ra‑yini ur‑aġ‑issin.

¹³ iġ‑ndda ar iġ‑ur‑sul‑a‑gis‑ntamẓ, rad‑bdda‑ginnġ‑yamẓ, ašku ur‑iẓḍar a‑isskarks f‑ih̬f‑ns.»

aruku iṣlḥn iġus

¹⁴ ssktay‑asn‑d kullu mayad, tamrt‑tn ġ‑lgddam n‑rbbi ad‑ur‑tmjaḥadn f‑iwaliwn, ašku imjaḥadn ur‑a‑tnfaɛn i‑yat. ar‑ġir‑thlakn ġwilli‑asn‑sflidnin.

¹⁵ g‑n tiqqi‑nnk ad‑awn‑ifk rbbi rrḍa‑ns, zund ah̬ddam išwan ur‑ti‑tššḥššim‑twuri lli‑iskr, ar‑tsslmadt awal l‑lḥqq ġmklli iga.

¹⁶ anf i‑tjmmaɛt ih̬wan n‑willi ur‑ssinnin rbbi, ašku ar‑ġir‑tssaggug mddn zġ‑rbbi s‑uggʷar.

¹⁷ han almmud‑nsn iga zund aṭṭan lli‑išttan ddat n‑bnadm. zġ‑gisn himinayus d‑filitus,

¹⁸ jlan ntni zġ‑uġaras l‑lḥqq, ar‑traran ula wiyyaḍ a‑ur‑sul‑amnn. ar‑ttinin ur‑rad‑nkrn mddn ġ‑lih̬rt walaynni ġir ġ‑ddunit‑ad a‑ġ‑d‑nkrn.

¹⁹ walaynni idus llsas lli‑izzugz rbbi ur‑a‑itmussu, ityara gis: «sidi rbbi issn manwi ganin wins.» ityara‑daġ: «wanna innan win sidi rbbi a‑iga, iqqan‑t‑id a‑yaggug f‑kullu ma‑yʷh̬šnn.»

²⁰ ggutn irukutn ġ‑tgmmi imqqurn. illa gisn ma‑igan win‑uwrġ ula nnuqrt, yili gisn ma‑igan win‑ukššuḍ ula akal. yili gisn ma‑igan i‑umššu ula ma‑igan i‑warras.

²¹ iġ‑isird yan ul‑ns zġ‑irkan, ra‑ig aruku iṣlḥn iġus ġ‑ufus n‑sidis, yujad i‑twuri nna‑ifulkin.

²² aggug zġ‑ššhwat n‑iɛyyaln, tirit a‑tɛmmrt s‑ufulki lli‑s‑irḍa rbbi ar‑ttamnt awal‑ns ar‑ttḥnnut ġ‑wiyyaḍ ar‑tzrayt s‑sslamt, kiyi ula kullu winna aqranin i‑siditnnġ s‑uwl iġusn.

²³ a‑ur‑tkšmt ġ‑imjaḥadn h̬wanin n‑willi ur‑fhimnin ma‑f‑a‑sawaln, ašku tssnt is‑ur‑a‑di‑tawin ġir taẓit.

²⁴ iqqan‑d ah̬ddam n‑siditnnġ a‑ur‑itẓi. illa fllas a‑itfulki d‑kullu mddn, yissan mamnk a‑tn‑isslmad ar‑itṣbar i‑kullu ma‑išqan.

²⁵ s‑lḥnant a‑s‑ra‑imala lḥqq i‑winna‑t‑ḍaḍḍnin, irju‑n ġ‑rbbi ad‑asn‑irar ad‑fln kullu ma‑yʷh̬šnn wrrin issann lḥqq,

²⁶ njmn s‑lmɛqul zġ‑tẓqqurt n‑iblis lli‑tn‑iġwin baš ad‑skarn ma‑ira.