2 tasaluniki 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ḍalbat rbbi

¹ imma ġilad ay‑aytmatnnġ, ẓẓallat fllannġ tḍalbm rbbi ad‑aġ‑iɛawn a‑nsslkm lh̬bar n‑siditnnġ ġ‑uwssan‑ad s‑kullu‑tmazirt‑ad baš a‑srs‑sflidn mddn ggutnin ġmklli sfldn ġ‑darun.

² ḍalbat‑t ad‑aġ‑issanf i‑mddn šqanin ʷh̬šnnin, ašku ur‑a‑kullu‑ttirin ad‑amnn.

³ imma siditnnġ iqama‑bdda ġ‑wawal‑ns, ra‑kʷn‑issdus issntal‑kʷn zġ‑walli yʷh̬šnn.

⁴ hati isshnna‑yaġ siditnnġ f‑ssibt‑nnun, nissan is‑a‑tskarm kullu mad‑awn‑nenna rad‑bdda‑ti‑tskarm.

⁵ imma ġilad, nḍalb siditnnġ a‑kʷn‑ihdu baš a‑ttḥnnum ġmklli itḥnnu rbbi, ar‑ttṣbarm ġmklli itṣbar lmasiḥ.

tawuri lli‑d‑iqqann imumnn

⁶ way‑aytmatnnġ, s‑ism n‑siditnnġ yasuɛ lmasiḥ a‑s‑ra‑kʷn‑nuṣṣa ġilad, nini‑awn a‑ttanfm i‑aytmatn nna‑yagʷin ad‑th̬damn ula‑da‑skarn s‑ulmmud lli‑awn‑nsslmd.

⁷ ašku tssnm is‑kʷn‑ih̬ṣṣa a‑tskarm ġmklli nskar nkkʷni, ur‑ngawr ġ‑darun bla‑da‑nth̬dam.

⁸ ur‑jju‑nšši aġrum n‑yan bla‑yas‑nfka atig‑ns. nkka‑ttin ar‑nth̬dam ġ‑iyḍ ula azal, ar‑nkkat takrrayt baš a‑ur‑nẓẓay f‑yan gigun.

⁹ wah̬h̬a darnnġ lḥqq a‑zgigun‑nḍalb ma‑nḥtajja, ur‑jju‑t‑nḍalb. nskr ġmkan baš ad‑awn‑nml mamnk a‑kʷn‑d‑iqqan a‑tskarm ula kunni.

¹⁰ ġakud lliġ didun nlla nenna‑yawn «wanna ur‑irin a‑ih̬dm, ih̬ṣṣa‑t a‑ur‑išš.»

¹¹ imma ġilad nsfld is‑llan kra n‑mddn ġ‑gratun ur‑a‑skarn yat, agʷin tawuri, ar‑kššmn ġir ssuq n‑wiyyaḍ.

¹² zund ġwin, ra‑tn‑nuṣṣa ġilad s‑ism n‑siditnnġ yasuɛ lmasiḥ, nnṣḥ‑tn ad‑th̬damn ass f‑wass baš ad‑amẓn mad‑šttan f‑twuri lli‑skarn.

¹³ way‑aytmatnnġ, skarat afulki bla‑da‑ttrmaym.

¹⁴ ẓrat wanna yagʷin a‑isflid s‑mayd‑awn‑nura ġ‑tbrat‑ad, tanfm‑as baš a‑ti‑tigʷraẓ.

¹⁵ a‑ur‑ti‑tgm d‑unuwwaš‑nnun, walaynni nṣḥat‑t zund yan igan zġ‑aytmatun.

¹⁶ ar‑ntḍalab siditnnġ lli‑igan bab n‑sslamt ad‑awn‑yakka sslamt ġ‑kraygatt tasga d‑kraygatt tasaɛt. a‑didun‑yili siditnnġ kullukn.

¹⁷ nkki bulus, s‑ufus‑inu a‑s‑uriġ awal‑ad n‑sslam, ig tamatart‑inu ġ‑kraygatt tabrat‑inu. ġmkad a‑s‑a‑taraġ.

¹⁸ ad‑awn‑tili lbaraka n‑siditnnġ yasuɛ lmasiḥ kullukn.