2 tasaluniki 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

anuwwaš n‑rbbi

¹ way‑aytmatnnġ, nra ġilad ad‑awn‑nini f‑mamnk a‑ra‑d‑yašk siditnnġ yasuɛ lmasiḥ, nmun kullwaġ baš a‑dids‑nmnaggar.

² walaynni ad‑ur‑tasim taġuft ula tġuwḍm iġ‑tsfldm i‑kra n‑yan ar‑ittini «izri‑wass lli‑ġ‑d‑yuška siditnnġ.» a‑ur‑ti‑tamnm wah̬h̬a iġ‑awn‑inna imla‑yas‑t rruḥ lqudus nġd isfld i‑lh̬bar‑ns nġd iġra‑t ġ‑kra n‑tbrat zġ‑darnnġ.

³ ad‑ur‑tadjm yan a‑kʷn‑ijlu, ašku ur‑ra‑d‑ilkm‑wass‑an ard munn mddn ggutnin ad‑mmaġn d‑rbbi, iban‑d‑unuwwaš n‑rbbi lli‑ra‑iggʷru s‑lhalak.

⁴ ra‑issimġur ih̬f‑ns ar‑itẓi f‑kullu mad‑tɛbadn mddn ula kullu ma‑mi‑tẓallan. ra‑ikšm ula s‑tgmmi n‑rbbi igawr gis yini izd nttan a‑igan rbbi.

⁵ is‑ur‑di‑tswangmm? nniġ‑awn bahra f‑tġawsiwin‑ad ġ‑uwssan lli‑ġ‑didun‑lliġ.

⁶ tissanm ma‑t‑iḥṣarn ġilad baš a‑ur‑d‑iban ard‑d‑ilkm‑uzmz‑ns.

⁷ ašku tanuwwašt intln tbda ġilad ar‑ttzayad, walaynni ġaylli ra‑ijru ur‑ra‑ijru ard ityattay ma‑t‑iḥṣarn.

⁸ ġakudan a‑ra‑d‑iban‑unuwwaš n‑rbbi, yašk‑id ilmma siditnnġ yasuɛ s‑lmjd iggutn, inġ‑t s‑yat tunfust zġ‑imi‑ns ihlk‑t.

⁹ imma anuwwaš‑an, ra‑dars‑tigat‑tḥkimt n‑šiṭan, ra‑izzga tikrkas‑ns s‑lmɛjizat d‑lquwwat d‑tmitar tjhhdnin.

¹⁰ s‑kullu kra igan lh̬ʷšant a‑s‑ra‑ijllu ġwilli llanin ġ‑uġaras l‑lhalak agʷin ad‑irin lḥqq njmn.

¹¹ f‑mayan a‑f‑a‑yasn‑itzayad rbbi aylliġ jlan s‑uggʷar amnn tikrkas‑an.

¹² ġmkad a‑s‑ra‑tḍr lɛqubit f‑kullu willi ur‑umnnin s‑lḥqq frḥn s‑ma‑yʷh̬šnn.

zgayat ġ‑uġaras n‑rbbi

¹³ walaynni iqqan‑aġ‑d a‑bdda‑ntškar rbbi fllawn ay‑aytmatnnġ lli‑f‑iḥnna siditnnġ, ašku iẓli‑kʷn zġ‑isizwar a‑tnjmm, issġus‑kʷn s‑rruḥ lqudus baš a‑tgm wins f‑ssibt n‑ma‑tumnm lḥqq.

¹⁴ kullu mayad, iġra‑yawn‑d srs rbbi s‑lh̬bar ifulkin lli‑awn‑in‑niwi, baš ad‑awn‑tili taġamt ġ‑lmjd n‑siditnnġ yasuɛ lmasiḥ.

¹⁵ imma ġilad ay‑aytmatnnġ, zgayat tamẓm‑bdda ġ‑ulmmud lli‑s‑kʷn‑nsslmd, zund mad‑awn‑nenna s‑imi, zund mad‑awn‑in‑nura s‑ufus.

¹⁶ ar‑ntalġ siditnnġ yasuɛ lmasiḥ d‑rbbi babatnnġ lli‑fllannġ‑iḥnnan ibark‑aġ ifk‑aġ zzɛamt idumn ula rrja iṣḥan.

¹⁷ ar‑t‑ntḍalab a‑bahra‑izzɛam issdus ulawn‑nnun baš a‑tskarm ar‑tsawalm s‑kullu ma‑ifulkin.