2 kurintus 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tamgra l‑lḥnant

¹ ur‑iyi‑ih̬ṣṣa ad‑zaydġ araġ‑awn‑in f‑lmɛawnt lli‑ra‑nawi i‑imẓlayn ġ‑urušalim,

² ašku ssnġ is‑tram bahra a‑tfkm kra. hati ulġġ‑kʷn ġ‑dar ayt‑makiduniyya iniġ‑asn: «asggʷas ayad s‑ujadn ayt‑ah̬aya ad‑ɛawnn» aylliġ iggut ġ‑ayt‑makiduniyya ma‑iwrrin ira a‑ifk kra lliġ sfldn f‑ma‑tnawlm kunni s‑nniyt‑nnun.

³ imma ġilad uznġ‑awn‑in aytmatn‑ad baš a‑tujadm ġmklli‑asn‑nniġ, iban gigun is‑tsthllam maylli fllawn nniġ.

⁴ walaynni iġ‑n‑darun‑uškiġ nkki, munn‑in didi kra n‑ayt‑makiduniyya afn‑kʷn‑in ur‑tujadm, rad‑bahra‑ḥšmġ f‑wawal‑inu, ra‑tḥšmm ula kunni iġ‑tggʷra‑tġawsa‑yad s‑ġmkan.

⁵ mayan a‑f‑swangmġ is‑ra‑yaf iġ‑ḍalbġ aytmatn‑ad a‑yyi‑n‑zwurn s‑darun, baš ad‑jjujadn tawafka lli‑s‑tnnam ra‑stti‑taznm. ġmkan a‑s‑ra‑stt‑in‑afġ nkki tujad s‑lh̬aṭr‑nnun urd s‑bzzez.

⁶ ašku wanna‑n‑iluḥn amud idrusn, idrus ma‑ra‑imgr. imma wanna‑n‑iluḥn amud iggutn, iggut ma‑ra‑imgr.

⁷ illa f‑kud yan a‑iskr maylli iqṣad ġ‑ih̬f‑ns. a‑ur‑ifk s‑bzzez nġd f‑uwdm n‑wiyyaḍ. ašku iɛzza dar rbbi wanna yakkan s‑lfrḥ.

⁸ rbbi iẓḍar a‑kʷn‑ibark s‑tmih̬ar‑ns ggutnin baš ad‑awn‑yili kullu ma‑tḥtajjam, yili‑awn‑daġ ma‑s‑a‑ttɛawanm ġ‑kullu ma‑igan afulki.

⁹ ġmklli ityaran: «ar‑issukut lbarakat‑ns f‑imẓlaḍ. ur‑ra‑sar‑ttmmu lḥnant‑ns.»

¹⁰ rbbi lli‑yakkan amud i‑walli ikkrzn ar‑as‑itzayad aġrum ma‑ištta, nttan a‑rad‑awn‑ifk amud izayd‑awn ma‑iggutn, iskr‑awn tamgra ifulkin zġ‑lḥnant‑nnun.

¹¹ rad‑awn‑issigat lh̬ir baš a‑bdda‑darun‑yili ma‑takkam i‑wiyyaḍ. ġmkan a‑f‑ra‑ti‑tškarn mddn ggutnin f‑mad‑asn‑ttaznm f‑ufus‑nnġ.

¹² ašku lmɛawnt‑ad ra‑tɛmmr imẓlayn n‑rbbi s‑lh̬ir ma‑s‑a‑bahra‑tfraḥn ar‑kullu‑tškarn rbbi.

¹³ iggut ma‑ra‑t‑iškr f‑lmɛawnt‑nnun, ašku ra‑srs‑tmlm is‑a‑tskarm s‑lh̬bar ifulkin l‑lmasiḥ ar‑ttirim a‑ttɛawanm imẓlayn‑an ula kullu mddn.

¹⁴ ra‑kʷn‑bahra‑tḥubbun ntni ar‑fllawn‑tḍalabn rbbi, ašku ibark gigun rbbi s‑lbaraka iggutn.

¹⁵ imma ġilad, a‑bahra‑nškr rbbi lli‑aġ‑d‑ifkan ma‑yugʷrn kullu iswingimn n‑bnadm.