2 kurintus 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmɛawnt lli‑ra‑yawi bulus s‑urušalim

¹ way‑aytma, nra a‑tissanm mnšk a‑ibark rbbi ġ‑imnaggarn ġ‑tmazirt n‑makiduniyya.

² wah̬h̬a zrin ġ‑tnukmut išqan, frḥn bahra. rḍun ad‑fkn kigan, wah̬h̬a idrus mad‑darsn‑illan bahra.

³ nkki giġ inigi n‑is‑fkan unšk lli‑mi‑ẓḍarn, fkn‑nnit uggʷar n‑ma‑mi‑ẓḍarn, rḍun s‑ġmkan.

⁴ ḍalbn‑aġ bahra a‑tn‑nadj ad‑fkn kra ġ‑lmɛawnt lli‑ra‑nawi i‑imẓlayn n‑rbbi ġ‑urušalim, irin ntni ad‑asn‑tili lbaraka n‑tamunt‑ad.

⁵ ur‑nġal ġ‑uwssan‑an is‑rad‑skrn ġunškan, imma ntni fkan ih̬f‑nsn zwar i‑siditnnġ, fkn‑aġ ilmma ih̬f‑nsn ula nkkʷni ġmklli ira rbbi.

⁶ ula kunni, ibda tiṭus ar‑awn‑imala a‑tskarm ġmkan. nḍalb‑t ġilad a‑kʷn‑iɛawn a‑tkmmlm lbaraka n‑twafka‑yad.

⁷ ẓrat mnšk a‑tjhhdm kunni. idus liman‑nnun, tissanm a‑tsawalm, tfhmm ma‑yʷġẓann, ar‑tskarm s‑nniyt, ar‑aġ‑ttḥubbum. imma ġilad nra gigun a‑tjhhdm ula ġ‑lbaraka n‑twafka‑yad.

⁸ urd luṣit ayd‑awn‑nniġ, walaynni mliġ‑awn mad‑skrn wiyyaḍ s‑nniyt‑nsn, baš ad‑aġ‑tmlm izd s‑ṣṣaḥt tḥubbam mddn ula kunni.

⁹ tssnm lḥnant n‑siditnnġ yasuɛ lmasiḥ. wah̬h̬a iṭṭaf ma‑iggutn, iwrri bla yat f‑ssibt‑nnun. ifl kullu ma‑dars‑illan, baš a‑twrrim teṭṭafm ma‑iggutn.

¹⁰ swangmġ nkki is‑rad‑awn‑yaf a‑tkmmlm maylli tbdam asggʷas lli‑izrin, ašku kunni a‑izwarn wiyyaḍ ġ‑maylli tnawlm, tbdum ar‑ti‑tskarm s‑nniyt‑nnun.

¹¹ kmmlat‑t ġilad unšk nna‑mi‑tẓḍarm, tirim a‑ti‑tkmmlm ġmklli‑ti‑tnawlm ġ‑isizwar.

¹² iġ‑tram a‑tfkm s‑nniyt‑nnun, ra‑irḍu rbbi s‑unšk lli‑mi‑tẓḍarm a‑tfkm. ur‑ra‑yiri uggʷar n‑ma‑mi‑tẓḍarm.

¹³ ur‑nniġ mayan baš a‑fllawn‑ẓẓuẓẓayġ ssrh̬uġ i‑wiyyaḍ,

¹⁴ walaynni riġ a‑kullu‑nngadda i‑ngratnnġ. hati ġilad ġ‑darun‑iggut lh̬ir, illa fllawn a‑tɛawnm ġwilli ur‑dar yat. ašku iġ‑idda ard twrrim bla yat wrrin ntni s‑lh̬ir, ra‑kʷn‑ɛawnn ntni ġakudan.

¹⁵ ġmklli ityaran: «ġwalli issmunn kigan, ur‑as‑išaḍ yat. imma ġwalli issmunn imikk, ur‑t‑ih̬ṣṣa yat.»

bulus yuzn tiṭus s‑kurintus

¹⁶ ar‑ntalġ rbbi lli‑iskrn ġ‑uwl n‑tiṭus a‑bahra‑gigun‑iswingim ġmklli gigun nswingim nkkʷni.

¹⁷ lliġ‑t‑nḍalb a‑n‑darun‑yašk, ifrḥ ntta bahra, iskr f‑a‑n‑darun‑yašk s‑lh̬aṭr‑ns.

¹⁸ nazn‑n dids gʷmatnnġ lli‑talġn aytmatn ġ‑imnaggarn kullutn f‑ssibt n‑tbrraḥt‑ns l‑lh̬bar ifulkin.

¹⁹ ẓlin‑t aytmatn n‑imnaggarn ad‑didnnġ‑imuddu ar‑aġ‑itɛawan ġ‑lbaraka n‑twafka‑yad lli‑s‑ra‑iban lmjd n‑siditnnġ ula tayri‑nnġ iṣfan.

²⁰ nra a‑nsslkm lamant‑ad iggutn bla ginnġ iškka yan f‑mamnk a‑ra‑tlkm.

²¹ nrar‑bdda lɛaql baš a‑nskar afulki ġ‑iẓri n‑siditnnġ ula win mddn.

²² nazn‑n didsn yan gʷmatnnġ yaḍni, nẓra mnnawt‑twal mnšk a‑bahra‑ittiri a‑iɛawn wiyyaḍ. d‑nttan, lliġ isfld f‑ma‑tnawlm ifulki, yiri s‑uggʷar ad‑awn‑gis‑iɛawn.

²³ imma tiṭus, iga asmun‑inu ar‑didi‑ith̬dam f‑ssibt‑nnun. imma aytmatnnġ yaḍni, ntni gan imazann n‑imnaggarn ar‑itban lmjd l‑lmasiḥ ġ‑twuri lli‑skarn.

²⁴ mlat‑asn mnšk a‑tn‑ttirim, baš ad‑issann kullu imnaggarn n‑aytmatn is‑tsthllam ġmklli‑kʷn‑ntalġ ġ‑darsn.