2 kurintus 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ way‑aytma ɛzzanin, lliġ‑aġ‑inna rbbi rad‑aġ‑iskr kullu mayad ifulkin, yili fllannġ a‑nġus naggug zġ‑kullu ma‑ra‑issrku ul‑nnġ ula ddat‑nnġ. yili fllannġ a‑ntyawẓlay i‑rbbi s‑ufulki ikmmln, ar‑bahra‑nttiri a‑t‑nrḍu.

ifrḥ bulus s‑ayt‑kurintus

² mlat‑aġ ġilad is‑aġ‑tḥubbam, ašku ur‑jju‑ntɛdda f‑yan ula nssh̬sr yan ula nšša yan.

³ ur‑nniġ is‑tʷh̬šnm, ašku mliġ‑awn yadlli is‑darnnġ‑tɛzzam bahra. yan a‑nga nkkʷni didun, iġ‑nddr ula iġ‑nmmut,

⁴ ašku tiqġ gigun, frḥġ srun, zɛmġ bahra. wah̬h̬a da‑nzray ġ‑tnukmut išqan, frḥġ s‑lfrḥ iggutn.

⁵ lliġ‑d‑nruḥ tamazirt‑ad n‑makiduniyya ur‑nẓḍar a‑nsunfu ġ‑uwssan‑an, ašku tkka‑yaġ‑d‑tnukmut kraygatt tasga. sutln‑aġ išabukn zġ‑brra, tili‑aġ taġuft ġ‑ugʷns.

⁶ walaynni rbbi lli‑issfjjijn ul n‑willi ḍɛfnin, issfjjij‑aġ ula nkkʷni, ašku yiwi‑d tiṭus s‑darnnġ.

⁷ hati nthnna ġilad, urd ġir f‑ssibt n‑ma‑d‑yuška walaynni nthnna ula f‑mklli tssfjjijm ul‑ns. iml‑aġ f‑mamnk a‑yyi‑ttirim bahra, tigʷraẓ‑kʷn f‑maylli ijran, tujadm a‑didi‑tbiddm. ha‑yyi frḥġ bahra s‑lh̬bar‑ad.

⁸ ur‑iyi‑tʷgraẓ ġilad f‑tbrat lli‑awn‑in‑uznġ, wah̬h̬a‑yyi‑fllas‑tʷgraẓ ġ‑uwssan‑an ašku iqama gigun lḥal yan kra.

⁹ hati ġilad frḥġ, urd f‑ssibt n‑mad‑awn‑ṭiyyr walaynni f‑ssibt n‑ma‑gigun‑iqama lḥal aylliġ tskrm ma‑gigun‑ira rbbi. ašku lliġ‑awn‑ṭiyyr, twrrim tswangmm bahra ġ‑ma‑ira rbbi. ur‑awn‑ijli yat f‑ssibt‑nnġ.

¹⁰ ašku yan mi ṭiyyr iswangm ġ‑rbbi, hati ra‑ifl iskkirn‑ns ʷh̬šnnin injm. ur‑ra‑ti‑tigʷraẓ f‑mayan. imma yan mi ṭiyyr iswangm ġ‑ddunit, ur‑rad‑as‑d‑yawi mayan abla lmut.

¹¹ ẓrat maylli tskrm ġakud lliġ‑awn‑ṭiyyr tswangmm ġ‑ma‑ira rbbi. twrrim trurm lɛaql bahra, tirim a‑tmlm is‑ur‑gigun‑illi kra l‑lɛib. ula kunni tbzgm f‑walli iffuġn aġaras, taġ‑kʷn‑tguḍi fllas. tirim ad‑aġ‑trḍum, tujadm a‑fllas‑tḥkamm. hati iban fllawn is‑tskrm kullu ma‑fllawn‑illan ġ‑maylli darun ijran.

¹² wah̬h̬a‑yawn‑in‑uriġ tabrat‑an, ur‑awn‑tt‑in‑uriġ f‑ssibt n‑walli iskrn ma‑yʷh̬šnn nġd ġwalli‑mi‑t‑iskr, walaynni uriġ‑awn‑tt‑in baš ad‑awn‑iml rbbi mnšk a‑ra‑tirim ad‑aġ‑trḍum.

¹³ imma ġilad nthnna f‑kullu mayan. nthnna nkkʷni walaynni nfrḥ s‑uggʷar lliġ nẓra mnšk a‑kullu‑tssfrḥm tiṭus aylliġ ur‑sul‑fllawn‑yusi taġuft.

¹⁴ ġayd izrin ulġġ‑kʷn i‑tiṭus, imma ġilad iban is‑ur‑iyi‑tššḥššimm f‑wawal‑inu. nmla‑yawn‑in lḥqq ġ‑kullu mad‑awn‑nenna ġayd izrin, imma ġilad iban izd lḥqq a‑fllawn‑nenna ula i‑tiṭus.

¹⁵ imma ntta iḥubba‑kʷn ġilad s‑uggʷar, ašku ar‑d‑iswingim mamnk a‑ti‑tqblm, tadrm i‑ih̬f‑nnun tsfldm srs kullukn, tuqqrm‑t bahra.

¹⁶ ula nkki frḥġ s‑kigan ašku ufiġ a‑bahra‑gigun‑gġ laman.