2 kurintus 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ s‑ism n‑rbbi lli‑d‑nh̬dm, nḍalb‑kʷn a‑ur‑tadjm rrḥmt‑ns lli‑s‑tumnm a‑tḍr bla lfaytt ġ‑darun.

² ašku rbbi inna: «lliġ‑d‑iruḥ‑uzmz n‑rrḍa sfldġ‑awn. lliġ‑d‑ilkm‑wass n‑ujnjm ɛawnġ‑kʷn.» hati ġilad a‑d‑iruḥ‑uzmz a‑fllawn‑irḍu. ġassad a‑d‑ilkm‑wass a‑tnjmm.

tanukmut lli‑ġ‑izri bulus

³ ar‑nskar kullu baš a‑ur‑yili kra l‑lɛib ġ‑twuri‑nnġ ula kra n‑tbayḍḍrt ma‑issṭarn yan.

⁴ ar‑nskar kullu baš a‑nmala izd ih̬ddamn n‑rbbi a‑nga, ndus a‑kullu‑nṣbr. ar‑bahra‑ntrfufun ar‑nkkat tammara ar‑nzray ġ‑tnukmut.

⁵ ar‑aġ‑ssġurušn ar‑aġ‑n‑tluḥn ġ‑lḥbs ar‑fllannġ‑sshiyyasn mddn. ar‑ntnhataf bahra. kra n‑twal ar‑ntqama bla iṭs, kra n‑twal ar‑ntqama s‑laẓ.

⁶ walaynni iban ginnġ is‑iġus‑uwl‑nnġ nissan ma‑yʷġẓann nṣbr bahra, ar‑ntɛawan wiyyaḍ, nɛmmr s‑rruḥ lqudus, ar‑ntḥnnu ġ‑mddn s‑nniyt iṣfan,

⁷ ar‑nsawal s‑lḥqq, ar‑nskar kullu s‑tḥkimt itjhhdn n‑rbbi, nasi imqlad n‑ufulki n‑rbbi ġ‑ufasiy‑nnġ ula ġ‑uẓlmaḍ‑nnġ.

⁸ ġmkan a‑nskar iġ‑a‑yaġ‑tḥgarn mddn ula iġ‑a‑yaġ‑talġn, iġ‑a‑fllannġ‑ttinin nʷh̬šn ula iġ‑a‑ttinin nšwa. hati ar‑aġ‑tggan d‑ayt‑tkrkas, walaynni ar‑nsawal s‑lḥqq.

⁹ ar‑ttinin ur‑aġ‑issin yan, walaynni iggut mad‑aġ‑issnn. ar‑ttinin ar‑ntmtat, walaynni ha‑yaġ sul nddr. ar‑ttinin tlla‑d fllannġ lɛqubit, walaynni ur‑illi mad‑aġ‑inġan.

¹⁰ wah̬h̬a da‑ginnġ‑itqama lḥal, ar‑bdda‑ntfraḥ. wah̬h̬a nga imẓlaḍ, iggut ma‑zginnġ‑itamẓn lh̬ir. wah̬h̬a ur‑darnnġ yat, nṭṭaf kraygatt kra.

¹¹ way‑aytma n‑kurintus, s‑nniyt n‑uwl‑nnġ ayd‑s‑awn‑in‑nsawl, ašku tɛzzam darnnġ bahra.

¹² urd nkkʷni a‑n‑srun‑irurn tiġurdin, walaynni kunni a‑d‑srnnġ‑irurn tiġurdin.

¹³ rad‑awn‑iniġ ġmklli ittini yan i‑tarwa‑ns ɛzzanin, skrat zund nkkʷni, tmlm‑aġ is‑aġ‑tḥubbam ġmklli‑kʷn‑nḥubba.

ngarat d‑willi ur‑umnnin

¹⁴ a‑ur‑twrrim tilim ġ‑uzaglu d‑willi ur‑umnnin s‑lmasiḥ. is‑tlla tamunt ġ‑gr ma‑irḍan rbbi d‑ma‑t‑ur‑irḍin? is‑tlla tamunt ġ‑gr tifawt d‑tillas?

¹⁵ is‑ra‑d‑imšaška lmasiḥ d‑iblis? is‑ra‑imrḍa yan yumnn d‑yan ur‑yuminn?

¹⁶ is‑ra‑ttmɛawan‑tgmmi n‑rbbi d‑tin ilahat n‑ddunit‑ad? ašku nga nkkʷni ayt‑tigmmi n‑rbbi lli‑iddrn. ġmklli inna rbbi: «rad‑gawrġ d‑mddn‑inu, zdġġ ġ‑wammas‑nsn. rad‑gġ rbbi‑nsn, gn ntni mddn‑inu.»

¹⁷ f‑mayan a‑f‑inna sidi rbbi: «ffuġad‑d zġ‑darsn, tngaram didsn, tanfm i‑kullu ma‑irkan. iġ‑tskrm ġmkan ra‑fllawn‑rḍuġ.

¹⁸ rad‑gġ babatun, tgm tarwa‑nu d‑isti. mayad inna‑t sidi rbbi lli‑iḥkamn kullu ma‑illan.»