2 kurintus 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tazdġt‑nnġ ġ‑ignna

¹ nssn mayad, iġ‑ttyawhlak‑th̬iyyamt lli‑igan ddat‑nnġ n‑ddunit‑ad, rad‑aġ‑ifk rbbi yat‑tzdġt ġ‑ignna. rad‑aġ‑ifk yat‑tgmmi lli‑ur‑ityawskarn s‑ifassn n‑bnadm, rad‑bdda‑tdum.

² imma ġilad ġ‑sul‑nqama ġ‑ddunit‑ad ar‑nnddr, nẓuẓḍ a‑nls ddat‑nnġ n‑ignna.

³ ar‑nttiri a‑stt‑nls a‑ur‑nqama bla tazdġt.

⁴ ašku maḥdd nqama ġ‑th̬iyyamt‑ad ar‑nnddr s‑taġuft. ur‑nniġ is‑nra a‑nkkis tah̬iyyamt‑ad, walaynni nra a‑nls tazdġt yaḍni, baš a‑nbddl ma‑itmtatn s‑ma‑rad‑bdda‑iddr.

⁵ rbbi a‑fllannġ‑iqṣadn mayad, ifk‑aġ rruḥ‑ns baš a‑nissan is‑rad‑aġ‑issafu kullu maylli‑s‑aġ‑inna.

⁶ ġmkad a‑s‑a‑bdda‑nzzɛam ulawn‑nnġ, ašku nssn is‑d‑naggug zġ‑siditnnġ ġilad ġ‑sul‑nzdġ ġ‑ddat‑ad.

⁷ imma nkkʷni ar‑tt‑ntawi ġ‑maylli‑s‑numn, urd ġ‑maylli nẓrra.

⁸ mayan ad‑aġ‑izzɛamn bahra. niri a‑nfl ddat‑ad, nruḥ dar siditnnġ.

⁹ walaynni iġ‑nqama ġ‑ddat‑ad nġd iġ‑tt‑nfl, rad‑bdda‑nskar f‑a‑nrḍu siditnnġ.

¹⁰ ašku iqqan‑aġ‑d a‑nbidd kullwaġ ġ‑lgddam l‑lmasiḥ a‑fllannġ‑iḥkam, irar i‑kraygatt yan f‑ma‑iskr ġ‑ddunit‑ad, ig‑iyt ma‑ifulkin nġd ma‑yʷh̬šnn.

rbbi iskr sslamt ġ‑gras didnnġ

¹¹ nssn tiksaḍ n‑sidi rbbi. mayan a‑f‑a‑n‑ntgga tiqqi‑nnġ a‑nssfham wiyyaḍ baš ad‑amnn ula ntni. rbbi issn kullu ma‑ginnġ‑illan. swangmġ is‑aġ‑tssnm ula kunni ġ‑uwlawn‑nnun.

¹² ur‑a‑ntalġ ih̬f‑nnġ baš a‑didnnġ‑tbiddm, walaynni nmla‑yawn kra ma‑s‑a‑srnnġ‑ttfraḥm ġ‑dar mddn, trarm awal i‑willi tfraḥnin s‑uwdmawn urd s‑ma‑illan ġ‑uwlawn.

¹³ iġ‑tġalm is‑nffuġ ih̬f‑nnġ, f‑rbbi a‑f‑t‑nffuġ. walaynni iġ‑nsawl s‑lmɛqul, f‑ssibt‑nnun a‑f‑nsawl.

¹⁴ imma nkkʷni ar‑aġ‑tdḥay lḥnant l‑lmasiḥ, ašku numn is‑immut yan f‑ssibt n‑kullu mddn. mayan a‑f‑nssn is‑kullu‑dids‑mmutn.

¹⁵ immut ntta f‑ssibt n‑kullu mddn baš ad‑wrrin ġwilli ddrnin a‑ur‑sul‑skarn f‑ad‑rḍun ih̬f‑nsn walaynni ad‑rḍun ġwalli immutn inkr‑d zġ‑lmut f‑ssibt‑nsn.

¹⁶ ur‑sul‑a‑ntmnad ġ‑yan ġmklli gis tmnadn mddn n‑ddunit‑ad. nkka‑ttin ar‑ntmnad ġ‑lmasiḥ ġmklli gis tmnadn ntni, walaynni ur‑sul‑a‑gis‑ntmnad ġmkan.

¹⁷ ašku wanna igan win lmasiḥ, iskr‑t rbbi zġ‑ljdid. laḥ zġ‑gis aqdim, iwrri ig win ljdid.

¹⁸ rbbi a‑iqṣadn mayan lliġ iskr sslamt ġ‑gratnnġ dids f‑ssibt l‑lmasiḥ. iẓli‑aġ nkkʷni a‑nmala i‑mddn mamnk a‑ira a‑iskr sslamt ġ‑gras didsn.

¹⁹ ašku rbbi iskr sslamt ġ‑gras d‑ddunit f‑uwdm l‑lmasiḥ, ur‑sul‑a‑itḥasab f‑mddn ddnub‑nsn. yazn‑aġ ad‑asn‑nsslkam lh̬bar f‑sslamt‑ad.

²⁰ nkkʷni‑ad nga imazann l‑lmasiḥ. f‑imi‑nnġ a‑f‑a‑srun‑isawal rbbi. ar‑kʷn‑ntḍalab ġilad s‑ism l‑lmasiḥ a‑twrrim s‑rbbi baš ad‑awn‑tili sslamt ġ‑gratun dids.

²¹ lmasiḥ lli‑ur‑jju‑iskirn kra n‑ddnb, irur‑t rbbi zund iġ‑iɛmmr s‑ddnub f‑ssibt‑nnġ, baš a‑nɛmmr nkkʷni s‑ufulki n‑rbbi f‑ssibt‑ns.