2 kurintus 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lknz lli‑illan ġ‑tmkilin n‑wakal

¹ lliġ‑aġ‑ifka rbbi tawuri‑ad ihiyyan s‑rrḥmt‑ns, ar‑gis‑ntzayad bla‑da‑ntrmay.

² naggug zġ‑kullu ma‑igan lɛib intln iššḥššamn. ur‑a‑nzzray kra f‑yan s‑tkrkas ula‑da‑ntbddal awal n‑rbbi s‑lġʷšš, walaynni ar‑bdda‑nttini lḥqq i‑kullu mddn ġ‑lgddam n‑rbbi, baš ad‑issann ġ‑uwl‑nsn izd afulki a‑nskar.

³ iġ‑sul‑idl lh̬bar‑ad ifulkin, idl ġir f‑willi sul tyawhlaknin.

⁴ ntni ur‑uminn ašku iblis lli‑iḥkamn ddunit‑ad issbukḍ lɛaql‑nsn a‑ur‑ẓrn tifawt l‑lh̬bar l‑lmjd l‑lmasiḥ lli‑igan ṣṣurt n‑rbbi.

⁵ ašku urd f‑ih̬f‑nnġ a‑f‑a‑ntbrraḥ, walaynni ar‑ntbrraḥ f‑yasuɛ lmasiḥ, ar‑nmala is‑iga ntta siditnnġ, ng nkkʷni ih̬ddamn‑nnun s‑ism l‑lmasiḥ.

⁶ ašku rbbi lli‑innan «ra‑di‑tisfiw tifawt zġ‑wammas n‑tillas,» nttan a‑ifawn ġ‑uwlawn‑nnġ ġilad s‑tifawt n‑twassna l‑lmjd‑ns lli‑d‑ibann ġ‑uwdm l‑lmasiḥ.

⁷ imma lknz‑ad, nusi‑t ġ‑tmkilin n‑wakal, baš a‑itban izd rbbi a‑mi‑tlla‑tḥkimt‑ad itjhhdn urd nkkʷni.

⁸ ar‑aġ‑di‑ttkka‑tnukmut kraygatt tasga walaynni ur‑a‑yaġ‑ttamẓ. ar‑bahra‑ntduhdu walaynni ur‑a‑yaġ‑tlaḥ rrja.

⁹ iggut mad‑aġ‑itkrhun walaynni illa‑bdda mad‑aġ‑ittirin. ar‑bahra‑ntrfufun walaynni ur‑a‑nlkkm lhalak.

¹⁰ nusi‑bdda lmut n‑yasuɛ f‑ddat‑nnġ baš a‑ttban ula tudrt n‑yasuɛ ġ‑ddat‑nnġ.

¹¹ ašku kullu maḥdd nsul ar‑aġ‑n‑dḥayn mddn i‑lmut f‑ssibt n‑yasuɛ, baš a‑ttbayyan tudrt n‑yasuɛ ġ‑ddat‑nnġ lli‑itmtatn.

¹² ġmkad a‑s‑a‑ntmmaġ d‑lmut baš a‑teṭṭafm kunni tudrt.

¹³ ġmklli ityaran: «ha‑yyi umnġ. mayan a‑f‑sawlġ.» ula nkkʷni illa darnnġ liman‑ad ġ‑uwlawn‑nnġ, ar‑nsawal ašku numn.

¹⁴ nssn mayad bahra: rbbi lli‑d‑issnkrn siditnnġ yasuɛ rad‑aġ‑issnkr ula nkkʷni d‑yasuɛ, yawi‑aġ didun s‑dars.

¹⁵ kullu mayd ijrrun ġilad, ar‑ijrru f‑ssibt‑nnun baš a‑tzayd lbaraka n‑rbbi ar‑ttruḥ kigan d‑mddn, igatn bahra ġwilli‑ti‑tškarnin ibayyn lmjd n‑rbbi s‑uggʷar.

¹⁶ mayan a‑f‑ur‑akkʷ‑a‑ntrmay. wah̬h̬a da‑ttḍɛaf ddat‑nnġ, ar‑itdus‑uwl‑nnġ ass f‑wass.

¹⁷ ašku tanukmut‑ad ifssusn ġ‑a‑nzray ussan‑ad drusnin, rad‑aġ‑tggʷru s‑lmjd idumn lli‑bahra‑yugʷrn kullu ġayad.

¹⁸ hati ur‑a‑stt‑ntawi ġ‑maylli nẓrra, walaynni ar‑tt‑ntawi ġ‑maylli ur‑a‑iẓrra yan. ašku maylli nẓrra ur‑ra‑iqama, imma maylli ur‑a‑nẓrra rad‑bdda‑yili.