2 kurintus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tibratin n‑twassna

¹ lliġ nenna mayan is‑nra‑daġ a‑nalġ ih̬f‑nnġ baš a‑didnnġ‑tbiddm? is‑nḥtajja tibratin n‑twassna zġ‑wiyyaḍ baš ad‑aġ‑tqblm kunni, nġd tibratin zġ‑gigun baš ad‑aġ‑qbln wiyyaḍ, ġmklli ḥtajjan kra n‑mddn?

² walaynni kunni a‑igan tabrat‑nnġ, ttyara ġ‑uwlawn‑nnun baš a‑stt‑aqran kullu mddn issann mamnk a‑nga.

³ hati iban gigun izd tabrat l‑lmasiḥ a‑tgam, yura‑tt ntta s‑ufus‑nnġ, urd s‑ṣṣmḥ walaynni s‑rruḥ n‑rbbi lli‑iddrn, urd f‑tilwaḥ n‑uẓru walaynni f‑tilwaḥ n‑uwlawn n‑bnadm.

lmjd l‑lɛhd l‑ljdid

⁴ nenna mayan ašku nssn is‑aġ‑iqbl rbbi f‑ssibt l‑lmasiḥ.

⁵ ur‑a‑nttini izd nkkʷni a‑iẓḍarn a‑nskr kra, walaynni rbbi iẓḍar a‑t‑iskr f‑ufus‑nnġ.

⁶ nttan ad‑aġ‑ifkan taẓḍḍart ma‑s‑a‑nsslkam i‑mddn lɛhd l‑ljdid lli‑d‑yuškan s‑tḥkimt n‑rruḥ lqudus urd s‑luṣiyat tyaranin. ašku luṣiyat tyaranin ar‑di‑tawint lmut, imma rruḥ lqudus ar‑d‑itawi tudrt.

⁷ imma lɛhd‑an n‑ššrɛ lli‑d‑itawin lmut, ġakud lliġ ityawnqaš f‑tilwaḥ n‑uẓru iban‑d lmjd n‑rbbi s‑tifawt itjhhdn, aylliġ ur‑ẓḍarn ayt‑rbbi a‑n‑tmnadn ġ‑uwdm n‑musa, wah̬h̬a ur‑tqama tifawt‑an ġir yan imikk idrusn.

⁸ imma lɛhd‑ad n‑rruḥ lqudus, is‑ur‑rad‑as‑yili lmjd uggʷar n‑mayan?

⁹ iġ‑iggut lmjd i‑lɛhd lli‑s‑a‑thlakn mddn, ra‑t‑bahra‑yagʷr lmjd i‑lɛhd lli‑s‑a‑tnjamn.

¹⁰ ašku maylli‑d‑ibann ġ‑uwssan‑an s‑lmjd iggutn, ur‑sul‑as‑illi lmjd, ašku tigira‑ns a‑d‑iban ma‑t‑yugʷrn ġ‑lmjd.

¹¹ s‑lmjd a‑s‑d‑yuška maylli ur‑iqaman, walaynni uggʷar l‑lmjd‑an a‑ra‑yili lmjd i‑mayd rad‑bdda‑idum.

¹² hati ar‑ntzɛam bahra ġilad, ašku illa‑yaġ rrja‑yad iṣḥan.

¹³ ur‑ngi zund musa lli‑idln udm‑ns baš a‑t‑ur‑ẓrn ayt‑rbbi lliġ a‑gis‑tlaḥ tifawt l‑lmjd.

¹⁴ ntni qqurn ih̬fawn‑nsn. sul s‑ġassa tdl fllasn lmɛna l‑lɛhd aqdim ġakud nna‑t‑aqran, ašku ġir lmasiḥ a‑iẓḍarn a‑issitti asddul.

¹⁵ wah̬h̬a da‑aqran ššrɛ n‑musa, sul iqama‑usddul‑an f‑lɛaql‑nsn,

¹⁶ walaynni yan yumnn s‑siditnnġ ityattay‑fllas‑usddul.

¹⁷ hati siditnnġ iga rruḥ. d‑wanna dar rruḥ n‑siditnnġ, ityawfsay zġ‑iskraf.

¹⁸ nkkʷni kullwaġ ar‑ntmnad lmjd n‑siditnnġ ġilad, ašku ityattay‑fllannġ‑usddul. d‑siditnnġ lli‑igan rruḥ ar‑aġ‑itbddal baš a‑ng zund ntta, ar‑aġ‑itzayad lmjd f‑lmjd.