2 kurintus 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ nniġ d‑ih̬f‑inu ġ‑uwssan‑an ur‑ra‑n‑darun‑aškġ ssṭiyyrġ‑awn‑tt‑daġ.

² ašku iġ‑n‑uškiġ ssṭiyyrġ‑awn‑tt, ma‑ra‑n‑afġ ġ‑darun a‑yyi‑issfrḥ abla kunni lli‑mi‑stt‑ssṭiyyrġ?

³ mayan a‑f‑n‑uriġ tabrat‑an, ur‑n‑darun‑uškiġ, ašku ur‑riġ ad‑iyi‑darun‑ṭiyyr kunni lli‑f‑illa a‑yyi‑tssfrḥm. ašku ssnġ iġ‑frḥġ nkki ra‑didi‑kullu‑tfrḥm.

⁴ walaynni s‑imṭṭawn ggutnin a‑s‑awn‑in‑uriġ tabrat‑an, ašku tqamam gigi, asiġ fllawn taġuft bahra. ur‑awn‑in‑uriġ baš ad‑awn‑tt‑ssṭiyyrġ s‑uggʷar, walaynni uriġ‑awn‑in baš a‑tissanm mnšk ad‑dari‑tɛzzam.

ṣamḥat i‑walli iskrn ma‑yʷh̬šnn

⁵ walaynni iġ‑illa ma‑stt‑issṭiyyrn i‑wayyaḍ, kunni a‑mi‑stt‑issṭiyyr uggʷar n‑mad‑iyi‑tt‑issṭiyyr nkki. issṭiyyr‑awn‑tt kullukn s‑imikk nġd s‑kigan. ġmkan a‑s‑rad‑iniġ ašku ur‑riġ ad‑iniġ f‑urgaz‑an uggʷar n‑mad‑as‑igan.

⁶ walaynni twuda‑t lɛqubit lli‑fllas‑yut ma‑iggutn gigun.

⁷ yili fllawn ġilad ad‑as‑tṣamḥm tssfjjijm‑t, a‑ur‑ti‑tnru‑tguḍi bahra.

⁸ ra‑kʷn‑ḍalbġ ad‑as‑tmlm is‑a‑t‑sul‑ttirim.

⁹ mayan a‑f‑awn‑in‑uriġ tabrat‑an, baš a‑kʷn‑armġ, issanġ is‑rad‑bdda‑tskarm s‑wawal‑inu.

¹⁰ wanna mi tṣamḥm f‑kra iskr, hati ṣamḥġ‑as ula nkki. d‑aynna‑f‑ṣamḥġ nkki, iġ‑nnit‑ṣamḥġ f‑kra, ssibt‑nnun a‑f‑fllas‑ṣamḥġ s‑ism l‑lmasiḥ,

¹¹ baš a‑ur‑tt‑fllannġ‑izzri šiṭan, ašku nssn tillay‑ns.

tlkm tujjut l‑lmasiḥ kraygatt mani

¹² ġakud lliġ lkmġ tamdint n‑truwwas, irẓm siditnnġ ġ‑lgddam‑inu yan‑imi f‑twuri l‑lh̬bar ifulkin l‑lmasiḥ.

¹³ walaynni ur‑ihnna‑uwl‑inu, ašku ur‑n‑ufiġ gʷmatnnġ tiṭus. flġ ilmma mddn n‑ġin, mudduġ s‑makiduniyya.

¹⁴ ar‑bahra‑ntalġ rbbi lli‑aġ‑bdda‑izggurun ġ‑ukabar l‑lmasiḥ lli‑itnrun kullu ma‑illan, ar‑srnnġ‑isslkam aḍu n‑twassna‑ns s‑kraygatt mani.

¹⁵ ašku nga ġ‑dar rbbi zund tujjut l‑lmasiḥ ġ‑gr kullu mddn, ġwilli njmnin ula ġwilli tyawhlaknin.

¹⁶ tg tujjut‑an aḍu l‑lmut i‑willi tyawhlaknin, tg aḍu n‑tudrt i‑willi njmnin. walaynni is‑illa ma‑iẓḍarn i‑twuri‑ad ihiyyan?

¹⁷ ur‑ngi nkkʷni zund ma‑iggutn ar‑tbrraḥn s‑wawal n‑rbbi ġir baš ad‑srs‑qqʷayn iqaridn. ašku nkkʷni s‑nniyt n‑uwl‑nnġ a‑s‑a‑nsawal s‑ism l‑lmasiḥ, nissan izd rbbi ad‑aġ‑yuznn ar‑aġ‑bdda‑itmnad.