2 kurintus 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

sigglat ġ‑ih̬fawn‑nnun

¹ h̬tad a‑ra‑ig tis kraṭṭ‑twal is‑n‑darun‑uškiġ. walaynni ġmklli ityaran: «taġawsa nna‑ijran, f‑imi n‑sin inagan nġd kraḍ a‑s‑ra‑tzga.»

² imma ġilad ġ‑d‑fllawn‑aggugġ, rad‑awn‑iniġ maylli‑s‑awn‑nniġ s‑lḥqq ġakud lliġ‑n‑darun‑uškiġ tis snat‑twal. nniġ‑t ġakudan i‑willi skarnin ma‑yʷh̬šnn iniġ‑awn‑t kullukn. rad‑awn‑t‑daġ‑iniġ: iġ‑n‑darun‑wrriġ tawala yaḍni, ur‑akkʷ‑rad‑rh̬uġ d‑yan iskarn ma‑yʷh̬šnn.

³ ġmkad a‑s‑rad‑awn‑mlġ tamatart lli‑zgigi‑tḍalbm, baš a‑tissanm izd lmasiḥ a‑isawaln f‑imi‑nu. ašku itjhhd ntta ġ‑gratun. ur‑iḍɛf lliġ a‑didun‑iskar.

⁴ s‑ḍḍɛf a‑s‑immut f‑uggjdi, imma ġilad iddr s‑tḥkimt itjhhdn n‑rbbi. nḍɛf ula nkkʷni zund nttan, walaynni s‑tḥkimt itjhhdn n‑rbbi a‑s‑a‑didun‑nskar, ašku nmun dids ġ‑tudrt‑ns.

⁵ sigglat ġ‑ih̬f‑nnun a‑tẓrm is‑tzgam ġ‑uġaras l‑lmasiḥ. ẓrat mamnk a‑tgam. is‑ur‑tssinm mayad? illa yasuɛ lmasiḥ ġ‑ugʷns‑nnun, iġ‑nnit‑ur‑tjlim zġ‑uġaras.

⁶ rjuġ‑n gigun a‑ur‑tswingimm izd nkkʷni a‑ijlan.

⁷ imma ġilad ar‑ntḍalab rbbi fllawn a‑ur‑tskarm kra yʷh̬šnn. ur‑a‑t‑ntḍalab f‑ih̬f‑nnġ a‑ginnġ‑iban is‑nskr kra, wah̬h̬a iġ‑ġaln kra n‑mddn ur‑nskir yat. walaynni ar‑t‑ntḍalab fllawn baš a‑iban is‑tskrm afulki.

⁸ ašku ur‑nssugir yat i‑lḥqq. ur‑nẓḍar abla a‑srs‑nskar.

⁹ imma nkkʷni ar‑ntfraḥ ġakud nna‑nḍɛf tjhhdm kunni, walaynni ar‑ntḍalab rbbi a‑twrrim tfulkim s‑ufulki ikmmln.

¹⁰ mayan a‑f‑awn‑in‑uriġ tabrat‑ad, ġilad ġ‑d‑fllawn‑aggugġ. iẓli‑yyi siditnnġ ad‑awn‑malaġ ma‑kʷn‑d‑iqqann a‑ti‑tskarm, urd f‑a‑kʷn‑hlkġ walaynni f‑a‑kʷn‑ɛawnġ. walaynni ġakud lliġ ra‑n‑darun‑aškġ ur‑riġ a‑n‑afġ is‑iyi‑ih̬ṣṣa ad‑didun‑šquġ.

¹¹ way‑aytma, awal‑inu iggʷran iga‑t: frḥat, ar‑tskarm f‑ufulki, ar‑tzzɛamm i‑ngratun, tgm yan ġ‑iswingimn‑nnun, ar‑tzraym ġ‑sslamt. ġmkad a‑s‑rad‑bdda‑didun‑yili rbbi l‑lḥnant d‑sslamt.

¹² tnsallamat i‑ngratun s‑unsallam n‑tagʷmat.

¹³ ar‑n‑fllawn‑tsllamn kullu imẓlayn n‑rbbi.

¹⁴ ad‑awn‑tili lbaraka n‑siditnnġ yasuɛ lmasiḥ ula lḥnant n‑rbbi ula tamunt n‑rruḥ lqudus kullukn.