2 kurintus 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tiwargiwin lli‑iẓra bulus

¹ iqqan‑iyi‑d ad‑sawlġ f‑mad‑skrġ, wah̬h̬a ur‑gis‑tlli kra l‑lfaytt. rad‑awn‑iniġ f‑twargiwin lli‑yyi‑imla siditnnġ ula tiġawsiwin yaḍni lli‑yyi‑issbayyn.

² ssnġ yan‑urgaz iga win lmasiḥ, ityalal s‑wis kraḍ ignwan kkuẓ d‑mraw n‑usggʷas ayad. ur‑ssinġ izd s‑ddat a‑s‑ityalal nġd bla ddat. rbbi a‑issnn.

³ ssnġ is‑ityalal‑urgaz‑an s‑talɛrṣt l‑lmjd, ur‑ssinġ izd s‑ddat nġd bla ddat. rbbi a‑issnn.

⁴ imma ntta isfld i‑kra n‑tġawsiwin, ur‑yufi iwaliwn ma‑s‑a‑tnt‑yaddr ula zrint i‑bnadm a‑srsnt‑isawl.

⁵ wan argaz‑an a‑f‑rad‑sawlġ, walaynni ur‑rad‑sawlġ f‑ih̬f‑inu abla f‑ḍḍɛf lli‑gigi‑illan.

⁶ mrad is‑riġ ad‑sawlġ f‑ih̬f‑inu urd anafal a‑rad‑gġ, ašku lḥqq a‑ra‑ttiniġ. walaynni ur‑rad‑sawalġ f‑ih̬f‑inu a‑ur‑flla‑iġal kra n‑yan uggʷar n‑ma‑gigi‑iẓrra ula ma‑mi‑dari‑isflid.

asnnan ġ‑ddat

⁷ walaynni ityawfka‑yyi yan‑usnnan ġ‑ddat‑nu, baš a‑ur‑allġ ih̬f‑inu f‑ssibt n‑tġawsiwin ggutnin lli‑yyi‑issbayyn rbbi. asnnan‑an iga amazan n‑šiṭan, ar‑iyi‑issrfufun baš a‑ur‑wrriġ ar‑tallġ ih̬f‑inu.

⁸ kraṭṭ‑twal ad‑ḍalbġ siditnnġ a‑t‑flla‑issitti

⁹ walaynni inna‑yyi: «ur‑k‑ih̬ṣṣa abla lḥnant‑inu. ašku yan iḍɛfn a‑ġ‑ra‑tili‑tḥkimt‑inu itjhhdn s‑uggʷar.» frḥġ ġilad ad‑sawalġ f‑kullu ma‑gigi‑iḍɛfn, baš ad‑ɛmmrġ s‑tḥkimt itjhhdn l‑lmasiḥ.

¹⁰ ar‑tqnaɛġ nkki ġakud nna‑ḍɛfġ, ula ġakud nna‑yyi‑rgmn mddn ula ġakud nna‑kkatġ tammara ar‑trfufunġ ar‑zrayġ ġ‑tnukmut f‑ssibt l‑lmasiḥ. ašku ġakud nna‑ḍɛfġ, hati tjhhdġ.

lh̬ir lli‑iskr bulus ġ‑ayt‑kurintus

¹¹ nniġ mayan zund yan iffuġn ih̬f‑ns, walaynni kunni a‑yyi‑irurn ad‑sawlġ ġmkan, ašku ur‑trim a‑yyi‑talġm ġmklli fllawn illan. wah̬h̬a ur‑giġ yat nkki, ur‑akkʷ‑iyi‑ufn mddn‑an lli‑tgam d‑irqqasn hiyyanin.

¹² kunni tẓram gigi timitar n‑yan igan arqqas n‑ṣṣaḥt, ašku skrġ darun lmɛjizat d‑lɛjayb d‑lquwwat s‑ṣṣbr iggutn.

¹³ is‑illa kra skrġ‑t i‑imnaggarn yaḍni ur‑awn‑t‑skirġ kunni? ġir taġawsa‑yad a‑illan: ur‑zgigun‑umẓġ iqaridn. is‑yʷh̬šn mayd gigun skrġ baš a‑kʷn‑ḍalbġ ad‑iyi‑tṣamḥm?

¹⁴ ha‑yyi ujadġ ġilad a‑n‑darun‑aškġ tis kraṭṭ‑twal. ur‑ra‑zgigun‑ḍalbġ yat, ašku kunni ad‑riġ urd ma‑igan winnun. ur‑illi f‑tarwa ad‑ssmunun ma‑s‑a‑tɛawann ayt‑darsn, walaynni illa f‑ayt‑darsn ad‑tɛawann tarwa‑nsn.

¹⁵ rad‑frḥġ nkki ad‑fkġ kullu mad‑dari‑illan, fkġ ula ih̬f‑inu f‑ssibt‑nnun. is‑ur‑ra‑darun‑ɛzzaġ imikk lliġ dari tɛzzam kunni ġunškan?

¹⁶ tssnm is‑ur‑fllawn‑ẓẓayġ ġ‑uwssan‑an. walaynni is‑sul‑gigun‑illa ma‑ittinin «bulus iga bu‑lḥilt, izzri‑tt fllawn s‑tkrkas»?

¹⁷ mamnk? is‑jju‑kʷn‑ššiġ f‑ufus n‑willi‑awn‑in‑uznġ?

¹⁸ nkki a‑iḍalbn tiṭus a‑n‑yašk s‑darun, aznġ‑n dids gʷmatnnġ yaḍni. walaynni iniyat‑iyi, is‑jju‑kʷn‑išša tiṭus? imma nkki d‑tiṭus, ar‑bdda‑nskar zund zund, ar‑ntnbaḍ zund zund.

¹⁹ is‑tġalm is‑nenna kullu mayad baš a‑fllannġ‑tḥkamm kunni, tinim ur‑ginnġ kra l‑lɛib? walaynni ġ‑lgddam n‑rbbi a‑ġ‑a‑nsawal s‑ism l‑lmasiḥ. d‑kullu ma‑nskar, ay‑aytma ɛzzanin, ar‑t‑nskar baš a‑kʷn‑nssdus.

²⁰ walaynni ksuḍġ a‑kʷn‑in‑afġ ur‑tgim ġmklli riġ ġakud nna‑n‑darun‑uškiġ, tafm‑iyi‑n ula nkki ur‑giġ ġmklli tram. ur‑riġ a‑kʷn‑in‑afġ ar‑tẓim i‑ngratun ula‑da‑ttirim ma‑igan win wiyyaḍ ula‑da‑ttqlaqalm ula‑da‑ikkat kud yan ġir f‑ih̬f‑ns ula‑da‑trggmm ula‑da‑tsawalm ġ‑wiyyaḍ ula‑da‑tssimġurm ih̬fawn‑nnun ula‑da‑tssrwaym mad‑darun‑illan.

²¹ ksuḍġ a‑yyi‑yadj rbbi ard‑iyi‑tigʷraẓ ġ‑gratun ġakud nna‑n‑darun‑uškiġ, ar‑allaġ f‑ma‑gigun‑iggutn ur‑rin ad‑fln lh̬ʷšant lli‑myarn ġayd izrin, ar‑sul‑tfsadn ar‑tznun ar‑tšthun i‑ngratsn.