2 kurintus 11 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

bulus ur‑iḍalb yat i‑ih̬f‑ns

¹ ṣbrat didi iġ‑iyi‑tẓram ar‑sawalġ imikk zund yan iffuġn ih̬f‑ns.

² tṣbrm didi ašku ar‑kʷn‑ttiriġ s‑tayri n‑rbbi, fkġ‑kʷn i‑lmasiḥ zund yat‑tslit lli‑ġ‑ur‑illi kra l‑lɛib, baš a‑ur‑tilim i‑kra n‑yan yaḍni.

³ ksuḍġ a‑kʷn‑ijllu kra n‑yan f‑iswingimn‑nnun ġmklli‑stt‑izzri‑ulgmmaḍ s‑tkrkas‑ns f‑immatnnġ ḥuwwa. iksaḍġ a‑twrrim zġ‑tayri iṣfan lli‑s‑ttin tkkam ar‑ttirim lmasiḥ s‑nniyt‑nnun.

⁴ ašku ar‑tsflidm s‑wanna‑n‑darun‑yuškan ar‑itbrraḥ s‑kra n‑yasuɛ ur‑igi yasuɛ lli‑s‑awn‑nbrrḥ nkkʷni. hati ar‑ttqbalm wanna‑yawn‑yakkan kra n‑rruḥ ur‑igi rruḥ lli‑tqblm yadlli. ar‑ttamnm wanna‑yawn‑in‑itawin kra l‑lh̬bar ifulkin ur‑igi lh̬bar ifulkin lli‑s‑tumnm f‑imi‑nnġ.

⁵ walaynni irwas‑iyi is‑ur‑iyi‑akkʷ‑ufn mddn‑an lli‑tgam d‑irqqasn hiyyanin.

⁶ wah̬h̬a da‑ttinin kra n‑mddn ur‑ssinġ ad‑sawlġ, ha‑yyi ssnġ bahra ma‑yʷġẓann. ula kunni kullukn tẓram mayan ġ‑kullu ma‑nskr ġ‑gratun.

⁷ ġakud lliġ‑awn‑in‑iwiġ lh̬bar ifulkin n‑rbbi ur‑jju‑zgigun‑ḍalbġ iqaridn. udrġ i‑ih̬f‑inu baš‑a‑tallm kunni ih̬fawn‑nnun. is‑iɛib mayn skrġ?

⁸ ġ‑uwssan‑an ar‑tamẓġ mad‑ḥtajjaġ zġ‑imnaggarn yaḍni, ar‑šttaġ zġ‑lh̬ir‑nsn baš ad‑awn‑h̬dmġ.

⁹ imma ġakud lliġ lkmġ f‑kra ġ‑darun ur‑ḍalbġ yan f‑yat, ašku aytmatn lli‑n‑uškanin zġ‑makiduniyya iwin‑iyi‑n kullu mad‑ḥtajjaġ. ġmklli skrġ ġ‑uwssan‑an a‑rad‑bdda‑skarġ. ur‑sar‑ra‑zgigun‑ḍalbġ yat i‑ih̬f‑inu.

¹⁰ s‑lḥqq l‑lmasiḥ lli‑gigi‑illan, ur‑ra‑yiẓḍar yan ġ‑tmazirt n‑ah̬aya kullutt a‑yyi‑issfssa f‑wawal‑ad.

¹¹ mah̬ aylliġ‑awn‑sawlġ ġmkad? is‑ur‑dari‑tɛzzam? rbbi a‑issnn mamnk a‑dari‑tɛzzam bahra.

¹² ġmkan a‑rad‑bdda‑skarġ, baš a‑ur‑iẓḍarn kra n‑mddn ad‑talġn ih̬f‑nsn ar‑ttinin izd zund nkkʷni ad‑skarn.

¹³ ašku wan mddn‑an urd irqqasn n‑ṣṣaḥt ad‑gan, walaynni gan ih̬ddamn imġḍarn ar‑tbddaln ssift‑nsn baš ad‑rwasn irqqasn l‑lmasiḥ.

¹⁴ ur‑igi ġayad lɛjb, ašku šiṭan ula nttan ar‑itbddal ssift‑ns baš a‑irwas yal‑lmalak ifawn.

¹⁵ a‑ur‑ntɛjjab iġ‑nẓra ih̬ddamn‑ns ar‑tbddaln ssift‑nsn baš ad‑rwasn ih̬ddamn n‑ufulki. imma ntni rad‑asn‑yili mad‑asn‑igan.

tarfufnt n‑bulus

¹⁶ rad‑awn‑daġ‑iniġ a‑ur‑tġalm is‑ffuġġ ih̬f‑inu. walaynni iġ‑sul‑gigun‑illa ma‑iġaln ġmkan, rad‑as‑iniġ a‑yyi‑iqbl zund yan inufln, baš ad‑alġġ ih̬f‑inu ula nkki yan imikk.

¹⁷ urd awal n‑siditnnġ ayd‑awn‑ttiniġ ġilad, hati rad‑alġġ ih̬f‑inu zund yan inufln.

¹⁸ ggutn mddn ar‑talġn ih̬fawn‑nsn f‑mad‑asn‑illan ġ‑ddunit‑ad. hati rad‑sawlġ ula nkki ġmkan,

¹⁹ ašku ar‑kʷn‑itɛjab a‑ttṣbarm d‑inafaln kunni lli‑igan ih̬f‑nnun d‑ayt‑lɛaql.

²⁰ hati ar‑ttṣbarm d‑kullu wanna iran a‑kʷn‑ig d‑ismgan yiri a‑kʷn‑iẓig išš‑kʷn iḥgr‑kʷn yut‑kʷn f‑uwdm.

²¹ imma nkkʷni, ur‑jju‑nzɛm ad‑awn‑nskr ġmkan, ha‑yyi ḥšmġ ad‑awn‑t‑iniġ. walaynni iġ‑illa ma‑izɛmn a‑yalġ ih̬f‑ns f‑kra, ula nkki rad‑zɛmġ ad‑alġġ ih̬f‑inu f‑mayan. ha‑yyi sawlġ ġilad zund yan inufln.

²² izd s‑iwaliwn n‑ayt‑yudaya a‑s‑a‑sawaln mddn‑an? ula nkki ar‑sawalġ s‑iwaliwn n‑ayt‑yudaya. izd zġ‑ayt‑rbbi a‑zġ‑gan? ula nkki giġ zġ‑ayt‑rbbi. izd zġ‑tasut n‑ibrahim a‑zġ‑gan? ula nkki giġ zġ‑tasut n‑ibrahim.

²³ is‑gan ih̬ddamn l‑lmasiḥ? giġ ula nkki ah̬ddam l‑lmasiḥ uggʷar‑nsn. ha‑yyi ġilad ar‑sawalġ zund yan inufln. ar‑th̬damġ uggʷar n‑mddn‑an, ar‑ttiliġ ġ‑lḥbs uggʷar‑nsn. ššiġ akuray uggʷar‑nsn. mnnawt‑twal a‑n‑tmnaggarġ d‑lmut.

²⁴ smmust‑twal a‑yyi‑ssġuršn ayt‑yudaya ar‑iyi‑ššušan kraṭṭ id‑mrawt d‑tẓa (39) n‑ḍḍrbt.

²⁵ kraṭṭ‑twal a‑yyi‑tnt‑ššušan ayt‑rruman s‑ukuray. yat‑twal rjmn‑iyi mddn s‑iẓran. kraṭṭ‑twal ad‑iyi‑trẓa tanawt ġ‑umda, kġ iḍ d‑wass ġ‑waman.

²⁶ ar‑bahra‑tmudduġ. zriġ ġ‑lh̬aṭar n‑isaffn d‑iqṭṭaɛn. zriġ ġ‑lh̬aṭar ġ‑gr mddn‑inu n‑ayt‑yudaya ula ġ‑gr ayt‑tmizar yaḍni. zriġ zġ‑gis ġ‑tmdinin ula lh̬la ula amda. zriġ zġ‑gis ġ‑gr ayt‑tkrkas lli‑ittinin is‑gan ayt‑lmasiḥ.

²⁷ ar‑kkatġ takrrayt ar‑kkatġ tammara. mnnawt‑twal ad‑ssikkiġ iṭs, ur‑ššiġ ula swiġ. ur‑dari mad‑šttaġ ula mad‑lssaġ ula maniġ a‑tntalġ i‑usmmiḍ.

²⁸ ggutnt tassasin yaḍni, walaynni zuydġ‑asnt kullutnt taẓayt n‑taġuft lli‑bdda‑tasiġ kraygatt ass f‑kullu imnaggarn n‑aytmatn.

²⁹ ġakud nna‑illa ma‑iḍɛfn, ha‑yyi ssḥssaġ s‑ḍḍɛf‑ns. ġakud nna‑illa ma‑iḍrn, ar‑itbbi ġ‑tasa‑nu.

³⁰ iġ‑iyi‑d‑iqqan ad‑sawlaġ f‑mad‑skrġ, rad‑sawlġ f‑ḍḍɛf‑inu.

³¹ rbbi babas n‑siditnnġ yasuɛ a‑issnn is‑ur‑a‑sskirkisġ. nttan a‑isthllan a‑t‑ntalġ ġilad ula kullu mayd‑d‑iftan.

³² lliġ ttin kkiġ ġ‑tmdint n‑dimašq, inkr lḥakm lli‑illan ġ‑ddu‑ugllid ḥarit, yuṣṣa iɛskrin ad‑ḍufn imawn n‑tmdint baš a‑yyi‑amẓn.

³³ walaynni gan‑iyi kra n‑mddn ġ‑yan‑uryal, zzugzn‑iyi zġ‑yan‑warryaḥ illa ġ‑uġʷrab n‑tmdint, njmġ zġ‑ufus‑ns.