2 kurintus 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

awal lli‑irur bulus i‑willi gis sawalnin

¹ imma ġilad ra‑kʷn‑ḍalbġ nkki bulus s‑ism l‑lmasiḥ lli‑bdda‑iḥnnan iṣbr d‑kud yan, ašku ar‑flla‑ttinin kra n‑mddn is‑ḍɛfġ ġakud nna‑darun‑lliġ, šquġ didun ġakud nna‑fllawn‑aggugġ.

² walaynni ra‑kʷn‑ḍalbġ a‑tskrm ma‑kʷn‑d‑iqqann, baš a‑ur‑iyi‑ih̬ṣṣa ad‑didun‑šquġ ġakud nna‑n‑uškiġ, ġmklli‑yyi‑ih̬ṣṣa ad‑šquġ d‑kra n‑mddn lli‑ġalnin is‑a‑nskar s‑ma‑ittiri ih̬f‑nnġ.

³ wah̬h̬a nzdġ ġ‑ddunit‑ad, ur‑a‑ntmmaġ s‑ġaylli‑s‑a‑tmmaġn mddn n‑ddunit‑ad.

⁴ imqlad lli‑s‑a‑ntmmaġ nkkʷni ur‑gin win ddunit‑ad, walaynni tlla‑gisn‑tḥkimt itjhhdn n‑rbbi a‑srsn‑nssḍar lbruj dusnin.

⁵ ar‑nssgriwil iswingimn n‑bnadm, ar‑nh̬llu iwaliwn n‑kullu ma‑italln ih̬f‑ns a‑iḍaḍḍ tawassna n‑rbbi, ar‑nkkrs kullu tinbaḍin n‑mddn baš ad‑wrrin s‑tnbaḍin l‑lmasiḥ.

⁶ imma kunni, iġ‑tram a‑tskarm kullu s‑tnbaḍin l‑lmasiḥ, nujad nkkʷni a‑nḥkam f‑wanna ur‑srsnt‑iskarn.

⁷ walaynni kunni ar‑tẓrram ġir ma‑illan ġ‑brra. is‑darun‑illa ma‑ittinin iga ah̬ddam l‑lmasiḥ? illa fllas a‑ur‑ittu mayad: ula nkkʷni nga ih̬ddamn l‑lmasiḥ.

⁸ ur‑akkʷ‑rad‑ḥšmġ, wah̬h̬a da‑sawalġ bahra f‑mamnk ad‑aġ‑iẓli siditnnġ ad‑awn‑nmala ma‑kʷn‑d‑iqqann a‑ti‑tskarm. ašku iẓli‑aġ urd f‑a‑kʷn‑nhlk walaynni f‑a‑kʷn‑nɛawn.

⁹ a‑ur‑tġalm is‑riġ a‑kʷn‑in‑ssiwidġ s‑tbratin‑inu.

¹⁰ illa ma‑ittinin «ġakud nna‑yaġ‑d‑yura bulus itjhhd išqu didnnġ, walaynni ġakud nna‑d‑darnnġ‑yuška iḍɛf ur‑issin mamnk a‑isawal.»

¹¹ imma wan mddn‑an, illa fllasn ad‑issann mayad: ġakud nna‑n‑darun‑nuška ar‑bdda‑nskar kullu s‑mklli‑awn‑in‑nenna lliġ‑d‑naggug.

¹² ur‑nzɛm a‑nssngadda ih̬fawn‑nnġ d‑kra n‑mddn lli‑talġnin ih̬f‑nsn, ula ra‑nini is‑tn‑nuf. ašku lliġ a‑ttinin i‑ngratsn «kra yuf kra» nġd «kra yugʷr kra» iban fllasn is‑ur‑fhimn yat.

¹³ imma nkkʷni ur‑ra‑n‑ntyaggal s‑ma‑n‑fllannġ‑yaggugn, walaynni ra‑ng ġmklli nga ġ‑twuri‑ad‑aġ‑ifka rbbi lli‑s‑aġ‑n‑yiwi ula s‑darun.

¹⁴ ur‑nri a‑nssurf iwtta s‑illi ur‑aġ‑ifki rbbi. walaynni ifka‑yaġ kra ġ‑darun, ašku nkkʷni a‑izwarn is‑n‑nmudda nsslkm‑awn‑in lh̬bar ifulkin l‑lmasiḥ.

¹⁵ ur‑akkʷ‑a‑ntalġ ih̬f‑nnġ f‑kra‑ur‑nskir ula f‑mad‑skrn wiyyaḍ, walaynni ar‑n‑ntrju ġ‑igr n‑darun a‑gis‑tigat‑tmgra lliġ a‑ttzayadm ġ‑liman.

¹⁶ ġmkan a‑s‑ra‑nddu tigira, ar‑ntbrraḥ s‑lh̬bar ifulkin ġ‑tmizar yaḍni aggugn‑in fllawn, bla‑da‑ntalġ ih̬f‑nnġ f‑ma‑ityawskarn ġ‑igran n‑mddn yaḍni.

¹⁷ ġmklli ityaran: «wanna iran a‑yalġ, yalġ siditnnġ.»

¹⁸ ašku urd yan irḍan ih̬f‑ns a‑ra‑ityawqbal, walaynni yan f‑irḍa sidis.