2 kurintus 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus arqqas l‑lmasiḥ yasuɛ ġmklli ira rbbi, d‑zġ‑gʷmatnnġ timutaws. i‑umnaggar n‑rbbi ġ‑tmdint n‑kurintus ula kullu imẓlayn n‑rbbi ġ‑tmazirt n‑ah̬aya.

² ad‑awn‑tili lbaraka d‑sslamt zġ‑rbbi babatnnġ ula siditnnġ yasuɛ lmasiḥ.

rbbi ar‑bdda‑issfjjij ul‑nnġ

³ ar‑bahra‑ntalġ rbbi babas n‑siditnnġ yasuɛ lmasiḥ, iga babatnnġ iḥnnan lli‑bdda‑issfjjijn ul‑nnġ.

⁴ ar‑aġ‑itɛawan ġ‑kullu tanukmut lli‑fllannġ‑izrayn, baš a‑niẓḍar a‑ntɛawan wiyyaḍ ġ‑tnukmut nna‑ġ‑llan, s‑lmɛawnt lli‑s‑aġ‑itɛawan rbbi.

⁵ unšk lli‑bahra‑nkkat tammara f‑ism l‑lmasiḥ, a‑yaġ‑bahra‑issfjjij rbbi ġ‑tamunt l‑lmasiḥ.

⁶ f‑ssibt‑nnun a‑f‑a‑nzray ġ‑tnukmut‑ad baš a‑ttfjjijm tnjmm, d‑ssibt‑nnun a‑f‑a‑ntfjjij baš ad‑daġ‑ttfjjijm tdusm a‑tṣbrm i‑tmmara zund tammara‑yad ġ‑nlla nkkʷni.

⁷ nssn is‑ra‑tdusm tṣbrm, ašku iġ‑a‑tkkatm tammara zund nkkʷni ra‑kʷn‑issfjjij rbbi zund nkkʷni.

⁸ way‑aytma, nra a‑tissanm f‑tnukmut lli‑fllannġ‑izrin ġ‑tmazirt n‑asiyya. tšqa bahra, tẓẓay fllannġ aylliġ nġal is‑ur‑akkʷ‑nẓḍar a‑sul‑nddr,

⁹ nini lmut ayd‑aġ‑d‑iqqann. walaynni yudja‑yaġ rbbi a‑nzzri tanukmut‑an baš a‑ur‑yili rrja‑nnġ ġ‑ih̬f‑nnġ walaynni ġ‑rbbi lli‑issnkarn ġwilli mmutnin.

¹⁰ ikkis‑aġ‑d ġakudan i‑lmut išqan. hati rad‑aġ‑d‑sul‑zgis‑itkkis. nttan a‑ġ‑n‑nga rrja‑nnġ baš ad‑aġ‑d‑sul‑zgis‑itkkis.

¹¹ illa fllawn ula kunni a‑ttḍalabm rbbi f‑ssibt‑nnġ. ġmkad a‑s‑rad‑aġ‑ttɛawanm, igatn ġwilli tškarnin rbbi f‑lbarakat lli‑aġ‑d‑yakka f‑ssibt n‑tẓulla ggutnin.

amuddu n‑bulus ula tabrat‑ns

¹² nfrḥ ġilad ašku imla‑yaġ‑uwl‑nnġ izd s‑ufulki n‑rbbi a‑s‑a‑nskar d‑kullu mddn s‑nniyt iṣfan. ula kunni, ġmkan a‑didun‑nskr, urd ġir s‑lɛaql n‑bnadm walaynni s‑lbaraka n‑rbbi.

¹³ kullu mad‑awn‑in‑ntara, ra‑tiẓḍarm a‑ti‑tġrm tfhmm‑t.

¹⁴ illa gis ma‑ur‑ta‑tfhimm, walaynni nra a‑kullu‑tfhmm baš a‑srnnġ‑tfrḥm nfrḥ srun ġ‑wass lli‑ġ‑ra‑d‑yašk siditnnġ yasuɛ.

¹⁵ nniġ d‑ih̬f‑inu ra‑tfhmm. f‑mayan a‑f‑skrġ f‑a‑d‑darun‑kġ‑zwar baš a‑didi‑tfrḥm snat‑twal.

¹⁶ skrġ f‑a‑kʷn‑sliġ zriġ s‑tmazirt n‑makiduniyya, wrriġ‑d ilmma s‑darun zġ‑makiduniyya, taznm‑iyi s‑tmazirt n‑yudaya.

¹⁷ izd s‑wawal ih̬wan a‑s‑awn‑nniġ mayan? is‑a‑sawalġ zund yan iran a‑irḍu ih̬f‑ns, ar‑ittini s‑yat tunfust «iyah iyah, uhu uhu»?

¹⁸ walaynni ġmklli izga rbbi ġ‑kullu ma‑ittini, ġmkan a‑didun‑nskr ula nkkʷni. ur‑akkʷ‑nrur «iyah» a‑ig «uhu».

¹⁹ ašku yasuɛ lmasiḥ yus n‑rbbi lli‑f‑a‑darun‑ntbrraḥ nkki d‑silwanus d‑timutaws, ur‑gis‑illi «iyah uhu» walaynni «iyah» a‑bdda‑iga.

²⁰ ašku ġunšk lli‑gan iwaliwn lli‑s‑inna rbbi f‑ma‑ra‑iskr ifulki, lmasiḥ a‑tn‑kullu‑issuwfan. mayan a‑f‑a‑nttini «amin» s‑ism l‑lmasiḥ ġakud nna‑ntalġ rbbi.

²¹ hati rbbi ad‑aġ‑izzgan nkkʷni didun ġ‑tamunt l‑lmasiḥ, iẓli‑aġ kullu,

²² iml‑aġ is‑nga wins, ig rruḥ‑ns ġ‑uwl‑nnġ baš a‑ig tamatart n‑is‑ra‑issafu kullu maylli‑s‑aġ‑inna.

²³ rbbi issn ul‑inu. issn mah̬ aylliġ ur‑n‑darun‑uškiġ s‑kurintus ġ‑uwssan‑an, ašku ur‑riġ ad‑awn‑tt‑ssṭiyyrġ.

²⁴ ur‑nri nkkʷni a‑nḥkam ġ‑liman‑nnun, walaynni nra a‑didun‑ntmɛawan baš a‑ttfraḥm, ašku nssn is‑tzgam ġ‑uġaras l‑lmasiḥ.