2 bṭrus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

yan imikk ra‑d‑yašk lmasiḥ

¹ way‑aytma ɛzzanin, tabrat‑ad tga tis snat‑tbratin lli‑awn‑in‑uriġ. ssktiġ‑awn‑d srsnt tiġawsiwin‑ad baš a‑tswingimm ġ‑ma‑yʷġẓann.

² riġ a‑di‑tktim iwaliwn lli‑s‑nnan lanbiya n‑rbbi ġayd izrin, tktim‑d almmud lli‑f‑kʷn‑yuṣṣa‑unjjam siditnnġ f‑imi n‑irqqasn‑nnun.

³ walaynni taġawsa ihiyyan a‑stt‑igan, a‑tissanm is‑rad‑d‑aškin kra n‑iṭnnaẓn ġ‑uwssan‑ad ggʷranin ar‑bahra‑teṭnaẓn ar‑skarn f‑kullu ma‑ttirin i‑ih̬f‑nsn

⁴ ar‑ttinin: «manza siditun? is‑ur‑inni ra‑d‑yašk? ẓrat, mnšk ayad s‑zrin imzwura‑nnġ, walaynni sul iqama kullu ġmklli iga zġ‑isizwar, ġayklli ttyawh̬laq ddunit sul s‑ġilad.»

⁵ imma ntni ar‑ttirin ad‑ttun izd s‑wawal‑ns a‑s‑ih̬lq rbbi ignwan ġ‑isizwar, iskr ikalln ġ‑gr‑waman iskr‑tn s‑waman.

⁶ tdl ilmma ddunit n‑uwssan‑an s‑waman, ttyawhlak kullutt.

⁷ imma ġilad s‑wawal‑ns a‑s‑iḥḍa rbbi ignwan d‑wakal, baš a‑tyawhlakn s‑lɛafit ġ‑wass l‑lḥsab lli‑ġ‑ra‑ihlk ġwilli srs rurnin tiġurdin.

⁸ way‑aytma ɛzzanin, a‑ur‑tettum taġawsa‑yad: iga yan‑wass dar siditnnġ zund alf n‑usggʷas, ig alf n‑usggʷas zund yan‑wass.

⁹ ur‑imaṭl siditnnġ a‑iskr maylli‑s‑inna, wah̬h̬a da‑ttinin kra n‑mddn imaṭl. ašku ar‑didun‑itṣbar. ur‑iri ntta a‑ityawhlak yan, walaynni ira kullu mddn ad‑wrrin fln iskkirn‑nsn ʷh̬šnnin.

¹⁰ walaynni ass n‑siditnnġ ra‑d‑yašk zund amh̬h̬ar. rad‑ittin ignwan s‑ijjij itjhhdn, ifnu kullu ma‑gisn‑illan s‑lɛafit, tjdr akal ula kullu ma‑gis‑skrn mddn.

¹¹ ra‑ityawhlak kullu ma‑illan. f‑mayan a‑f‑ra‑kʷn‑sqsaġ: man mddn zġ‑ra‑tgm? is‑ur‑ra‑ttirim a‑tskarm afulki ar‑ttrḍum rbbi

¹² ġilad ġ‑a‑ttqlm s‑wass n‑rbbi, ar‑t‑id‑tssakmurm? ġassan a‑ra‑tyawhlakn ignwan s‑lɛafit, ifsi kullu ma‑illan s‑trġi iggutn.

¹³ imma nkkʷni ar‑ntql s‑maylli‑s‑aġ‑inna rbbi, ar‑n‑ntrju ignna l‑ljdid d‑wakal l‑ljdid, ɛmmrn s‑kullu ma‑irḍan rbbi.

¹⁴ imma ġilad ġ‑a‑ttqlm s‑mayad, ay‑aytma ɛzzanin, gat‑n tiqqi‑nnun a‑bdda‑tili sslamt ġ‑gratun d‑rbbi, bla gigun illa kra l‑lɛib ula kra yʷh̬šnn ġ‑uwlawn‑nnun.

¹⁵ swingimat f‑mamnk a‑didun‑iṣbr siditnnġ baš a‑twrrim tnjmm, ġmklli‑awn‑in‑yura ula gʷmatnnġ iɛzzan bulus s‑tḥkimt lli‑as‑ifka rbbi.

¹⁶ ġmkad a‑ittini f‑tġawsiwin‑ad ġ‑kullu tibratin‑ns. kra ġ‑ma‑itara, ur‑irh̬i a‑t‑nfhm, imma kra n‑ibujadiyn d‑mddn fssusnin ar‑sslullin iwaliwn‑ns zund mad‑sslullin igzman yaḍni ġ‑warratn n‑rbbi. ar‑di‑traran lhalak f‑ih̬fawn‑nsn.

¹⁷ imma kunni ay‑aytma ɛzzanin, lliġ tssnm kullu mayad ur‑ta‑ijri, rarat lɛaql a‑kʷn‑ur‑ildi kra ijlan iffuġn zġ‑wawal n‑rbbi ula tḍrm zġ‑laman‑ad ġ‑tllam.

¹⁸ zaydat ar‑ttimġurm ġ‑lbaraka d‑twassna n‑unjjam siditnnġ yasuɛ lmasiḥ. nttan a‑bdda‑ntalġ ġilad ula kullu mayd‑d‑iftan. amin.